“Bizə tapşırıq verilib ki, Lənkəranda çempion olaq”

“Neftçi” klubunun yarımmüdafiəçisi Mirhüseyin Seyidovun Qol.Az saytına müsahibəsi

- Unibank Premyer Liqanın 28-ci turunda evdə “İnter”i qəbul edərək 2:1 hesabıyla qələbə qazandınız. Komandanın çıxışından razı qaldın?

- Deməzdim ki, həmin qarşılaşmada yaxşı oynadıq. Yaxşı oldu ki, ilk hissədə bizə qələbə gətirən qolları vurduq. Həmin qarşılaşmada bizə üç xal vacib olduğu üçün yaxşı oynamaq o qədər də əhəmiyyətli deyildi. Ən əsas qələbə qazanaraq nəticə əldə etmək idi. Şükürlər olsun ki, istəyimizə nail olduq.

- Erkən qollar vuraraq müdafiədə diqqətli oynamaq baş məşqçinin tapşırığından irəli gəlirdi, yoxsa?
 
- Onsuz da demək olar ki, bütün qarşılaşmalarda qolu daha erkən vurmağa çalışırıq. Çünki belə olan halda komanda öz oyununu taparaq daha yaxşı çıxış edir. “İnter”lə görüşdə elə oldu ki, rəqibin müdafiəçisi Vladimir Levin səhvə yol verdi və Bahadır Nəsimov bundan maksimum yararlanmağı bacardı. Deyərdim ki, planlı şəkildə həyata keçrilən qol deyildi. Lakin elə oldu ki, dah tez qol vurduq. Istənilən halda bizim üçün yaxşı oldu.

- Hesabda irəli olduqdan sonra “Neftçi” çox rahatlaşdı. Bu fikirlə razısan?

- 5-ci və 12–ci dəqiqələrdə iki qol vurduqdan sonra hardasa ehtiyatlı oynamağa üstünlük verdik. Çalışırdıq ki, bu üstünlüyü ikinci yarıyadək qoruyaq. Lakin deməzdim ki, ikinci hissədə sönük oynadıq. Sadəcə, bir az sakit oynamağa çalışırdıq. Yəni, nəticəni qorumaq istəyirdik. Hazırda elə bir vəziyyət yaranıb ki, xal itkisinə yol vermək istəmirik.

- Komanda yoldaşın Ruslan Abışov avtoqola imza atdıqdan sonra çox pis olmuşdu. Fasilədə onunla nə söhbət etdiniz?

- Bu avtoqoldan sonra Ruslan özü də məyus olmuşdu. Paltardəyişmə otağında uşaqlar və hətta məşqçilər heyəti də ona ürək-dirək verərək sakitləşdirməyə çalışırdıq. Onun yerində mən və ya istənilən futbolçu ola bilərdi. Olacaqdan qaçmaq olmaz. Ruslan da peşəkar futbolçu olduğu üçün bunun öhdəsindən gəldi. Meydana çıxaraq öz işini gördü.

- Hazırda “Neftçi” 60 xalla turnir cədvəlinə başçılıq edir və ən yaxın izləyicisi “Qarabağ”dan 10 xal irəlidədir. Artıq “Neftçi”nin çempion olacağını söyləyə bilərsən?

- Çempionluğun bir addımlığındayıq. Lakin istəməzdim ki, komandada arxayınçılq yaransın. Düzdü, bizə çempion olmağımız üçün irəlidəki qarşılaşmalardan cəmi üç xal lazımdır. Lakin biz istəsək, 4 oyundan 3 yox, 10 xal da götürə bilərik. Bircə komandada arxayınçılıq olmasın. Onda inanıram ki, çempionluğu təmin edəcəyik.

- Klubun prezidenti Sadıq Sadıqovun komandadan xüsusi istəyi olubmu?

- Onsuz da Sadıq Sadıqov hər zaman bizim yanımızdadır. Heç zaman bizə öz dəstəyini əsigəmir. Lakin tapşırıq olub ki, bu həftə Lənkəranla oyunda qalib gəlib çempionluğu orada qeyd edək. Bu, həm futbolçuların, həm də rəhbərliyin istəyidir. “Xəzər Lənkəran” bizim əzəli rəqibimiz olduğu üçün istəyirik ki, onlara səfərdə qalib gəlib çempionluğu qeyd edək.

- Çərşənbə günü Azərbaycan kubokunun 1/2 finalında “İnter”i qəbul edəcəsiniz. Bu oyun barədə nə deyərdin?

- “İnter”i “Neftçi” üçün ən güclü rəqiblərdən hesab edirəm. Bilirik ki, bu dəfə rəqib uduzmamaq üçün əlindən gələni edəcək. Bu mövsüm artıq onlarla beşinci görüşümüz olacaq. Deyərdim ki, onların oyun üslubunu, taktikasını yaxşı bilirik. Çalışmalıyıq ki, rəqibin meydanında 1-2 top fərqiylə qalib gəlib təkrar görüş üçün işimizi bir az asanlaşdıraq. Ancaq  hər şey 90  dəqiqənin sonunda bilinəcək.

- 1/4 final mərhələsinin “Kəpəz”lə oyununda qırmızı vərəqə aldığın üçün “İnter”lə qarşılaşmada komandanıza kömək edə bilməyəcəksən...

- Əlbəttə, bu amil mənim üçün çox üzücü oldu. Çox istəyirdim ki, yarım final görüşlərində iştirak edim. Lakin qismət olmadı. Meydanda olmasam da, stadionda uşaqların yanında olub onlara dəstək verəcəyəm.

- İlk oyunda ən pis halda hansı nəticənin komandan üçün sərfəli hesab edirsən?

- Heç-heçə. Qollu bərabərlik isə, daha yaxşı olar. Yəni çalışacağıq ki, yaxşı nəticəylə geri dönək.

Əli HƏYATİ