Namiq Yusifov: "Rəvan"ı 5:0 hesabı ilə məğlub etməliydik"

"Qarabağ" klubunun yarımmüdafiəçisi Namiq Yusifovun Qol.Az saytına müsahibəsi

- Komandanız çempionatın autsayderlərindən olan "Rəvan"la bacarmadı. Qələbə qazana bilməməyinizi nə ilə əsaslandırmaq olar?

- "Rəvan"la qarşılaşmada son vaxtların ən yaxşı oyunlarından birini göstərdik. Sona qədər topa biz nəzarət etdik. Rəqib qapımıza cəmi bir zərbə endirə bilmişdi. Sadəcə olaraq son nöqtəni qoya bilmədik. Bunu bəxtsizliklə də bağlamaq olar. Həm də bizdə bir qədər soyuqqanlılıq çatmadı. Nəticədə oyundan qolsuz bərabərliklə ayrılmalı olduq..

- "Qarabağ"ı istəksiz olmaqda qınayanlar da var.

- Necə istəksiz ola bilərik? Hamımız qələbə üçün çalışırdıq. Rəqib müdafiədə oturmuşdu. Bunu da biz məcbur etmişdik. Sona qədər hücum ediriksə, rəqib də müdafiə olunmalı idi. "Rəvan"ın oyununu da alqışlamaq lazımdır ki, sona qədər döyüşdülər və bizdən bir xal aldılar.

- Millimizin oyunları ilə əlaqədar futbolçuların bir yerdə məşq edə bilməməsi dünənki oyunda özünü göstərdi?

- Əlbəttə, həmişə olduğu kimi bu dəfə də dediyiniz amil bizə təsirsiz ötüşmədi. Amma qələbə qazana biməməyimizi sırf bu məsələ ilə bağlamazdım. Çünki bir-birimizi anlamaqda çətinliyimiz olmadı. Rəqibin cərimə meydançasında futbolçularımız dəqiq ötürmələr verirdi.

- "Qarabağ" bu mövsüm 6 oyunda xal itirib. Onlardan dördü "Rəvan" və AZAL-la olub. Bu komandalara qarşı çətinliyiniz nədədir?

- Demək olmaz ki, həmin komandalarla pis oynayırıq. "Rəvan" və AZAL-la qarşılaşmalarda da digər oyunlarda olduğu kimi xeyli qol imkanları yaratmışıq. Sadəcə top qapıdan keçmək istəməyəndə keçmir. Heç bir komandaya qarşı çətinlik çəkmirik. "Rəvan" qapımıza cəmi bir zərbə endirirsə, hansı çətinlikdən danışmaq olar? Əslində dünənki oyunda "Rəvan"a 5:0 hesabı ilə qalib gəlməliydik. Oyuna baxanda da bunu şahidi ola bilərsiniz. İlk hissədə üç, ikinci hissədə isə iki yüzfaizli qol imkanın boşa verdik.

- Növbəti oyununuz "Simurq"ladır. Bu komanda "Qarabağ" üçün necə rəqibdir?

- "Simurq" asan rəqib deyil. Bilirik ki, yeni stadionlarında ilk oyunlarına çıxacaqlar. İndi Zaqatalada yaxşı ab-hava var. Buna görə də azarkeşlərini sevindirmək üçün əllərindən gələni edəcəklər. "Simurq" səfər oyunumuz həmişə çətin olub. Ümumiyyətlə çempionatda zəif rəqib yoxdur. Hər bir komanda ilə xal itirmək təhlükəsi var. Xüsusilə də bizə qarşı bütün komandalar ikiqat motivasiya olunurlar. Ona görə də boşalmalı deyilik.

- "Rəvan"la oyuna qədər bir neçə görüşdə səni meydanda gömədik.

- Daima məşqlərimi yüksək səviyyədə edirəm, formamı saxlayıram. Sadəcə olaraq bizim sistem belədir. İki dayaq yarımmüdafiəçisi ilə oynayanda mən də meydanda oluram. Həm də mövqeyimdə oynayan hər iki futbolçu 21 yaşlıdır. Reqlamentə əsasən mütləq onlardan birinə şans verilməlidir. Öz xahişimlə iki dəfə əvəzedici heyətin tərkibində oyuna çıxdım. Çünki formamı saxlamalıyam. Yaxşı formada olduğum üçün dünənki oyuna baş məşqçi mənə güvəndi. Həmişə üzərimdə işləyirəm ki, lazım olan anda meydana çıxıb komandama kömək edim.

Ramiq AĞAMƏMMƏDOV