Ramiz Məmmədov: “Azərbaycanda səviyyəli klub tapıb yoldaşlıq görüşü keçirmək imkanımız yoxdur”

“Qəbələ” klubunun baş məşqçisi Ramiz Məmmədovun Qol.Az saytına müsahibəsi

- Ramiz müəllim, ilk öncə komandanızın Antalyada keçirdiyi təlim-məşq toplanışı haqda fikirlərinizi öyrənmək istərdik.
- Türkiyədə 14 günlük təlim-məşq toplanışında olduq. Komandamızın heyətinə yeni oyunçular cəlb etdik. Bildiyiniz kimi, Sergey Sokolovla artıq müqavilə imzalamışıq. Bundan başqa isə Tomaş Stolpanın komandamızla müqaviləsi bitmişdi. Onunla altı aylıq yeni müqavilə imzaladıq. Norveçin yüksək liqasında oynayan Paulo və bolqar Leriçko da artıq “Qəbələ”nin oyunçularıdır.
- Ümumiyyətlə, təlim-məşq toplanışından razı qaldınız?
- Bəli. Dörd yoxlama görüşü keçirdik. Rusiya premyer liqasında çıxış edən “Tom”u və Anqola yüksək liqasında çıxış edən klubu məğlub etdik. Rusiyanın I divizion təsmilçisi "Baltika" ilə bərabərə qaldıq. Daha sonra Koreya yüksək liqasında çıxış edən “İnçon” klubuna minimal hesabla məğlub olduq.
- Yoxlama görüşləri zamanı yəqin ki, komandanızın zəif cəhətlərini özünüzdə müəyyən edə bildiniz...
- Hazırda demək olar ki, bütün boşluqları aradan qaldırmışıq. Ancaq hələ də hücumçu  axtarışını davam etdiririk. Gözaltı etdiyimiz forvardlar var. Onlarla danışıqlar aparırıq. Çalışacağıq ki, bu hücumçulardan birini heyətimizə cəlb edək.
- Qeyd etdiyiniz futbolçular yerli, yoxsa legionerlərdir?
- Xeyr, xarici oyunçulardır.
- “Qəbələ”dən ayrılan bəzi futbolçular oldu...
- Mən inanıram ki, yeni transferlərimiz yola saldığımız oyunçuların yerlərini rahatlıqla dolduracaqlar...
- “Standard” klubunun baş məşqçisi Böyükağa Hacıyev klublarımızın Antalyaya getməsindən narazılıq edirdi. Hacıyev Antalyaya yollanmaqda bir məna görmədiyini bildirirdi. Bu fikrə sizin münasibətiniz necədir?
- Hər bir məşqçinin fikrinə hörmətlə yanaşıram. Yəqin o da komandası üçün Azərbaycanda qalmağın daha münasib olacağını fikirləşir. Amma reallıq budur ki, bizim Azərbaycanda 4-5 səviyyəli klub tapıb yoldaşlıq görüşü keçirmək imkanımız yoxdur. Həmin klubları Azərbaycana dəvət etmək isə külli miqdarda vəsait tələb edir. Antalya toplanışının bizim klublara böyük faydası dəyir. Əksər klublar ordadırlar. İstədiyin klubla yoldaşlıq görüşü keçirmək şansın olur. Komandamızın futbolçularının beynəlxalq oyun təcrübəsi artır. Səviyyəli klublarla oynamaq bizim futbolçuların oyun praktikasını yüksəldir. Onları psixoloji cəhətdən daha da möhkəmləndirir. Biz Antalyaya əvəzedici heyətdən 5-6 futbolçu aparmışdıq. Onlar yoxlama görüşlərində çıxış etdilər. Özünüz fikirləşin... Rusiyanın premyer liqa klubuna qarşı oynamaq bu gənc oyunçuların təcrübələrini artmasına kömək etməzmi? “Qəbələ” klubu olaraq artıq gənc oyunçularımızı yetişdirib əsas heyətə cəlb etmək istəyirik.
- Tomaş Stolpa ilə müqaviləni artırdığınızı bildirdiniz. Halbuki mətbuatda onun komandadan qovulduğu yazılırdı...
- Biz Stolpanı komandadan qovmamışıq. Onun bizimlə müqaviləsi bitmişdi. Həm də son oyunlarda qırmızı vərəqə aldığından çempionatda bizə kömək edə bilməyəcəkdi. Bu səbəbdən ona vətəninə dönməsini söyləmişdik. Özünə demişdik ki, əgər yeni müqaviləyə ehtiyac duyulsa, səninlə əlaqə saxlayacağıq. Antalya toplanışı zamanı biz onunla əlaqə saxladıq. Şərtlərimizi qəbul etdi və bizdə yenidən onu heyətimizə qaytardıq. Çünki onun peşəkarlığı çox yüksək səviyyədədir. Bundan əlavə artıq polşalı hücumçu komandamızın bütün oyun sisteminə bələddir. 
- Komandaya bir yeni hüçümçunun transfer olunacağını qeyd etdiniz. Həmin oyunçu nə zaman komandaya qoşulacaq?
- Premyer liqada “Olimpik-Şüvəlan”la səfərdə keçirəcəyimiz matça qədər həmin oyunçunu komandamızın heyətində görə biləcəksiniz.
- Fevralın 2-dən çempionatın oyunları bərpa olunur. “Qəbələ”nin qarşısına qoyduğu hədəflər dəyişməyib ki?
 - Xeyr, hədəfimiz dəyişməz olaraq qalır. Məqsədimiz ilk “altılığ”a düşməkdir. Bilirsiniz ki, avroliqada vətənimizi təmsil etmək üçün çox gözəl şanslarımız var. İnşallah buna nail ola biləcəyik.