Rəşad Sadıqov: "Rəqiblərdən böyük üstünlüyümüz yoxdur"

"Qarabağ" klubunun kapitanı Rəşad Sadıqovun Qol.Az saytına müsahibəsi

- Çempionatın son turunda bu mövsüm qalib gələ bilmədiyiniz "Rəvan" üzərində qələbə qazandınız. Görüş haqda fikirlərini bilmək istərdik.

- Bilirdik ki, bizi çətin bir qarşılaşma gözləyir. Məlumdur ki, bu komanda ilə ilk dövrlərdəki oyunlarda da çətinliklə üzləşmişdik. Birinci hissədə demək olar ki, qol epizodu yarada bilmədik. Ancaq ikinci hissəyə çox fəal başladıq. İki qol epizodumuz oldu. Hər ikisindən yararlana bildik və bizə vacib lazım olan üç xalı qazandıq.

- İlk hissədə rəqib qapısına heç cürə yaxınlaşa bilməməyinizin səbəbi nə idi?

- Rəqib bizimlə birə-bir mübarizə aparırıdı. Bu da biraz gözlənilməz olduğu üçün bizə çətinlik yaradırdı. Süni örtüklü meydançada bu cür mübarizə aparmaq asan deyil. Qış fasiləsindən sonra ilk dəfə idi ki, süni meydançada oynayırdıq. "Rəvan"a əvvəlki iki oyunda da qalib gələ bilməmişdik. Buna görə ilk hissədə qapıya yol tapmadıqca futbolçularımızda da bir qədər əsəbilik yaranmışdı. Ancaq fasilədə baş məşqçimiz daha sakit, soyuqqanlı oynamağımızı tələb etdi. Biz də məşqçilərin verdikləri tapşırıqların öhdəsindən gələ bildik.

- "Rəvan"a heç vaxt asan qalib gəlmədiyinizi bildirmişdin. Bu dəfə qələbənin çətin olmadığını demək olar?

- Əslində əvvəlki oyunlarda da çoxlu qol epizodlarımız olurdu. Sadəcə olaraq onlardan istifadə edə bilmirdik və istədiyimiz nəticəni qazana bilmirdik. Şükürlər olsun ki, bu dəfə əlimizə düşən imkanlardan isrifadə edə bildik. Deməzdim ki, rahat qələbə qazandıq. Rəqib çox müqavimət göstərdi.

- "Qarabağ" ardıcıl olaraq iki oyundur ki, mövsüm ərzində qalib gələ bilmədiyi komandaları məğlub edir. Bu qələbələrdə hansı amil daha çox rol oynadı?

- Sadəcə olaraq bu rəqiblərlə oyunun çətin olduğunu bildiyimiz üçün, əvvəlki oyunlarda vacib xal itkisinə yol verdiyimiz üçün qarşılaşmaya çox yaxşı köklənmişdik. Məşqçilər psixoloji cəhətdən bizi yaxşı hazırlamışdı.

- Bəlkə "Qarabağ" daha da güclənib.

- Düzü,  bu dəfə rəqibi daha çox ciddiyə alırdıq. "Rəvan", AZAL və "Simurq" bizə qarşı eyni taktika ilə oynayır. Yəni oyunu müdafiədən qururlar. Biz də artıq bu rəqiblə necə oynamaq lazım olduğunu bilirdik. Həm də əvvəlki qarşılaşmalarla müqayisədə budəfəki oyunumuz daha yaxşı alındı.

- Qış fasiləsindən sonra "Qarabağ"da müəyyən çatışmazlıqlar var idi. Artıq komanda öz oyununu tapa bilib?

- Bütün komandalar artıq 3-4 turdan sonra optimal formaya düşməlidirlər. Burada psixoloji məqamlar da var. Bu da nəticədən asılıdır. Ola bilər ki, komandada hər şey qaydasında olsa da, nəticə olmasın. Bu da komandaya psixoloji zərbə vurur. Şükürlər olsun ki, hələ yaxşı gedirik. Ola bilər ki, növbəti turlarda məğlub olaq.

- Növbəti turda  bu mövsüm qalib gələ bilmədiyiniz digər bir rəqib - "Simurq"la qarşılaşacaqsınız...

- "Simurq"un oyunu hamıya məlumdur. Yaxşı müdafiə olunan, mübarizə aparan komandadır. Əks hücumlarda təhlükəli olurlar. "Simurq" da "Rəvan" və AZAL kimi oynayır. Rəqibimiz III dövrəyə pis başlasa da, son turda inamlı qələbə qazanıb. İstəyəcəklər ki, səfərdə də məğlub olmasınlar. "Simurq"la istər Zaqatalada, istərsə də Bakıda həmişə çətin oynamışıq.

- Artıq aşağı pillələrdə yerləşən bəzi komandaların da çempionluq iddası artıb. Buna misal olaraq "Bakı"nı göstərmək olar...

- Hələ qış fasiləsindən əvvəl deyirdim ki, "Bakı" sona qədər mübarizə aparacaq. Nəticələr də onu göstərir ki, artıq "Bakı" da çempionluğa iddialıdır. Bizi çox gərgin sonluq gözləyir. Dörd dövrəli sistem çox maraqlı olur. Gördüyünüz kimi bu sistem öz effektini verir. Hər turda gərgin oyunların şahidi oluruq.

- Sıx qrafiklə oynamaq çətinlik yaratmır?

- Əlbəttə ki, çətindir. Ancaq bu qrafikə öyrəşmək lazımdır. Çünki nə qədər çox oyun olsa, çempionatımız daha çox inkişaf edər, daha çox maraqlı olar.

- Əsas rəqiblərinizdən olan "Qəbələ"ni 4, "Neftçi"ni isə 6 xal qabaqlamağınız sizə nə dərəcədə üstünlük verir?

- Düzdü, turnir cədvəlinə baxanda böyük üstünlük görünür. Ancaq üç xallıq sistemi və qarşıdakı oyunları nəzərə alsaq, bu elə də böyük üstünlük deyil. Qarşıda bizi böyük oyunlar gözləyir. İki tur ərzində bu fərq yox ola bilər. Qarşıda çətin səfər oyunlarımız var. "İnter", "Xəzər Lənkəran" və  "Neftçi" kimi rəqiblərlə iki dəfə qarşılaşacağıq.  Bunların hamısını nəzərə alanda əsas rəqiblərimizlə aramızda olan fərq elə də böyük deyil.

Ramiq AĞAMƏMMƏDOV