Ruslan Əmircanov: “Başqa klublardan təklif almışam”

“Neftçi” klubunun müdafiəçisi Ruslan Əmircanovun Qol.Az saytına müsahibəsi

- Unibank Premyer Liqanın 31-ci turunda səfərdə “Bakı”ya 0:2 hesabıyla uduzdunuz. Məğlubiyyətin səbəbini nədə görürsən?

- Komandanın əsas oyunçularından bir çoxu həmin qarşılaşmada meydana çıxmamışdı. Baş məşqçi onlara istirahət vermişdi.  “Bakı”yla oyunda daha çox gənc futbolçulara güvənmişdi. Məhz buna görə istədiyimiz oyunu göstərə bilmədik. Hardasa bu amil də məğlubiyyətimizdə öz təsirini götərmişdi.

- Sən də komanda yoldaşın Ruslan Abışov kimi baş məşqçidən meydana çıxmağı özün istəmisən?

- Baş məşqçi Böyükağa Hacıyev məndən oynamaq istəyib-istəmədimi soruşdu. Mən də bunu istədiyimi bildirdim və həmin qarşılaşmada iştirak etdim.

- Əsas heyətin bəzi futbolçuları istirahət etdiyi təqdirdə, meydan çıxmaq istəməyin nə ilə əlaqədar oldu?

- Mən bu yaxınlarda Azərbaycan milli komandasına dəvət almışam. Formamı saxlamaq üçün oyun praktikası mənə lazım idi. Həmçinin də oyundan-oyuna özümü düzəldərək, daha optimal forma yığmaq istəyirəm. Bu, mənə millidə özümü yaxşı tərəfdən göstərməyimə çox kömək olacaq. Məhz bu üzdən baş məşqçidən mənə istirahət verməməsini xahiş etdim.

-  “Bakı”yla kubokun finalında da qarşılaşacaqsınız. İki gün öncəki məğlubiyyətiniz komandanıza psixoloji təsir göstərə bilərmi?

- Buna inanmıram. Lakin bu məğlubiyyət bizə bir dərs oldu. Yəni, “Bakı” kimi güclü komandayla oyunda arxayınlaşmamaq və daha yaxşı motivasiya olmaq lazımdır. Yoxsa, finalda da məğlub ola bilərik. Çünki rəqibin heyətində elə futbolçular var ki, hər an oyunun taleyini dəyişə bilərlər.

- Finalda “Bakı”ya qalib gələrək qızıl dubl etmək şanslarınızı nə dərəcədə dəyərləndirirsən?

- Komandamızda hər bir futbolçu buna çox inanır. Belə baxanda, çempionat oyunlarında “Bakı”ya ən çox qalib gələn klub “Neftçi” oldu. Mənim fikrimcə, həmin qarşılaşmada bir dəqiqə belə arxayınlaşmadan sona kimi mübarizə aparsaq, qələbə qazanacağıq. İnanmıram ki, finala qədər gəlib çıxmışıqsa, “Bakı”ya məğlub olaraq kuboku əldən verək.

- “Bakı”nın heyətində kifayət qədər güclü futbolçular çıxış edir. Sənin üçün daha təhlükəlisinin adını deyə bilərsən?

- Son oyunlarda özünü yaxşı tərəfdən göstərən Deyvidas Çesnauskisi misal göstərə bilərəm. Eləcə də, çox təcrübəli Koke və Parks təhlükəli futbolçulardır. Bu cür səviyyəli futbolçularla mübarizədə çox diqqətli olmaq lazımdır. Parks çox güclü forvardır. Onunla mübarizənin yollarını fikirləşirəm. Düzdü, “Neftçi”də də elə səviyyəli futbolçular var ki, oyununu taleyini istənilən vaxt həll edə bilərlər.

- Movsümün sonunda “Neftçi”ylə müqavilənin müddəti başa çatır. Rəhbərlik tərəfindən yeni müqavilə təklif olunub?

- Azərbaycanlı futbolçularla klub ayrılmaq haqda düşünmür. Sadəcə, müqavilə məsələsini hələ danışmamışıq. Rəhbərliyə qalsa, hazirkı heyət üzvlərini saxlamaq istəyirlər. Çünki bu heyət dalbadal iki ildi çempion olur.  Ancaq kimi komandadan uzaqlaşdırmaq, kimi saxlmaq onların işidir. Mənə qarşı isə isti münasibətin olduğunu hiss edirəm.

- Sən özün necə, “Neftçi”də qalmaq istəyirsən?

- İkinci dövrədə demək olar ki, daim əsas heyətdə çıxış etməyim bəzi klubların mənə marağının artmasına səbəb oldu. Açığı, başqa klublardan təkliflər almışam. Sadəcə, mən hələ ki, “Neftçi”nin oyunçusuyam.

Əli HƏYATİ