Mircavadov: “Qarabağ” hələ iki il əvvəl çempion olmalıydı”

Azərbaycanın əməkdar məşqçisi Ağasəlim Mircavadovun Qol.Az saytına müsahibəsi

- Sizcə, “Neftçi” bu mövsüm çempionluğa layiq idi?

- İstər Azərbaycanda, istərsə də Avropada güclü klublar ilk öncə zəif komandalarla qarşılaşmalarda xal itirməməlidir. Hər bir ölkədə çempionluq uğrunda mübarizə aparan 4-5 klub olur. Həmin komandalar bir-biriylə qarşılaşmada maksimum xal toplamağı bacarmalıdır. Bu göstəriciyə görə, “Neftçi” bütün klubları üstələdi. Digər tərəfdən, “Neftçi 1-2 oyunu çıxmaq şərtiylə bütün görüşlərdə sabit çıxış etdi.  Bu amillər də çempionluğa gedən yolun bir nişanəsidir. Bu komandanın heyətində həm yerli, həm də səviyyəli legionerlər çıxış edir. Həmçinin baş məşqçi Böyükağa Hacıyev və məşqçilər korpusunun işi alqışlanmalıdır. Fikrimcə, “Neftçi” bu mövsüm çempionluğa layiq oynadı.

- “Qarabağ” “İnter” və “Xəzər Lənkəran” üçün növbəti tur çox əhəmiyyət daşıyır. İlk olaraq, “Qarabağ” - “İnter” oyununu dəyərləndirməyinizi istərdim.

- Adını sadaladığınız hər üç komandanın Avroliqaya vəsiqə qazanmaq şansı var. Bilirsiniz, hərdən elə oyunlar olur ki, proqnoz vermək çətinlik törədir. “Qarabağ” və “İnter”in avrokuboklarda oynamaq şansı öz əllərindədir. Əgər “Qarabağ” qalib gəlsə, “İnter”lə xal fərqini bərabərləşdirəcək və növbəti qarşılaşmada səfərdə “Xəzər Lənkəran”la ağır oyuna çıxacaq.  “İnter”i isə bu görüşdə heç-heçə də qane edir. Bir sözlə, hər iki turun mahiyyəti bu komandalar üçün çox yüksəkdir. “Qarabağ” və “İnter”dən fərqli olaraq, “Xəzər Lənkəran” “Qəbələ” üzərində qalib gəlsə, Avroliqaya vəsiqəni əldə edəcək.  Bu amil “Qarabağ”a da sərfəli ola bilər.

- Sizcə, Azərbaycanı Avropada daha layiqli təmsil edə biləcək klub “Qarabağ”, yoxsa, “İnter” ola bilər?

- Ümumiyyətlə, çempionat başlayan zaman bütün 12 komanda istəyir ki, Azərbaycanı Avroliqada təmsil etsin. Son illər Azərbaycanı Avropada “Qarabağ” komandası layiqincə təmsil etdi. Lakin bir şey yaddan çıxarmayın ki, “Qarabağ” Premyer Liqada sabit çıxış etmədi. Əslində “Qarabağ” hələ iki il əvvəl çempion olmalıydı. Çünki həmin dövrdə  komandanın pik vaxtı idi. Ümumiyyətlə, “Qarabağ”ın sabit heyətini, komandanın daha  çox yerli futbolçulardan təşkil olunmasını nəzər alsaq, Ağdam klubunun Avroliqaya çıxmasını arzulayıram.
Amma onların Avropa getməməsi faciə olmayacaq. Düzdü, avrokuboklara vəsiqə qazanmasa, bu, azarkeşlər və klub rəhbərliyini çox məyus edəcək. Bir şeyi də nəzərə almaq lazımdır ki, heç vaxt ola bilməz ki, bir komanda eyni heyət və məşqçiylə 10 il bir yerdə çalışsın və hər zaman ideal çıxış etsin. Çox vaxt ağır vəziyyətlər də olur. Sadəcə, bundan çıxmaq lazımdır.  İndiki vəziyyətdə “Qarabağ”ın vəziyyəti ağır olsa da, hər şey öz əllərindədir. Bunun üçün birləşərək layiqincə mübarizə aparmaq lazımdır.

- Ümumiyyətlə, Avrokuboklarda klublarımızdan bu il layiqli çıxış gözləməyə dəyər?

- Əvvəlcə onu deyim ki, biz layiqli deyəndə hər zaman 1-2 mərhələni nəzərdə tuturuq. Düzdü, qıraqdan demək, adama bir az asan gəlir. Mən bu işin içində olan bir məşqçi kimi çətinliyini yaxşı anlayıram. Ümumiyyətlə, Azərbaycan klubları avrokuboklarda oynamaq barədə yer tutandan sonra fikirləşirlər.  Ancaq mən deyərdim ki, bu yöndə azı qış dövründən işə başlamalıdırlar. Məsələn, hansı futbolçuları hansı mövqelərə almaq lazımdır. Həmin futbolçunun çıxışlarını öncədən izləməli, daha sonra onunla birbaşa müqavilə imzalanmalıdır. Avrokuboklarda uğur qazanmaq üçün ən azı 6 ay əvvəlcədən bu yöndə işlər aparılmalıdır.

Əli HƏYATİ