"İstəyirik ki, günahımızı yuyaq" - Vüsal İsgəndərli

"Keşlə"nin futbolçusu Vüsal İsgəndərli Azərbaycan Premyer Liqasının 10-cu turunda səfərdə "Səbail"lə heç-heçə etdikləri görüşdən (0:0) sonra Qol.az-ın da müxbirinin iştirak etdiyi brifinqdə jurnalistlərin suallarını cavablandırıb:

- Çətin oyun olacağını bilirdik. Külək də bir tərəfdən maneçilik yaradırdı. "Səbail" 4 və ya 5  matçda xal itirməsinə baxmayaraq, yaxşı komandadır. Aramızdakı xal fərqini artırmaq istəyirdik. Sadəcə külək həqiqətən də həm rəqib komandaya, həm də bizə mane oldu. Amma buna da şükür. Uda bilmirsənsə, gərək, məğlub olmayasan.

- Bundan əvvəlki oyunlarda topla yaxşı oynayırdınız. Bu günkü matçda elə də alınmırdı. Küləyə görə idi, yoxsa başqa səbəblər vardı?

- Bizim əsasən, orta sahə oyunçularımız topla oynamağı sevən futbolçulardır. Ona görə də topla oynamaq yaxşı alınır.  Bu gün topla rəftar etməyimizə konkret külək imkan vermədi. Ona görə çətinlik çəkirdik.

- Birinci hissədə küləyin istiqaməti rəqib qapısına idi.  Amma bundan istifadə edə bilmədiniz.

- Külək rəqib qapısına tərəf olanda deyirlər ki, üstünlük bizdədir. Ancaq ötürmələrdə də külək topu aparırdı, çatmaq olmurdu. Üstünlüyümüz onda idi ki, gərək, qapıya zərbə vurardıq. Amma rəqib yaxşı müdafiə olunurdu. Zərbəyə, ötürməyə imkan vermirdilər.

- Çox epizodda Tərlan Əhmədov həm sənə, həm də başqalarına çox əsəbləşdirdi. Bir epizodda da "məni infarkt edəcəksiniz" dedi.

- Baş məşqçidir, o da streslidir. Keçən il sonuncu yeri tutmuşduq. Bu il isə qarşımıza şərt qoymuşuq. Ötən mövsüm etdiyimiz həqiqətən  də səhv idi. Komandanı sonuncu pilləyə saldıq. İçəridə mən də, baş məşqçi də, hamımız vardır. İndi Tərlan Əhmədov da, futbolçular da istəyir ki, həmin günahı yusun. Ona görə də üzərimizdə təzyiq böyükdür. Sağ olsun, prezident tərəfindən də dəstək çoxdur. Sadəcə özümüz məsuliyyəti hiss edirik ki, buradan çıxmalıyıq.

- Tərlan Əhmədov  oyundan sonra paltardəyişmə otağında da sərt şəkildə münasibət göstərdi?

- Xeyr. Bilmirəm ki, sizi necə inandırım. Sadəcə girib, təbrik etdi ki, yaxşı oynadınız. Hər oyun qalib gələ bilmərsən, əsas odur ki, uduzmamısan. Neçə qarşılaşmadır ki, məğlub olmuruq. Bu, o deməkdir ki, asan rəqib deyilik.

- Növbəti rəqibiniz "Neftçi" olacaq. Çempionluğa oynayan komandadır. Onları məğlub etmək nə dərəcədə real olacaq?

-  Belə deyərdim ki, digər rəqiblərə necə hazırlaşırıqsa, "Neftçi" ilə görüşə də elə hazırlaşacağıq. Rəqibin "Neftçi" və ya "Qarabağ" olması fərq etmir.  Əlbəttə,  "Neftçi" də "Qarabağ" da  yaxşı komandalardır. Sadəcə məqsədimiz böyük uğurlardırsa, böyük komandalarla oynamalısan. Yəni, heç  bir problem yoxdur. İnşallah, stadion hazır olar. Sizə söz verirəm ki, həmin stadionda çox maraqlı oyun görəcəksiniz.

- Qalib gəlsəydiniz, hətta, "Neftçi"ni keçə bilərdiniz. Xallar eyni olsa da, 2-ci pilləyə yüksəlmə ehtimalınız vardı. Bu,  növbəti oyuna qaldı?

- Qismətdir. Hər şey öz əlimizdədir. Yaxşı çalışmaq lazımdır. Kim nə deyir, desin,  futbolda əziyyət çəkmədinsə, uğur  qazanmaq mümkün deyil. Növbəti turda hədəfimiz, təbii ki, "Neftçi"yə qalib gəlməkdir.