Rauf Əliyev: “İlk “3-lük”dən kənar qalmağımızın səbəbi qeyri-sabit oynamağımızdır”

Ötən turda öz meydançasında “Rəvan”ı 2:0 hesabıyla məğlub edən “Qarabağ” aktivinə çox mühüm 3 xal yazdı. Ancaq mövsümün əvvəllində itirilən xallar Ağdam klubuna qış fasiləsinə ilk “3-lük”də getməyə mane oldu. Bununla belə, liderlərlə aradakı xal fərqinin o qədər də çox olmadığını nəzərə alsaq, bunu aradan qaldırmaq mümkündür.

Qol.Az saytının müxbiri bu və digər məsələlərlə bağlı suallara cavab almaq üçün Ağdam klubunun hücumçusu Rauf Əliyevlə söhbətləşib. Millimizin hücumçusu son zamanlar fərqlənə bilməməsinə də aydınlıq gətirdi:

- Rauf, “Qəbələ” ilə oyunun hazırlığı necə gedir?

- Hazırlıq qaydasındadır. İlin son oyunu olacaq. Odur ki, yaxşı nəticə ilə geri dönmək istəyirik. Bununla belə bilirik ki, çox çətin oyun olacaq. Çünki rəqib də ilk “altılığ”a düşmək istəyir.

- Necə bir oyun gözləyirsən və rəqibi necə xarakterizə edərdin?

- Məşqçi dəyişikliyindən sonra “Qəbələ” daha yaxşı oynayır və daha yaxşı nəticələr qazanır. Ümumiyyətlə, çox yaxşı komandadır, heyətində Mendi, Cehua kimi sürətli, güclü, təcrübəli futbolçular var. Həm də qeyd etdiyim kimi, ilk “altılığ”a düşmək istədikləri üçün onlara da mütləq qələbə lazımdır.

- Daha öncəki oyunlara nəzər salsaq görərik ki, “Qarabağ” üçün Qəbələdə oynamaq həmişə çətin olub. Belə demək mümkünsə, bu komandaya qarşı səfərdə oyununuz o qədər də yaxşı alınmır. Bunun səbəbini nədə görürsən?

- Bilirsiniz, bu komanda evdə çox yaxşı oynayır. Tək bizə qarşı yox, digər iddialı komandalar üçün də Qəbələdən xal götürmək heç də asan olmur. Başqa bir səbəb görmürəm.

- “Rəvan”ı məğlub etməklə uğursuzluq zolağından çıxdığınızı demək olar?

- Hələ bunu demək çox çətindir. Çünki ard-arda 3-4 oyunda qalib gəlməmişik, cəmi bir oyunda qalib gəlmişik. Əgər “Qəbələ”ni də səfərdə məğlub etməyi bacarsaq, hardasa, qismən uğursuzluq zolağından çıxdığımızı söyləmək olar.

- Yeri gəlmişkən, “Qəbələ”nin meydançası təbii örtüklüdür və çox gözəl vəziyyətdədir. Nəzərə alsaq ki, “Qarabağ” da məhz texnikalı oyuna üstünlük verir, o zaman meydança amilini sizin üçün üstünlük saymaq olar?

- Təbii ki, daha baxımlı futbol oynamaq üçün meydançanın durumu da əsas şərtdi. Ot örtüyü yaxşı olanda futbol oynamaq adamın özünə də ləzzət edir. Bəli, “Qəbələ”nin yüksək səviyyədə bazası, meydançaları var. Bu mənada baxımlı və maraqlı oyun olacağını düşünürəm. Ümid edirəm ki, oyun günü hava şəraiti də yaxşı olacaq, yağış, qar olmayacaq və azarkeşlərin gözəl oyuna izləməsində problem yaşamayacaq.

- Gələk öz oyununla bağlı suallara. Son vaxtlar nədənsə fərqlənə bilmirsən. Bu durğunluğu nə ilə əlaqələndirərdin?

- 2-3 tur ehtiyatda qaldım, yəqin ki, bununla bağlı ola bilər. Düzdür, sonradan meydançaya çıxdığım anlar oldu. Amma start heyətində oynamaqla sonradan oyuna çıxmaq arasında çox fərq var. Məsələn, oyunun başa çatmasına 10-15 dəqiqə qalmış meydanaçaya daxil olanda uyğunlaşmağa vaxt az olur. İnanıram ki, növbəti oyunlarda yenə əvvəlki kimi oynayıb qollarımı vuracağam.

- “Qarabağ”ı təhlil edərkən çox maraqlı bir məqam ortaya çıxır. Əfranla Rauf eyni vaxtda qol vurmur. Əfranda susqunluq yaşananda Rauf qol vurur, Rauf da susqunluq yarananda Əfran işə düşür...
 
- (gülür). Yox, ikimiz də eyni vaxtda qol vurmuşuq, sadəcə bu, avrokuboklarda olub. Amma çempionatda düz deyirsiniz, eyni anda ikimizin də ayağının açıldığı vaxt olmayıb. Yəqin ki, bundan sonra o da olacaq və hər ikimiz eyni anda qollar vurarıq.

- Amma bunun üçün ikinizin də eyni anda meydançada olmağınız lazımdır...

- İnşallah, o da olar.

- Məlum məsələdir ki, Qəbələdən qələbə ilə dönsəniz də qış fasiləsinə ilk “üçlük”də yollana bilməyəcəksiniz. Səncə, buna nə mane oldu?
 
- Bunun səbəbi qeyri-sabit oynamağımızdır. Çünki vacib çox xallar itirdik. Bəzən hesabda öndə olduğumuz oyunu uduzduq, bəzən son dəqiqələrdə qapımızdan qol buraxıb xal itirdik. Məhz bu amillər yekunda turnir cədvəlindəki mövqeyimizə də öz təsirini göstərdi. Amma bununla belə, ruhdan düşmürük. Çünki aradakı fərq o qədər də əlçatmaz deyil və qış fasiləsindən sonra uğurlu oynamaqla həmin fərqi qapatmaq mümkündür.
 
- Sonda. Legioner həyatı yaşamaqla bağlı tez-tez gənc futbolçularımıza sual ünvanlayırıq. Bu məsələdə səndə hansısa yenilik, təkliflər yoxdur ki?

- Açığı təkliflər var. Sadəcə, mən istəyirəm ki, real təklif olsun. Görsəm ki, ciddi təklifdir, mənə görə komandadır, əlbəttə ki dəyərləndirəcəyəm. Bilirsiniz, istəyirəm ki, getdiyim komandada oynayım, yoxsa, bir müddət sonra qayıdıb geri gəlməyim. Çünki gedib oynaya bilməyəndə və qayıdıb geri gələndə adamın haqqında çox sözlər deyirlər. Bunlarla qarşılaşmamaq üçün gərək hər şeyi düzgün ölçüb biçəsən. 
 
- Seçimində maddi amil rol oynaya bilər?
 
- Yox, maddi amil rol oynamayacaq. Ola bilər ilk vaxtlar yüksək məvacib almayasan. Amma əgər sən özünü yaxşı tərəfdən göstərəcəksənsə və qabağa gedəcəksənsə, o zaman pul özü gələcək. Mən ilk növbədə oyunu düşünürəm. Əsas odur ki, istədiyim komanda olsun, gedib orda itib-batmayım. Əgər itib batacağım kluba gedirəmsə, elə qalıb “Qarabağ”da oynayaram da.