Fariz Məmmədov: “Hakimlər bəzi epizodlarda səhvlərə yol verdi”

“Qəbələ” idman klubunun boks bölməsinin rəhbəri, peşəkar boksçu Fariz Məmmədovun Qol.Az saytına müsahibəsi

- Bu yaxınlarda “Qəbələ” və “Fənərbaxça” klubları arasında boks üzrə yoldaşlıq oyunu keçirildi. Yarışın əsas təşəbbüsü kim tərəfindən oldu?

- Bizim “Fənərbaxça” klubu ilə sıx əməkdaşlığımız var. Qarşı tərəfdən bizə təklif olundu ki, dəvət etsəniz, gələrik. Bu yarışın  keçirilməsinin əsas  təsşəbbüsü Türkiyənin beynəlxalq dərəcəli hakimi Kibar Tatar idi. Biz də məmnuniyyətlə bu təklifi qəbul etdik.

- “Fənərbaxça” klubu yarışın təşkilatçılığından razı qaldı?

- Yarış Azərbaycanda ən yaxşı şoulardan biri oldu. “Qəbələ” İdman Klubu təşkilatçılığı adına layiq etmişdi. Hər şey istədiyimizdən də yaxşı oldu. Hər kəs yarışdan razı qaldığını bildirdi. Təşkilatçılıq mütəxəssislər tərəfindən yüksək qiymətləndirildi.

- Boksçuların çıxışı haqda nə deyə bilərsən?

- Gərək həmişə haqqı deyəsən. Hakimlər bəzi epizodlarda səhvlərə yol verdi. Deməzdim ki, böyük səhvlər etdilər. Hər bir insan səhv edə bilər. Ancaq mənim bir boksçu kimi razı olmadığım qərarlar oldu. Bizim boksçumuz Məhəmmədəli Tahirovun məğlubiyyəti ilə razı deyildim. 91 kiloda mübarizə aparan Məhəmmədəlinin 17 yaşı var. Rəqibinin isə 23 yaşı var idi və beşqat Avropa  çempionu idi. Buna baxmayaraq, Məhəmmədəli 29:28 hesabı ilə qalib olmuşdu. Amma daha bir boksçumuz Əhmədov Ramilin qalibiyyəti ilə də razı deyiləm. Həmin döyüşdə türk boksçu qalib gəlmişdi. Boksçumuz Rahil Məmmədlinin də qalibiyyəti ilə razı deyiləm. Həmin döyüşdə də əslində türkiyəli boksçu qalib gəlmişdi. Yəni əslində ümumi hesab 4:4 olmalı idi. Amma belə hakim səhvləri çox olur. Yoldaşlıq oyununda nəticə elə də önəmli deyil. “Qəbələ”nin tarixində indiyədək boks şousu olmayıb. Hakimlər də mətbuat konfransında dedi ki, hələ belə şou görməmişik. Bir şeyi də nəzərinizə çatdırım ki, “Fənərbaxça” Futbol Klubu 1907-ci ildə yaranıb. Ancaq “Qəbələ” Futbol Klubu 2005-ci ildə yaranıb. “Qəbələ” İdman Klubu isə cəmi beş aydır yaranıb. Klub olaraq beş ay ərzində bu nəticəni əldə etmişik. Buna görə də, boksçularımızdan razıyam. Onu da deyim ki, yığma komandamız gənclərdən ibarətdir. Ən yaşlı boksçumuz 60 kiloda yarışan Ruslan Alıyev idi.

- Rəqib boksçuların daha təcrübəli olduğunu bilirik.  Türkiyəli idmançılar çox güclü idi?

- Onların bokçuları həddindən artıq titullu idi. “Fənərbaça” klubu istər futbol, istərsə də başqa idman növlərində Türkiyədə bir nömrədir. Bizim dəvət etdiyimiz boksçuların da hamısı Türkiyənin bir nömrələri idi.

- Belə yarışların ardı olacaq? Ümumiyyətlə hansı yarışa hazırlaşırsınız?

-  Klub rəhbərliyi sag olsun ki, bütün istəklərimizi yerinə yetirir. Bizə çox gözəl şərait yaradılıb. Rəhbərlik tərəfindən qarşımıza plan qoyulub. Biz də bunun üzərində işləyirik. Əgər qısa bir zamanda iri addımlarla irəli gediriksə, “Fənərbaxça” kimi tanınmış klubla yarışırıqsa, hesab edirəm ki, gələcəkdə boksçularımız öz sözlərini Avropa oyunlarında və 2016-cı ildə Braziliyada keçiriləcək Yay Olimpiya Oyunlarında deyəcəklər.

- Komandaya yeni baş məşqçi gətirilib. Onun haqqında nə deyə bilərsiz?

- Hamı bilir ki, boksun vətəni Kubadır. Ən çox olimpiya çempionu məhz Kubadandır. Boks bölməsinin rəhbəri kimi kluba müraciət etdim ki, yaxşı baş məşqçiyə ehtiyacımız var. Rəhbərlik sağ olsun, istəyimizi həyata keçirdi və kubalı baş məşqçi Lazaro Martinez Ximenez komandaya gətirildi. Bu mütəxəssisin üç yetirməsi ayrı-ayrı vaxtlarda olimpiya çempionu olub. Onunla bir illik müqavilə imzaladıq. Başqa bir köməkçi məşqçi də gətirmişik. Bu, rusiyalı Umarov Ruslandır. Bundan başqa iki azərbaycanlı məşqçimiz var.

- Yeni baş məşqçi hansı uğurları vəd edir?

- Biz Lazaro ilə bir illik müqavilə bağlayanda nəzərə almışıq ki, o, özünü doğrultsa, klubda işinə davam edəcək. Ancaq özünü doğrulda bilməsə, artıq bizim onunla işimiz bitəcək. Lazaro klubla müqavilə bağlamamış boksçularımızla tanış oldu. Üç gün Qəbələdə qaldı. Məşqləri bizimlə birgə seyr etdi. Ondan sonra danışıqlara yekun vurduq və müqaviləni bağladıq. O özü də bildirib ki, boksçularda yüksək perspektiv görür və gələcəkdə yaxşı nailiyyətlər əldə edəcəyimizə söz verib. Mən özüm də boks bölməsinin rəhbəri olmağıma baxmayaraq, Lazaro ilə məşqlər edəcəyəm.

-  Dekabr ayında Almaniya çempionu ilə döyüşün olmalıdır. Bu döyüşə hazırlıqlar necə gedir?

- “Fənərbaxça” ilə yarış məni çox yordu. Üzərimə xeyli iş düşmüşdü. Bu, ilk işimiz idi. İndi də müqəddəs Ramazan ayı başlayıb. Allah qismət eləsin ki, bu ayda orucumuzu tutaq. Yarışa konkret hazırlığım sentyabr ayında başlayacağıq. Ancaq avqustun 5-də toplanışa gedəcəyəm. Əsas işimiz isə sentyabrın 15-dən dekabra qədər olacaq. Toplanışlar isə müxtəlif ölkələrdə olacaq.

- Başqa döyüş keçirməyi nəzərdə tutmusan?

- Düzü, bunu özüm istəmirəm. Hər şeyə peşəkar yanaşmaq lazımdır. Yarışda döyüşmək asandır. Ancaq ona hazırlaşmaq çox çətindir. Ola bilsin ki, Almaniya boksçusu ilə döyüşdən qabaq daha bir reytinq döyüş keçirdim.

Ramiq AĞAMƏMMƏDOV