“Neftçi” ilə oyunda “Şüvəlan” stadionunun işıqlandırma sistemində heç bir problem yaşanmayacaq”

ÖLKƏ FUTBOLU 27 Aprel 2011 / 16:35 2913

- A +

“Azərbaycan Premyer Liqasının 29-cu turu çərçivəsində keçiriləcək “Azal” - “Neftçi” oyunu ilə əlaqədar olaraq klubumuza məxsus “Şüvəlan” stadionunda işıqlandırma sistemi tam hazır vəziyyətə gətirilib. Bununla bağlı texniki bir problem olarsa, onu aradan qaldırmaq üçün əlavə 2 ehtiyat generator da arenaya yerləşdirilib. Həmin qurğular dərhal işə düşərək yaranacaq hər hansı bir problemi vaxtında aradan qaldıracaq ki, bu da oyunun normal gedişatını təmin edəcək. Bu sözləri Qol.Az-a açıqlamasında AZAL klubunun mətbuat katibi Eldəniz Yusifov deyib.

Klub rəsmisi AZAL - “Neftçi” görüşünün saat 20:00-da başlamasına isə belə aydınlıq gətirib: “Artıq stadionun işıqlandırma sistemi ilə bağlı bütün işlər yekunlaşıb. Amerikaya məxsus bir şirkətin mütəxəssisləri bu işi bütün incəliklərinə qədər mükəmməl şəkildə qurublar. “Bakı” ilə qarşılaşmada və ondan əvvvəldə bununla bağlı müəyyən yoxlamalar olub və nəticələr bizi razı salıb. PFL-in nümayəndələri də ötən tur “Bakı” ilə baş tutan oyunda stadionda müəyyən yoxlamalar apardı və növbəti oyunların axşam saatlarında keçirilməsində heç bir problemin olmadığına əmin oldu. Həmin matçda oyunun ikinci hissəsi işıqlandırma sistemi altında oynanıldı və təşkilati işlərdə heç bir problem yaşanmadı.

İnanıram ki, növbəti oyunlarda da arenanın işıqlandırılmasında heç bir əngəl olmayacaq. “Neftçi” ilə oyundan öncə Azərbaycan estradasının məşhur müğənnisi Tünzalə Ağayeva AZAL-ın yeni himnini oxuyacaq. Rəsmi açılış isə stadionla bağlı digər infrastruktur işləri tam başa çatandan sonra təşkil olunacaq. Bu sahədə də artıq işlər yekunlaşmaq üzrədir”.

Yusifov eyni zamanda AZAL-ın “altılıq” və Azərbaycan kubokundakı şanslarını da dəyərləndirib. “Artıq komandamızın çempionluq şansları qalmayıb və buna görə də bütün diqqətimizi kubok oyunlarına yönəltmişik.Yarımfinala kimi gəlmişiksə, bu mərhələdə “İnter”i də məğlub edib, finala çıxmaq istəyirik. Finalda da qalib gələrək Azərbaycan kubokuna sahib çıxmağı planlaşdırırıq”.

“Bununla bərabər çempionatda 3-cü və 4-cü yer uğrunda mübarizəmizi davam etdirəcəyik. Ötən oyunlarda zədələnən hücumçusu Eleandro Pema da artıq mayın 15-dən etibarən komandanın düşərgəsinə qoşulacaq. Bundan sonra bir tur qalır ki, belə də Pema üçün artıq mövsüm bitmiş hesab olunur. Digər üzvümüz Draqan Mandiç isə artıq fevral ayından etibarən oynamır. Ola bilsin ki, bu mövsümdən sonra o karyerasını bitirəcək. Qennadi Bliznyuk isə spirtli içkilərə qurşandığına və nizam – intizamı pozduğuna görə ona dünənki toplantıda sonuncu xəbərdarlıq edilib. O, özü də komandadan ayrılmaq istəyini bildirdi və müqavilə 2 tərəfli qaydada pozuldu. Ancaq onun transfer hüququ hələ ki, AZAL-a məxsusdur".

Daha çox