«Durub hakimləri dar ağacına çəkək ki, niyə səhv qərar vermisən?»

Bakının “İnter” klubunun yarımmüdafiəçisi Nizami Hacıyev Unibank Premyer Liqasında keçirdikləri oyunlarla bağlı Qol.Az-ın suallarını cavablandırıb

- “İnter” AZAL-la oyunda 1:1 hesabıyla bərabərə qaldı. Ümumiyyətlə, son iki turda qələbə qazana bilməməyinizin səbəbi nədir?

- AZAL-la matçın ilk 15 dəqiqəsi gərgin keçdi. Həmin vaxt ərzində komanda öz oyununu tapa bilmirdi. Bunun nəticəsi kimi qapımızda qol da gördük. Ancaq bundan sonra tədricən özümüzə gəlib yaxşı oyun nümayiş etdirdik. Baş məşqçimiz də göstərdiyimiz oyundan razı qaldığını bildirdi. Sadəcə, yaratdığımız bir neçə qol epizodundan istifadə edə bilmədik.
Axır iki turda qalib gələ bilməməyimizi yaratdığımız qol epizodlarını gerçəkləşdirə bilməməyimizdə görürəm. Oyunda üstünlük bizim tərəfimizdə olsa da, çox qol vurmaq üçün real imkanlar əldə etsək də, istədiyimiz nəticəni qazana bilmirik. Bunu bütün qarşılaşmalara şamil etməzdim. Yalnız son iki görüşdəki nəticələri nəzərdə tuturam. Lakin, komanda ümumilikdə yaxşı təsir bağışlayır və adına layiq oyun göstərir. Çalışacağıq ki, növbəti oyunlarda bu çatışmamazlıqları aradan qaldıraq.

- Səncə, “Qarabağ” və AZAL-la son görüşlərdə komandanız bir xal qazandı, yoxsa iki xal itirdi?

- Fikrimcə, hər oyunda iki xal itirib dörd xalı əldən verdik. Əgər belə olmasaydı, indi turnir cədvəlinə başçılıq edirdik. Çempionatda həddindən artıq güclü rəqabət gedir. Bu da Premyer Liqa oyunlarının maraqlı keçməsindən xəbər verir. Bir-iki nüans var ki, onu aradan qaldıra bilsək, “İnter” çempion olacaq. Ancaq, dediklərim o məsələlər klubumuzla bağlı deyil.

- Bəs, kiminlə bağlıdır?

- Bu haqda danışmaq istəmirəm.

- AZAL “İnter”lə qarşılaşmada stadionun projektorunda texniki nasazlıq olduğunu, bunun da futbolçuların görməsinə təsir etdiyini bildirib.

- Bu məsələni şişirtməyə ehtiyac yoxdu. Sadəcə, bir neçə saniyə projektorun işıqlarında biri söndü. Gərək, AZAL oyunu udmadığına görə belə xırda məsələləri qabartmaya. Ona qalsa, mən iki dəfə təkbətək çıxdım, amma ofsayd olmadığı halda, yan hakimi bayrağı qaldırdı. Həmin görüşün videoyazısını düz beş dəfə izlədik. Bir daha əmin olduq ki, ofsayd olmayıb. Hər şey açıq-aydın görünürdü. Hətta 90 yaşlı qoca kişi də o epizodda ofsayd olmadığını görərdi. Onda biz neyləyək? Durub hakimləri dar ağacına çəkək ki, niyə səhv qərar vermisən? Futbolda belə səhvlərdən heç kəs sığortalanmayıb. İşıq 1-2 saniyədə saniyədə yanıb-söndü. Bəs qalan əlli dəqiqədə niyə qol vura bilmədilər?
Hesab edirəm ki, AZAL bu qarşılaşmada bir xal qazandı, nəinki iki xal itirdi. Onlar elə bir xal üçün oynayırdılar. Bunu açıq-aydın görmək olurdu. Biz ikinci hissənin 43 dəqiqəsini hücumda keçirdik. İşığın yanıb-sönməsini problem etmək düzgün deyil.

- Çempionatda növbəti rəqibiniz evdə yaxşı təsir bağışlayan “Xəzər Lənkəran” olacaq. Həmin görüşdə “İnter”in şanslarını necə qiymətləndirirsən?

- “Xəzər Lənkəran” bizim ən çətin rəqiblərimizdən biridir. Ona görə də onlarla oyuna daha ciddi hazırlaşırıq. Bir şey deyə bilərəm ki, “İnter” hər hər bir komandayala nəinki 90, 180 dəqiqə də oynamağa hazırdı. Zənimcə, “İnter” hazırda çempionatda ən formada olan klublardan biridir. Bizdə fiziki cəhətdən heç bir problem yoxdur.

Əli HƏYATİ