“Yaxşı otellərdə qalırlar, yüksək maaş alırlar, ancaq..”

“Bakılı oğlanlar” Şən və Hazırcavablar Klubunun sabiq üzvü, rejissor, futbol azarkeşi Bəhram Bağırzadənin Qol.Az saytına müsahibəsi

- Artıq komandalarımız Avroliqada II təsnifat mərhələsinə adlayıb. Onların çıxışı haqda fikirlərinizi bilmək istərdik.

- Futbolumuzda irəliləyiş var. Bu, göz qabağındadır. Sadəcə,futbolçular öz üzərində işləməlidirlər.  Çünki onlar üçün çox böyük şərait yaradılıb. Yaxşı otellərdə qalırlar, yüksək maaş alırlar, ancaq bunun müqabilində oyun göstərmirlər.

- Hansı komandamıza azarkeşlik edirsiniz?

- Sabah Çempionlar Liqasının “Neftçi” – “Skenderbeu” oyununu canlı izləyəcəm. 1979-cu ildən bu komandaya azarkeşlik edirəm. “Neftçi” tərəfədən dəvət olunmuşam. Sabah tamaşaçılarla birlikdə “Neftçi”nin formasında komandama azarkeşlik edəcəm.

- Digər klublarımızdan hansınının oyununu bəyənirsiniz?

- Bütün komandalarımıza azarkeşlik edirəm. Ancaq uşaqlıqdan ürəyimə yatan flaqmanımızdır. Sonra “Qarabağ” gəlir. Çünki baş məşqçi Qurban Qurbanova çox böyük hörmətim var. Ona keçmiş futbolçu, məşqçi, mərd insan və vətənpərvər kimi rəğbətim var. Qurban Qurbanov çox güclü kollektiv yaradıb. Ona görə də düşünürəm ki, “Qarabağ” bu il yaxşı uğura imza atacaq.

- “Xəzər Lənkəran” və “İnter”in çıxışları haqda nə deyə bilərsiniz? Onlardan bu il yaxşı nəticə gözləmək olar?

- Təəssüflər olsun ki, “Xəzər Lənkəran” gözlənilən oyunu sərgiləyə bilmir. Bu komanda daha yaxşı oynaya bilərdi. Çünki komandaya çox böyük maliyyə ayrılıb. Bu qədər xərclənən pulların qarşılığında komanda lazım olan nəticəni qazana bilmir.

- “Xəzər Lənkəran”ın növbəti rəqibi İsrailin “Makkabi” (Hayfa) klubudur. Sizcə, təmsilçimiz bu rəqibi keçə bilər?

- “Makkabi” çox güclü komandadır. “Xəzər Lənkəran” üçün çox çətin olacaq. Çünki hazırda İsraildə hava həddindən artıq istidir. Həm də Hayfa şəhərində bu vaxtlar çox pis küləklər əsir. Mən İsrailin Hayfa şəhərində olmuşam. Bilirəm ki, futbolçularımız üçün çox çətin olacaq. Həm də nədənsə, İsrail komandalarına həmişə uduzuruq.

- Müsahibənizdə “İnter”in komanda olmadığını bildirmişdiniz.

- Bəli. Bu gün “İnter” komanda deyil. Vaxt gələcək komanda olacaq. Halbuki rəhbərlik çalışır ki, yaxşı heyət formalaşdırsın. Ancaq hələ komanda hiss olunmur.

- Hansı cəhətinə görə belə düşünürsünüz?

- Futbolçulara görə. Mən həmişə futbolda oyunçuları günahlandırıram. Çünki onlara hər cür imkan yaradılıb. Ancaq futbolçular peşəkar olmaq istəmirlər. Bu da onların problemidir. Həmişə demişəm ki, əgər biz KVN-çilərə vaxtı ilə belə şərait yaradılsaydı, hər il Moskvada çempion olardıq.

- Tanınmış insan kimi futbol azarkeşlərimizə çağırış edərək, onlara nə demək istəyirsiniz?

- Həmişə təmənnasız çağırışlar etmişəm. Ancaq söz vermişəm ki, bundan sonra çağırış etməyəcəyəm. Çünki bəzi futbolçular oyundan sonra bildirirlər ki, bizə belə azarkeş lazım deyil. Özümə gəldikdə isə, nə qədər, gücüm var, gedib, azarkeşlik edəcəyəm.

Ramiq AĞAMƏMMƏDOV