Fərhad Vəliyev: “Həmin klubla həqiqətən danışıqlar aparırdım”

“Qarabağ” klubunun qapıçısı Fərhad Vəliyevin Qol.Az saytına müsahibəsi

- “Qarabağ”ın bu mövsüm üçün çıxışlarını necə dəyərləndirirsən?

- Yüksək səviyyədə çıxış etdiyimizi söyləmək olmaz. Məncə, hər şeyə rəğmən pis təsir bağışlamadıq. Ümumilikdə komandanın sərgilədiyi oyunu normal hesab edirəm. Lakin “altılıq” oyunlarında hələ gərgin mübarizələr olacaq. Çalışacağıq ki, bu il özümüzü yaxşı tərəfdən göstərərək, daha yüksək pillələrdə qərarlaşaq.

- “Qarabağ” qış fasiləsinə Premyer Liqanın dördüncüşü kimi yollandı. Bir təcrübəli qapıçı kimi həmkarın Boyan Pavloviçin çıxışlarını qənaətbəxş hesab edirsən?

- Pavloviç pis qapıçı deyil, komandaya gəlişindən sonra normal oyun nümayiş etdirir. Bütün qapıçılarda olduğu kimi, Pavloviçin də səhvləri oldu. Deməzdim ki, yüksək səviyyədə çıxış etdi. Ümumi götürəndə pis təsir bağışlamadı.

- “Altılıq” oyunlarında hər qazanılan xal qızıla bərabər olur. Baş məşqçiniz Qurban Qurbanov “altılıq”dakı qarşılaşmalarda sənə şans verəcəyini düşünürsən?

- Meydanda olmağım üçün əlimdən gələni edirəm. Məşqlərdə böyük səylə çalışıram. Ümüdimi itirməmişəm. Mən də özümü komandanın bir hissəsi oyunçusu sayıram. Peşakar futbolçu rəqabətə tap gətirməyi bacarmalıdır. İnanıram ki, baş məşqçimiz mənə şans verəcək. Birdə ki, futbolda hər şey olur. Allah eləməsin, sabah Pavloviç zədələnə bilər. Ona görə də, hər zaman meydana çıxmağa hazır olmalıyam. Heç bir futbolçu zədədən sığortalanmayıb. Məşqlərimi davam etdirərək ruhdan düşmürəm. İnşallah, Qurban müəllim mənə nə vaxt qapını qorumağı həvalə etsə, ehtimadını doğrultmaq üçün əlimdən gələni edəcəyəm.

- “Qarabağ”la müqavilənin müddəti mövsümün sonunda başa çatacaq. Başqa klubda oynamaq haqda düşünürsən?

- Əgər belə bir təklif olarsa, ilk əvvəl “Qarabağ” rəhbərliyi ilə danışıqlar aparacağam. Çünki neçə ildi, bu komandanın şərəfini qoruyuram. Digər tərəfdən,mənə təklif göndərən yerli iddialı və əcnəbi klublardan olarsa, masa arxasına oturub danışıqlar aparacam. Lakin bu, hələ gələcəyin planlarıdır. Hələ ki, məni “Qarabağ” düşündürür.

- Mətbuatda “Kəpəz” klubuna kecəcəyinlə bağlı xəbər yer almışdı. Bu, doğru idi?

- Bəli, “Kəpəz”lə danışıqlar aparmağım düz məlumat idi. Mirbağır İsayevin baş məşqçi təyin edildiyindən sonra Faiq Əzizov mənimlə əlaqə yaratdı. Faiq Əzizov “Kəpəz”in qapçılarla işləyən məşqçi vəzifəsini yerinə yetirirdi. Onunla danışığımızı normal qəbul etdim. Və bildirdim ki, “Qarabağ”ın rəhbərliyi ilə məsləhətləşdikdən sonra sizə son qərarımı deyəcəm. Elə oldu ki, Premyer Liqanın son turundan sonra ailəmlə birgə istirahət etmək üçün xarici ölkəyə yollandım. Qayıtdıqdan sonra eşitdim ki, “Kəpəz” çempionatda çıxışını dayandırıb.

- Ötən il sənin üçün uğursuz oldu. “Qarabağ”da və millidəki yerini itirdin. Nəticədə milliyə sən yox, “Sumqayıt Şəhər”in qapıçısı Popoviç dəvət aldı

- Bu mövsüm meydanda çox nadir hallarda görsəndim. Ancaq bu il çalışacağam ki, “Qarabağ”ın əsas heyətində çıxış edərək, milliyə dəvət alım. Azərbaycan yığmasının baş məşqçisi Berti Foqtsla milli barədə söhbətimiz olmuşdu. O, da mənim oynamağımı istəyirdi. Papoviçə gəlincə isə, daha gənc qapıçı olduğuna görə ona şans verildiyini düşünürəm. Millinin son iki yoldaşlıq oyunlarında əsas heyətdə yer alması,onun gələcək üçün hazırlandığını düşünməyə əsas verir. Lakin milli komandanın hazırda birnömrəli qapıçısı Kamran Ağayevi hesab edirəm. İndidən söhbət gedəndə Kamranı Popoviçdən çox üstün hesab edirəm.

Əli HƏYATİ