Azərbaycan futbolunun küsülüləri (Birinci yazı)

Azərbaycan futbolunda təmsil olunan bu şəxslərin bir çoxu vaxtilə aralarındakı isti münasibətə görə çoxlarına nümunə olublar. Amma müəyyən bir zamandan sonra onların arasında ya münaqişə yaşanıb, ya da münasibətlər soyumağa doğru gedib...

Qol.Az saytının «Azərbaycan futbolunun küsülüləri» adı altında verəcəyi silsilə yazılarda kimin-kiminlə münasibətlərinin pozulduğundan siz də xəbər tuta biləcəksiniz…

ŞAHİN DİNİYEV - RƏŞAD SADIQOV

Hər şey 2006-cı ildə Kiyevdə keçirilən Ukrayna - Azərbaycan oyunundan sonra başladı. O zaman millinin baş məşqçisi olan Şahin Diniyev başda Rəşad Sadıqov olmaqla bir neçə aparıcı futbolçunu 0:6 hesabı ilə başa çatan matçda qəsdən oynamamaqda suçladı. Bundan sonra R.Sadıqov bir daha Şahin Diniyevin rəhbərlik etdiyi milliyə dəvət edilmədi. Hətta AFFA-nın o vaxtkı prezidenti, mərhum Ramiz Mirzəyevin iş otağında Diniyevlə Sadıqovu barışdırmaq cəhdi də baş tutmadı. Rəşad Sadıqov ötən il Qol.Az saytına verdiyi müsahibədə «Şahin Diniyevə heç vaxt halallıq verməyəcəyəm» deməklə münasibətlərinin hələ də gərgin olduğuna işarə vurdu.

VAQİF SADIQOV - ƏSGƏR ABDULLAYEV

Azərbaycan futbolunun bu iki ünlü siması 1990-cı illərin ortalarında bir-birilə mənəvi qardaş kimiydilər. Bir neçə klubda bərabər çalışan iki mütəxəssis Azərbaycanın 18 yaşadək futbolçulardan ibarət milli komandasında birgə çalışarkən neçə-neçə istedadlı futbolçunu üzü çıxardı. Amma məşhur «iki qoçun başı bir qazanda qaynamaz» ifadəsi gec-tez onların da münasibətlərində təsdiqləndi. Hərçənd, bunun əsl səbəbləri indinin özündə də çoxlarına müəmmalı qalır. Nə Sadıqov, nə də Abdullayev bu mövzuda danışmaqda həvəslidirlər. Bilinən odur ki, Vaqif Sadıqov 1990-cı illərin sonlarında qeyri-rəsmi olaraq AFFA-nın komandası hesab edilən «Şəfa»dan çıxarıldıqdan və onun yerinə Əsgər Abdullayev gətirildikdən sonra iki məşqçinin onsuz da soyumaqda olan münasibətləri daha da gərginləşməyə başladı… O vaxtdan hər iki məşqçi arasında soyuq münasibət davam edir.

XAQANİ MƏMMƏDOV - TAHİR SÜLEYMANOV

Müstəqil Azərbaycan futbolunun hakimlik məktəbinin parlaq nümayəndələri. 1998-ci ildə AFFA-nın o zamankı prezidenti Fuad Musayevin birbaşa göstərişi ilə FİFA referisi Tahir Süleymanov «normativi tələb olunan səviyyədə yerinə yetirməmək» adı ilə hakimlikdən uzaqlaşdırıldı. T.Süleymanov özü isə o zaman bildirirdi ki, o, qardaşı Məzahir Süleymanzadəyə görə hakimlikdən çıxarılıb. T.Süleymanov bu hadisəyə görə F.Musayevlə yanaşı AFFA-nın Hakimlər Komitəsinin o vaxtkı və indiki sədri Xaqani Məmmədovu da ittiham edirdi. Halbuki buna qədər onların da isti münasibətləri vardı. X.Məmmədov da T.Süleymanovun ittihamlarını cavabsız qoymurdu. Hər iki şəxs indi də Azərbaycan futbolunda önəmli vəzifə tutsa da, yenə də küsülü olaraq qalırlar.

FUAD MUSAYEV - MƏZAHİR SÜLEYMANZADƏ

Fuad Musayevin rəhbərliyi dönəmində AFFA-nın mətbuat xidmətinə başçılıq edən Məzahir Süleymanzadə vəzifəsindən çıxarılsa da, yalnız qardaşı Tahir Süleymanov hakimlikdən kənarlaşdırıldıqdan sonra, 1998-ci ildən qurumun şefinə qarşı sərt ittihamlarla çıxış etməyə başladı. Sonradan M.Süleymanzadə Füad Musayevə qarşı yaranan müxalif cəbhənin önəmli simalarından birinə çevrildi.

İQOR PONOMARYOV - YUNİS HÜSEYNOV

Hazırda məşqçi olan bu iki şəxsin münasibətləri futbolçu kimi fəaliyyət göstərdikləri dövrdə korlanıb. Bakının «Neftçi» komandasında bir yerdə çıxış edərkən, 1988-ci ildə Ponomaryovun SSRİ-nin olimpiya yığmasına cəlb olunması ilə başlanan narazılıq bu günə qədər davam etməkdədir. Bir neçə ay öncə Yunis Hüseynov verdiyi müsahibədə əslində Seul olimpiadasına Ponomaryovun yox, onun aparılmalı olduğunu, lakin SSRİ Futbol İttifaqının ayrıseçkiliyə yol verdiyini iddia etmişdi.