“Buraxdığımız ucuz qol bizə psixoloji təsir etdi” – Rəşad Sadıqov

“Buraxdığımız ucuz qol bizə psixoloji təsir etdi” –  Rəşad Sadıqov
ÖLKƏ FUTBOLU 3 Fevral 2019 / 22:04 3143
-  A +

“Əvvəlcədən də düşündüyümüz kimi, matç çox gərgin alındı. Azarkeşlər üçün maraqlı, sürətli oyun oldu”.

Qol.az-ın məlumatına görə, bu sözləri “Qarabağ”ın kapitanı Rəşad Sadıqov Topaz Premyer Liqanın 15-ci turunda “Neftçi" ilə heç-heçə etdikləri oyundan (1:1) sonra jurnalistlərə açıqlamasında deyib.

Qarşılaşma ilə bağlı fikirlərini açıqlayan müdafiəçi rəqibin səfərdən istədiyi nəticə ilə ayrıldığını bildirib: “Qış fasiləsindən sonra birinci qarşılaşma olmasına baxmayaraq, fikrimcə, hər iki komanda sürətli və keyfiyyətli oyun göstərməyə çalışdı. Baxımlı oyun alındı. Qələbə qazanıb, aradakı xal fərqini götürmək istəyirdik. Ancaq alınmadı. Demək olar ki, “Neftçi” buradan istədiyi nəticə ilə ayrıldı”.

Rəşadın fikrincə, “Qarabağ” bu oyunda uduza da bilərdi: “Elə epizodlar var idi ki, biz məğlub da ola bilərdik. Oyun elə gedirdi ki, uda da bilərdik, uduza da. İkinci hissədə açıq oyun oldu. Qol imkanları yaratdıq. “Neftçi” də Dabo ilə ikinci hissədə belə bir fürsəti boşa verdi. Ancaq futbolda hər epizodu qola çevirmək olmur”.

Sadıqov buraxdıqları qolun komandaya psixoloji baxımdan mənfi təsir göstərdiyini söyləyib: “Psixoloji üstünlüyün “Neftçi”nin tərəfində olması bu gün oyunda da hiss olunurdu. Rəqib bizdən daha ehtiyatlı oynayırdı. Əslində oyuna çox yaxşı başlamışdıq, sadəcə, buraxdığımız ucuz qol komandamıza psixoloji cəhətən təsir etdi. İkinci hissədə açıq oyun getdi. Bizim hücumlarımız olurdu, “Neftçi” də əks-hücuma çıxırdı. Rəqib azlıqda qalandan sonra üstünlük tam olaraq bizə keçdi.  Ümumən götürsək, “Neftçi” bizdən 3 xal irəlidədir. Bu, onlara psixoloji üstünlük qazandırır”.

Daha çox


Son xəbərlər
19.03.26  16:00

“Real”da ciddi itki

topaz banner