“Nə qədər ki, futbolda futbol adamları işləməyəcək, nəticə belə olacaq”

Azərbaycan millisinin sabiq üzvü, veteran hücumçu Samir Ələkbərov Qol.Az saytına müsahibə verib.

- Samir, başlayaq millinin son oyunlarına münasibətindən...

- Düzü, millinin son oyunlarına baxmamışam deyə, bir söz deyə bilmərəm. Baxmadığım oyun haqqında nə danışım?

- Ən azından nəticəyə əsasən müəyyən fikir söyləmək olar. Məsələn, Andorra ilə heç-heçə oynadıq...

- Hə, nəticələr ürəkaçan olmadı.

- Səbəbini nədə görürsən, problem nədədir?

- Vallah, mən hardan bilim səbəb nədir, problem nədir? Bunun üçün həmin komandanın içində olmalısan. Millinin içində olmadığımdan, problemin nə olduğunu da deyə bilməyəcəm.

- Tək son iki oyunu nəzərdə tutmuruq, ümumiyyətlə, millinin digər oyunlarını da analiz etdikdə hansı  nəticəyə gəlirsən, fərqli nə isə görürsən?

- Fərqli nə görəcəm, heç nə.

- Sizin dövrdə nəticə olmayanda bunu başa düşmək olurdu ki, şərait, maliyə, məşq etməyə meydança yoxdur. İndi bütün bunların hamısı var, futbolçular yaxşı pul da alır amma, yenə nəticə yoxdur. Səncə,niyə?

- Burada şəraitlik heç nə yoxdur. Zəifik, qurtardı getdi. İnkişaf da yoxdur.

- Bu qədər maliyyənin qarşılığında niyə inkişaf olmasın?

- (bura qədər suallarımızı konkret cavablandıran, sanki danışmaqda o qədər də maraqlı olmayan Samir, get-gedə əsəbləşir). Bilirsən necədi, elə hamı çıxıb danışır. Danışmaq yox, iş görmək lazımdır. Amma bizdə danışan çoxdur, iş görən yoxdur. Özü də hamısı şablon-şablon, yalandan təriflər. Danışmaqdansa iş görmək, nəticə əldə etmək lazımdır.

- Sən özün uzun müddət “Xəzər Lənkəran”da çalışmısan, bu klubun içində olmusan. Niyə, bu klubun əsas komandası çempionluğa oynadığı halda, əvəzedici komandası həmişə sonuncu pilləni tutur?

- Ümumiyyətlə, əvəzedici heyət nə üçündür, bu çempionat niyə keçirilir səbəbini bilirsiniz?

- Məlum məsələdir ki, əsas komandaya layiqli ehtiyat qüvvə hazırlamaq, eyni zamanda milli üçün futbolçu yetişdirmək.

- Ay sağ ol. Elə isə nəticənin bura nə dəxli? Gedin araşdırın, lap UEFA-nın özündən maraqlanın, dünyanın heç bir yerində əvəzedici komandalar çempionluq uğurunda mübarizə aparmır. Başa düşürsünüz, əvəzedici komandanın məqsədi futbolçu yetişdirməkdirsə, o çempionluğa oynamamalıdır. Klub rəhbəri məşqçinin qabağına şərt qoymamalıdır ki,mütləq çempion ol. Lipalaşdırmanın qabağı alınmalıdır. Gürcüstanın U-17 millisinin çıxışından xəbəriniz var? Avropa çempionatında yarımfinala çıxıblar, Hollandiya ilə oynayacaqlar. İnkişaf budur. Biz neyləmişik? 17 yaşlılar arasında turnir keçirdirik deyirik futbolumuz inkişaf edir. Kimə lazımdı o inkişaf? Uşaq futbolunda nəticə lazım deyil, futbolçu yetişdirmək lazımdır. Bir daha təkrar edirəm, hara baxırsan televiziya, qəzet, hamı çıxıb danışır.

- Amma sizin kimi veteranlar, sabiq milli üzvləri də gərək çıxış yolu göstərə...

- Axı bunlar yol göstərmir, şablon şablon danışırlar, yalandan tərifləyirlər.
- Şəxsən sən, çıxış yolu nəyi göstərərdin?

- Dedim də uşaq futbolunu inkişaf etdirmək, yeni futbolçular yetişdirmək lazımdır. Ən əsası, peşəkar iş görülməlidir. Özünüz baxın, 4 klubumuz avrokuboklara çıxıb. Hansı nəzərəçarpacaq transfer ediblər? Hələ indi indi başlayıblar futbolçu axtarmağa. Belə olmaz e. Futbolçunu 1 il, 6 ay əvvəlldən axtarmağa başlamalısan.

- Yəni, problemin kökü burda durur...

- Bəli. Olanı deməlisən, kiməsə xoş gəlmək üçün yalandan tərif demək lazım deyil. Bir də futbolda futbol adamları işləməlidir. Nə qədər ki, futbolda futbol adamları işləməyəcək, nəticə də belə olacaq.


Anar XANLAROV