Ən yaxşı danışıq qabiliyyətinə malik futbolçumuz kimdir? (SORĞU)

ÖLKƏ FUTBOLU 27 Oktyabr 2009 / 18:38 4235

- A +

Azərbaycan futbolunun yaralı yerlərindən biri də oyunçularımızın danışıq qabiliyyətinin aşağı səviyyədə olmasıdır. Əksər hallarda biz jurnalistlər futbolçularımızın fikirlərini qələmə alarkən çox çətinlik çəkirik. Həmkarlarımız arasında apardığımız sorğuda ən yaxşı danışıq qabiliyyətinə malik olan futbolçumuzu müəyyənləşdirməyə çalışdıq.

Altay Əliyev (AzTV): “Fikrimcə, ən səlis danışanlar Aslan Kərimov və Ruslan Abışovdur”.

İlkin Fikrətoğlu (ATV): “Nisbətən Aslan Kərimov daha səlis danışır. Karyerasını bitirənlərdən isə Qurban Qurbanov və Ramiz Məmmədovla ünsiyyət qurmaq mənim üçün daha münasibdir”.

Rövşən Binnətli (Lider): “İndiki oyunçulardan millimizin qapıçısı Kamran Ağayevin adını çəkə bilərəm. Eyni zamanda Kamal Quliyev də səlis danışıq qabiliyyətinə malikdir. Ötənlərin məşhur futbolçularından isə Təbriz Həsənovun adını çəkmək olar”.

Anar Cəfərsoy (Supersport.Az): “Ümumiyyətlə səlis, maraqlı danışmaq və suallara ətraflı cavab vermək baxımından Tərlan Əhmədov, Rəşad Sadıqov və Müşfiq Hüseynov seçilirlər. Onların fikrini yazmaq asandır və redaktə etməyə elə də ehtiyac duyulmur”.

Vüqar Zeynalov (Azerisport.com): “Fikrimcə, azərbaycanlı futbolçular arasında ən yaxşı danışıq qabiliyyətinə malik olanı Aslan Kərimovdur. Ondan müsahibə alandan sonra çox redaktə etməyə ehtiyac olmur. Başqa kiminsə adını çəkə bilmərəm”.

Rüstəm Piriyev (Extratime.Az): “Mən bir yox, bir neçə oyunçunun adını çəkə bilərəm. Mahmud Qurbanov, Kamran Ağayev, Rəşad Sadıqov və Cahangir Həsənzadənin adını qeyd etmək mümkündür. Fikrimcə, məhz bu oyunçular ölkəmizdə ən yaxşı danışıq qabiliyyətinə malik olanlardır”.

İxtiyar Əsgərov (Apasport.Az): “Azərbaycan futbolunda az-çox danışa bilənlərdən yalnız Rəşad Sadıqovun adını çəkə bilərəm. Digərləri isə yalnız rusca danışır”.

Erkin İbrahimov (Azerifootball.com): “Rəşad Sadıqovun adını qeyd edə bilərəm. Sözü üzə demək xasiyyətinə görə isə Samir Əliyevi fərqləndirərdim”.

İbrahim Cəfərov (Qol.Az): “Fikrimcə, Azərbaycanda ən yaxşı danışıq qabiliyyətinə malik futbolçu Rəşad Sadıqovdur. Məhz Rəşaddan müsahibə alarkən, onu çox redaktə etməyə ehtiyac olmur. O cümlədən Mahmud Qurbanov, Rail Məlikov və Ceyhun Sultanovun da danışıq qabiliyyəti yaxşıdır”.

Beləliklə, sorğunun nəticəsinə əsasən millimizin kapitanı və “Qarabağ”ın müdafiəçisi Rəşad Sadıqovun adı daha çox çəkildi. Eyni zamanda Aslan Kərimov, Kamran Ağayev və Mahmud Qurbanovun da adı digər oyunçularla müqayisədə daha çox hallandırıldı.

Daha çox