Georgi Adamiya: “Mən daha oradan dəvət gözləmirəm”

“Qarabağ” klubunun gürcüstanlı hücumçusu Georgi Adamiyanın Qol.Az-ın Türkiyəyə ezam olunmuş xüsusi müxbirinə müsahibəsi

- Komandanız artıq Antalyadadır. Bu hazırlıq prosesindən nə gözləyirsən?

- Təbii ki, yüksək səviyyədə məşqlər edəcəyimizi düşünürəm. Çempionatda bizi ağır oyunlar gözləyir. Buna görə də bütün gücümüzlə çalışmalıyıq.

- “Qarabağ”ın baş məşqçisi və bir sıra aparıcı oyunçuları hesab edir ki, çempion adını qazanmaq bundan sonra çox çətin olacaq. Sən bu fikirlə razısan?

- Şansımız cox azdır. Amma mümkün olmayan bir şey də yoxdur. Şəxsən, mən sona qədər komandamıza kömək edəcəyəm: oynasam da, oynamasam da. Mövsümün sonu isə necə olacağını görəcəyik.

- Yeri gəlmişkən, bu il hesabında çox az qol var. Halbuki sonunçu mövsümdə bombardir olmuşdun.

- Mən qarşıma ən məhsuldar oyunçu olmaq məqsədi qoymamışdım. Bu il də elə fikrim yoxdur. Sadəcə, ötən mövsüm komanda yoldaşlarım kömək etdilər, mən də qol vurdum. Mən birinci növbədə komandanın uğurunu düşünürəm, nəinki fərdi oyunumu.

- Yola saldığımız 2011-ci ili özün üçün necə qiymətləndirirsən?

- Pis olmadı. Amma düşünürəm ki, bundan da yaxşı ola bilərdi. Çempionatda ücüncü yeri tutduq, Avroliqada “pley-off”a yaxınlaşdıq, bayaq qeyd etdiyimiz kimi, Premyer Liqanın bombardiri oldum.

- Amma bütün bunlar ilin birinci yarısında oldu. Hətta Gürcüstan millisinə də dəvət aldın. Sonradan isə oyununda eniş başladı.

- Bəlkə də, bu, çoxlu “yüklənməyimizin” nəticəsiydi. Yayda Avropada oynadıq. 10 gün millinin düşərgəsində oldum. İstirahət etmək imkanım az idi.

- Deməli, tənqidləri qəbul edirsən?

- Düzü, mediada tənqidlərlə çox rastlaşmadım. Bəlkə də olub, amma mənim bundan xəbərim yoxdur. Mən hamıdan yaxşı bilirəm ki, bu mövsüm mənim üçün əvvəlki kimi olmadı.

- Millinin toplanışına çağırılsan da, sonra baş məşqçi səni komandada saxlamadı. Bunun səbəbini öyrənə bildin?

- Buna məşqçi qərar verir. Görünür, mən onun oyun sxeminə uyğun deyildim. Bunu normal qəbul edirəm.

- Bəs, bundan sonra millidən dəvət gözləyirsən?

- Yox. Cünki indi komandada gəncləşdirmə siyasəti gedir.

- Bir halda ki, söhbət Gürcüstan futbolundan düşdü, sənin Azərbaycanda fəaliyyət göstərən həmyerlilərinin də fəaliyyətinə toxunaq. Kaxaber Sxadadzenin “İnter”dəki fəaliyyətini necə qiymətləndirirsən?

- Mən bunu müzakirə edə bilmərəm. Çünki komandanın içində deyiləm. Amma əlbəttə, indi “İnter” yaxşı çıxış edir, çempionatın ən yaxşı komandalarındandır. Mövsümə pis başlasalar da, sonrada işləri yoluna düşdü.

- “İnter”dəki gürcülərlə şəxsi münasibətlərin nə yerdədir?

- Yaxşıdır. Bakıda olanda görüşürük də.

- Kaxaber Sxadazenin oğlu Baçananın oyunu haqda fikirlərin necədir?

- Son oyunlarda vacib qollar vurub və bu, məni sevindirməyə bilməz. İnanıram ki, bundan sonra öz oyununu daha da artıracaq.

- Yeri gəlmişkən, “İnter”də gürcü futbolçular az deyil. Sənə oradan dəvət olub?

- Bilirsiniz, klubuyla müqaviləsi bitən futbolçuya çox yerdən təklif ola bilər. Mənim isə “Qarabağ”la hələ yaya qədər müqaviləm var.

- “Qarabağ”da qalıb-qalmamaqla bağlı fikirlərin necədir?

- Hələ mövsüm başa çatsın... Əlbəttə, komandada qalmaq istəyirəm.

- Azərbaycanda oynadığın bu yeddi ildə məqsədinə nail olmusan?

- Mən yalnız futbolçu karyeramı bitirdikdən sonra bu suala cavab verə bilərəm.

- Yaxşı, onda sualı belə qoyaq: bəs, bundan sonra nəyə nail olmaq istəyirsən?

- İki dəfə çempionluq qazanmışam, kolleksiyamda iki gümüş və bir bürünc medal var. Bombardir olmuşam. Çatışmayan bir şey varsa, o da Azərbaycan kubokudur.

- Dəyəsən, axı, avrokubokların qrup mərhələsinə düşməmək yaddan çıxdı, axı...

- Bəli, bu da var. Hələ ora düşməmişik. Qismət olsa, bəlkə orda da oynadıq. Bundan sonra, əgər ciddi zədələnməsəm, daha iki il futbol oynamaq istəyirəm.