Avropalılar niyə futbolumuza biganədilər?

Artıq uzun illərdir UEFA-nın və FİFA-nın üzvü olmağımıza, Avropa və Dünya çempionatının seçmə mərhələsində iştirak etməyimizə baxmayaraq, nədənsə “köhnə qitə”də hələ də Azərbaycan futboluna biganə yanaşırlar. Qol.Az-ın araşdırmasına əsasən məlum olub ki, bir çox qabaqcıl idman portalları Azərbaycan futboluna barmaqrası baxırlar. Buna əmin olmaq üçün bir çox tanınmış portala daxil olmaq kifayətdir.
Ən məşhur portallardan biri olan və bütün dünyadakı matçları online şəkildə yayımlayan “futbol24” saytı deyəsən, son 1-2 ildə Azərbaycan futbolunda klubların adlarının dəyişdirilməsindən xəbərsizdir. Əgər belə olmasaydı, “futbol24”dən olan həmkarlarımız “Qəbələ”nin adını “Gilan”, “Muğan”ın adını isə “NBC Salyan” kimi göstərməzdilər. Bu klublarının adlarının dəyişdiriləməsinin üstündən 1 ildən də artıq vaxt keçsə də, onlar hələ də bu haqda məlumatsızdırlar.
Eyni sözləri “gamebookers” saytına da aid etmək olar. Bu sayt Azərbaycan premyer-liqasının oyunlarına pul qoyuluşları qəbul etdiyi halda, klubların adlarını dəqiq bilmir. Onlar da ölkəmizdə “Qəbələ” adlı klubun varlığından xəbərsizdirlər.
Digər bir maraqlı məqam ondan ibarətdir ki, “gamebookers” kontoru Azərbaycan premyer-liqasının oyunlarına pul qoyuluşları qəbul etsə də, bu heç də daimi olmur. Bəzən 2 həftə ərzində pul qoyuluşları qəbul olunan oyunlar arasında Azərbaycan premyer-liqasının qarşılaşmalarına rast gəlmək qeyri-mümkündür. Digər tərəfdən “gamebookers” bizim çempionatın oyunlarına pul qoyuluşları edənlər üçün limit qoyub. Bu saytda Azərbaycan premyer-liqasının hansısa oyununa 300 dollardan artıq pul qoymaq qeyri-mümkündür. Burada da təzad var. Düzdür, limit əksər oyunlar zamanı tətbiq olunur. Lakin digər ölkələrlə müqayisədə Azərbaycan premyer-liqasının oyunlarına pul qoyuluşları limiti çox aşağıdır. Məsəlçün Yunanıstan çempionatında autsayderlərin qarşılaşması zamanı maksimum pul qoyuluşu kimi 1150 dollar göstərilir. Amma Azərbaycan premyer-liqasında hətta liderlərin qarşılaşmasına belə, 300 dollardan çox pul qoymaq qeyri-mümkündür.
Almaniyanın məşhur “transfermarket” portalında isə vəziyyət daha acınacaqlıdır. İlk növbədə xatırladaq ki, bu sayt mütəmadi olaraq, bütün ölkələrin milli çempionatlarında çıxış edən futbolçuların transfer qiymətini açıqlayır. Bu sayt daxil olan hansısa əcnəbi düşünəcək ki, Azərbaycanda hələ də “MKT-Araz”, “Gənclərbirliyi”, “Gəncə” kimi klublar mövcuddur və onlar premyer-liqada mübarizə aparırlar. Bu klublar artıq bir neçə ildir ki, tarixin yaddaşına qovuşsalar da, almanlar hələ də bu klubların mövcud olduğunu yazır, hətta həmin klublarda çıxış edən futbolçuların transfer qiymətlərini də açıqlayırlar.
Digər tərəfdən də “transfermarket” portalında yer alan Azərbaycan premyer-liqasında çıxış edən futbolçuların əksərinin transfer qiyməti düzgün göstərilməyib. Təsəvvür edin ki, “İnter”in əsas heyətinə düşməyən hansısa futbolçunun transfer qiyməti 200 min dəyərində göstərildiyi halda, komandanın bombardiri, Azərbaycan premyer-liqasının ən sərrast futbolçusu olan Valter Quqlemonun transfer qiyməti cəmi 50 min dollar həcmində göstərilib. Bu isə təbii ki, həqiqəti əks etdirmir.
Bu cür misallar yetərincədir. Amma ümid edək ki, futbolumuz inkişaf etdikcə, avropalılar da futbolumuza biganə qalmayacaqlar.