"Rəvan" və "Sumqayıt"dan başqa bütün klublarımız çempion ola bilər"

"İlk iki dövrənin oyunlarına nəzər saldıqda stabilllik görmədik. Ən stabil oynayan komanda 3-4 turda qalib gəlirdi, sonra xal itirirdi. Bu da ondan irəli gəlir ki, çempionat gərgin keçir. Yaxşı oyun nümayiş etdirib xalsız qalan komandalar da oldu".

Qol.Az saytına açıqlamasında bu sözləri "Turan"ın  sabiq baş məşqçisi Əfqan Talıbov deyib. O, komandaların qış fasiləsinə qədərki çıxışlarını qiymətləndirib. Qeyd edib ki, fasilədən sonra klublarımızın ifasında tam fərqli oyunların şahidi olacağıq:

"Sonuncu iki pillədə qərarlaşan "Rəvan" və "Sumqayıt" müəyyən səhvlər ucbatından yalnız uğursuzluğa düçar oldu. Ancaq digər 8 komandanın həm qələbələrini, həm də uğursuzluqlarının şahidi olduq. Çempionatın gedişatı onu göstərir ki, hələ ki, heç bir komanda digərlərindən çox da uzaqlaşa bilməyəcək. Qış fasiləsindən sonra isə komandaların oyunu baxımından fərqli mənzərə görə bilərik. Çempionatın sonuna yaxın tam başqa oyunlar izləyəcəyik. Hətta deyərdim ki, "Rəvan" və "Sumqayıt"dan  başqa bütün klublarımız çempion ola bilər. Üçüncü dövrə komandaların bir-birindən aralanma mərhələsi olacaq. Yəni mübarizə daha da kəskinləşəcək".

Veteran futbolçu  hakimlik və azarkeşlər haqda da fikirlərini bölüşüb: "Oyunların belə gərginləşdiyi bir məqamda təbii ki, hakimlər də heç nədən çəkinməməlidirlər. Üçüncü dövrədə hakimlərdən də çox şey asılı olacaq. Çünki, oyunlar daha gərgin, futbolçular daha emosional olacaq. Təbii ki, komandalar irəli çıxmağa çalışacaq. Arzu edirəm ki, bu maraqlı və gərgin çempionatın fonunda azarkeşləri də görək. Dünyanın hər yerində futbol azarkeşlər üçün oynanılır. Əfsuslar olsun ki, bizdə nəsə çatışmadığı üçün azarkeşləri stadionlara cəlb edə bilmirik. Ən yaxşı oyunlarda da kifayət qədər azarkeş görmürük. "Qarabağ" və "Neftçi" kimi komandalarımız meydanda mübarizə aparanda da baxırsan ki, onları izləyən azarkeşlər çox azdır. Əslind belə oyunlarda böyük azarkeş izdihamı olmalıdır. Bunun üçün isə komandalarımız bir qədər də baxımlı oynamalıdr. Təəssüf ki, xətlərarası əlaqə, baxımlı qollar, gözəl hücumlar sarıdan hələ ki, futbolumuzda kasadlıq var. Bu gün komandalar kimi futbolçular da stabil çıxış edə bilmir. Avropanın orta səviyyəli futbol ölkələrini izləyəndə şahidi oluruq ki, qol vuran ön xətt oyunçuları stabil olaraq fərqlənirlər. Ancaq bizdə belə deyil. Görürük ki, Reynaldo "Qarabağ"ın heyətində 1 oyunda qol vurur, digər oyunlarda bunu bacarmır. Buna başqa futbolçularımızı da misal gətirə bilərəm".

Ə.Talıbov qış fasiləsinə ilk "üçlük"də yollanan komandalar haqda ayrıca danışıb: "Məşqçilərdə belə bir deyim var: "Evdə xal itirmək olmaz". Təbii ki, öz meydanında xal itirməyən rəqib meydanından da xalla dönür. Bu mənada "Qəbələ"nin çıxışlarını qeyd edə bilərəm. "Qəbələ" ev oyunlarının əksəriyyətində qalib gəlib. "Qarabağ" və "Neftçi"yə gəldikdə isə görünür ki, bu komandaların oyunu səviyyə cəhətdən digərlərindən seçilir. "Neftçi" və "Qarabağ" daha gözəl, daha kombinasiyalı hücumlar qurur".

Ə.Talıbov sabiq komandası olan "Turan"ın  birinci diviziondakı çıxışlarını izlədiyini deyib. O qeyd edib ki, "Turan"ın durumunun yaxşı olmayacağı gözlənilən idi: "Belə bir misal var: yağışdan çıxdıq, yağmura düşdük. "Turan"da vəziyyət belədir. Ancaq  maliyyə durumu düzələn kimi həm "Turan"da, həm də "Kəpəz"də irəliləyiş olacaq. Çünki bu komandalarda həmişə aşağı yaş qruplarında yaxşı futbolçular olub. Məncə, bu komandaların maddi problemləri həll olunsa, keçmiş imiclərini qaytaracaqlar”.

Ə.Talıbov Berti Foqtsun Azərbaycan millisi ilə yeni müqavilə bağlamasına da münasibət bildirib: "Arzu edərdim ki, Foqtsa verilən vaxtdan düzgün və səmərəli istifadə edib nəticə qazansın. Foqtsun qarşısına Azərbaycana gələn gündən hədəf qoyulub. İndi məqsədə çatmağın vaxtıdır. Ona həddindən artıq yüksək səviyyədə şərait yaradılıb. İndi nəticəni ortaya qoymaq vaxtı çatıb".