Zeynal Məmmədovdan sensasiyalı açıqlamalar

«BİZİMLƏ OYUNDAN SONRA ƏSGƏR ABDULLAYEV VƏ NOVRUZ ƏZİMOV «İNTER»İN NÜMAYƏNDƏSİLƏ BİR MAŞINDA GEDİBLƏR»
«ZÖHRAB QƏDİYEVİ HAKİMLİK ETMƏYƏ QOYMAYACAĞAM»

«Olimpik” - “Bakı” matçında baş verənlər gündəmi zəbt edib. Bu qarşılaşmada Mahir Şükürovun Fair-Play qaydalarını kobud surətdə pozmasından əlavə başqa bir məsələ də qabardılır. Söhbət “İnter”in “Olimpik”i pula stimğullaşdırmasından gedir. Yayılan məlumata görə, “bankirlər” “təyyarəçilərə” böyük məbləğdə - 100 min dollar pul təklif edərək əvəzində “Bakı”nın qarşısını kəsməyi tapşırıblar. Qeyd edək ki, bununla bağlı məlumat «Bakı»nın rəsmi saytında da yerləşdirilib.
Məsələ ilə bağlı Qol.Az-a verdiyi eksklüziv açıqlamada “Bakı”nın baş meneceri Zeynal Məmmədov baş verənlərə münasibət bildirib:

- Bu məsələdə üçüncü qüvvənin olduğu şübhəsizdir. «Olimpik» - «Bakı» oyununda baş verənləri anlamaq üçün nə alim olmaq lazımdır, nə də filosof. “Olimpik” üç aydır ki futbolçularına maaş verə bilmir. Nə deyim? Hər şey göz önündə idi. Burada bir məqsəd var idi ki, “Bakı” uduzmalıdır. Ona görə də Azərbaycan futbolu heç vaxt uğur qazana bilməyəcək. Nə qədər ki, belə çirkinliklər və ədalətsizliklər var, Avropada bizi qapazaltı edəcəklər.
Mahir Şükürovun yerinə olsam, futbolu ataram. Mən onun haqqında əlavə nəsə demək istəmirəm. Futbolçularımı da qınamıram. Şükürovun o utancverici hərəkətindən sonra stadionda özümə yer tapa bilmirdim. Elə vəziyyətdə futbolçular necə oynasınlar? Hələ yaxşı ki, özlərində güc tapıb oyunu başa çatdıra bildilər. Bunu da qoyuram bir kənara. Mənə təsir edən həm də hakimliyin səviyyəsi idi. Zöhrab Qədiyev da bir tərəfdən bizi pis günə qoydu. Mahir aşkar şəkildə bizim futbolçunu vurur, referi «sarı vərəqə» göstərir. «Sarı vərəqə» o deməkdir ki, Şükürov həqiqətən də qaydanı pozaraq rəqibini vurub. Rəqibi vurmaq birbaşa «qırmızı vərəqə» olduğu halda, niyə Zöhrab sarı vərəqə göstərir? Bunu da qoyuram bir qırağa. Nduka arxadan bizim futbolçunu kobudluqla vurur. Bu da birbaşa «qırmızı vərəqə» deməkdir. Amma Qədiyev yenə hər şeyə göz yumur. Əvəzində bizim oyunçu Muciri buna oxşa kobudluq edən kimi dərhal meydançadan qovulur. Daha bir epizodda Adamiyanı cərimə meydançası daxilində yıxırlar, amma yenə qayda pozuntusu qeydə alınmır. Tutaq ki, Mahir o hərəkəti elədi, “Olimpik”də qol vurdu. Hakim heç olmasa, fair play qaydalarını pozduğu üçün Mahirə «sarı vərəqə» göstərə bilməzdi? Deməyə sözüm yoxdur. Burada məqsəd birdir: “Bakı”nı çempionluqdan etmək. Dünənki oyunda da bir daha göstərdilər ki, “Bakı”nı yalnız bu cür udmaq olar. İnanın, “Olimpik”in heyətində oynayan “Bakı”nın sabiq futbolçuları matçdan sonra deyirdilər ki, biz “İnter”lə də oynamışıq, digər komandalarla da, amma “Bakı” hamısından güclüdür.
- Dediniz ki, “Bakı”nın çempionluğunu istəməyən qüvvələr var. Bu, AFFA-dakı qüvvələr ola bilərmi? Unutmayaq ki, Batistaya 6 oyunluq diskavlivikasiya cəzasını da məhz federasiya kəsmişdi.
- Yox, mən buna inanmıram. AFFA heç vaxt bunu etməz. Burada yalnız və yalnız üçüncü qüvvənin əli var və bu, gün kimi aydındır. Elə hakimi də təlimatlandırıb oyuna göndərən həmin qüvvədir.
- İctimaiyyət arasında həmin üçüncü qüvvənin “İnter” olduğu deyilir. Məlumata görə, “Olimpik”ə “Bakı”nı məğlub edəcəyi müqabilində böyük məbləğdə mükafatı da “İnter” qoyub. Belə çıxır ki, Qədiyev də məhz “bankirlər”in diqtəsi ilə sizə qarşı qərəzli oyun idarə edib?
- Bir də təkrar edirəm, bunu bilmək üçün filosof olmaq lazım deyil. “Olimpik”in pulu var? 3 aydır maaş almırlar. Demək məsələ aydındır da. Matç başa çatan kimi Əsgər Abdullayevlə Novruz Əzimov “İnter”in nümayəndəsi ilə maşına əyləşib stadiondan gedirlər. Daha hər şey aydındır da, özünüz fikirləşin.
- Qədiyevlə bağlı şikayət edəcəksiniz?
- Bəs necə? Şikayət mütləq olacaq. Bu qədər həngamə olmaz axı. O, artıq harınlayıb. Zöhrabı hakimlik etməyə qoymayacam. Biz bu qədər əziyyət çəkirik, komanda yaradırıq, kimsə gəlib bütün zəhmətimizi yerə vurur. Məsələnin maddi tərəfini qoyuram bir qırağa. İnsan nə qədər stress keçirir. Zöhrab, ümumiyyətlə, hakimlikdən getməlidir. Onun hakimlik etməyə ixtiyarı yoxdur.