Rəşad Sadıqov: “Biz 90 yox, 120 dəqiqəyə hazır olmalıyıq”

“Qarabağ” klubunun kapitanı Rəşad Sadıqovun Qol.Az saytına müsahibəsi

- Avroliqanın ilk təsnifat mərhələsində Makedoniyanın “Metallurq” klubuna səfərdə 1:0 hesabı ilə qalib gəldiyiniz oyunu necə dəyərləndirirsən?

- Oyun bizim üçün çətin keçdi. Birinci tur olduğu üçün istənilən səviyyədə hazırlaşa bilməmişdik. Milli komandadan gələn futbolçular komandaya gec qoşulmuşdu. Ona görə də bəzi çətinliklərimiz var idi. Oyunun iki gün əvvələ keçirilməsi isə problemlərimizi artırdı. Bu səbəbdən oyun bizim üçün ağır başladı. Xüsusilə də birinci hissə çətin oldu. Hücumlar etsək də, oyunumuz alınmırdı. İstədiyimiz kimi çıxış edə bilmirdik. Amma ikinci hissədə “Qarabağ”a yaraşan futbol nümayiş etdirdik və Allahın köməkliyi ilə qələbə qazandıq.

- İki illik fasilədən sonra “Qarabağ”ın Avroliqadakı çıxışını qənaətbəxş hesab etmək olar?

- Onu deyim ki, səfərdə qalib gəldik. Oyun günün isti vaxtında keçirildi. Qızmar günəşin altında oynadıq. Həm də xeyli fasilədən sonra ilk oyunumuz idi. Bütün bunları nəzərə alsaq, yaxşı oynadıq. Bir matçla “Qarabağ”ın oyununa qiymət vermək olmaz. Çünki ilk oyunda təbii olaraq müəyyən çatışmazlıqlar olur.

- Çoxları “Metallurq”un əvvəlki illərlə müqaisədə gücləndiyini deyir.

- Mən elə bir fərq görmədim. Sadəcə indi daha əzmkardırlar.

- Səfərdə hansı nəticəyə köklənmişdiniz?

- Biz nəticəni düşünmürdük. Çalışırdıq ki, qələbə qazanaq. Ancaq heç-heçə olsaydı da, bizim üçün pis nəticə olmayacaqdı.

- Hücum xəttində çıxış edən yeni futbolçu Nikolas Gelaşvili necə təsir bağışladı? Səncə, onun gəlişi “Qarabağ”da olan hücumçu problemini aradan qaldıra bilər?

- Gelaşvili yaxşı çıxış etdi. Belə görünür ki, tez bir zamanda komandaya fayda verəcək. Digər transferimiz Leroy Corc isə hələ ki, istənilən səviyyədə çıxış etmir. Çünki o, 45 gün istirahət edib. Ona görə də formasını yığmaq üçün bir az vaxt lazımdır. Corca nisbətən Gelaşvilini oyunlara hazır hesab etmək olar.

- “Qarabağ”la eyni vaxtda “Xəzər Lənkəran”da səfərdə meydana çıxdı və 1:1 hesablı nəticə ilə gerdi döndü (müsahibə Bakı “İnter”inin Finlandiya “Maryehamn”ı ilə oyununda əvvəl götürülüb – red.). “Xəzər Lənkəran”ın bu nəticəsi haqda nə deyə bilərsən?

- Məncə, “Xəzər Lənkəran”da sərfəli nəticə qazanıb. Çünki rəqib meydanında qol vurmaq uğurlu nəticədir. Bizi Avropada təmsil edən bütün komandalarımıza uğurlar arzulayıram. Nə qədər yaxşı nəticə qazansaq, reytinqimizin artmağı üçün yaxşıdır. Vaxtilə  Gürcüstan reytinq cədvəlində bizdən bir pillə yuxarı olduğu üçün kubok qazanan komandası Avroliqanın ikinci təsnifat mərhələsindən başlayırdı.   Biz də reytinqimizi artırmalıyıq ki, gələn il klublarımız ikinci turdan başlasın. Onda hazırlaşmağa da vaxtımız çox olar.

- Növbəti mərhələyə keçmək şansınızı necə görürsən?

- Cavab oyununda bizi doxsan dəqiqəlik çətin oyun gözləyir. Ola bilər 120 dəqiqə oynayaq. Ona görə də hər şeyə hazır olmalıyıq. Hər bir nəticə qeydə alına bilər. Çünki rəqib Bakıya hesabda geri durumda gələcək. Ona görə də daha çox hücum etməyə çalışacaqlar. Biz də diqqətli olub, sərfəli nəticə qazanmalıyıq. Kimin daha şanslı olduğunu deyə bilmərəm.

Ramiq AĞAMƏMMƏDOV