Qara Qarayev: “Qarabağ” “Nefçi”yə qarşı kinli deyil”

“Qarabağ”ın müdafiəçisi Qara Qarayevin Qol.Az saytına müsahibəsi

- Bu həftə komandanız Quzanlıda “Neftçi”ni qəbul edəcək. Birinci dövrədəki ilk oyunda komandanız hesabda irəlidə olsa da, sonda 2:3 hesabıyla uduzdu. Yeri gəlmişkən, «Qarabağ»ın qapısına iki qol sən oyuna daxil olduqdan sonra vuruldu.

- Həmin görüşdən öncə zədələndiyim üçün oyunlarda iştirak etmirdim. Ancaq deməzdim ki, «Neftçi» ilə qarşılaşmada çox pis təsir bağışladım. Sadəcə, oyuna daxil olduqdan sonra hesab tez bir zamanda dəyişdi. Həm də oyunçu dəyişikliyinin bəzən mənfi nəticələri də olur.

- Baş məşqçiniz Qurban Qurbanovun zədədən sonra səni belə çətin matçda meydana buraxması nə dərəcə doğruydu?

- Qurban müəllim mənə hər zaman inanıb. Bu mənada, onun məni hər an meydana ata biləcəyini gözləyirdim. Oyundan öncə məşq zamanı məndən hazır olub-olmadığımı soruşdu. Dedim ki, hazıram, oynaya bilərəm.

- Səni meydana buraxdığı üçün Qurban Qurbanovu mətbuatda tənqid etdilər.

- “Neftçi”yə məğlubiyyətə görə məni və Qurban müəllimi günahkar çıxarmaq doğru deyil. Əvvəla, qapımıza qollar mənim səhvim ucbatından vurulmadı. Meydana çıxdığım bütün oyunlarda hər zaman cənfaşanlıq göstərirəm. Qarşılaşmanın sonunda  nəticənin belə alınması əlbəttə nəinki məni, bütün komandanı üzdü. Mənim yerimə başqa futbolçu meydana çıxsaydı, bəlkə o da eyni aqibətlə üzləşəcəkdi. Yəqin qismət belə imiş.

- Komandanızın “Neftçi”yə məğlubiyyətinin səbəbini nədə görürsən?

- Məncə, uğursuzluğa birinci növbədə baş məşqçinin verdiyi tapşırıqları yerinə yetirə bilməməyimiz səbəb oldu. Digər tərəfdən, məğlub olduğumuz rəqib zəif komanda deyil axı, ölkə çempionudur.

- Qurban Qurbanovun sənə görə qınaq obtektinə çevrilməsinə baxmayaraq “Bakı” ilə növbəti oyunda yenidən sənə şans verdi. Özü də əsas heyətdə.

- Qurban müəllimin böyüklüyü ondadır ki, yerli futbolçuların yetişməsi üçün əlindən gələni edir. Heç nəyə baxmadan məni psixoloji təsir altına düşməyə imkan vermədi. “Qarabağ”ın Avroliqa oyunlarında da mənə həddindən artıq güvəndi.  “Bakı”la qarşılaşmada artıq oyun praktikası toplamışdım. Qurban müəllim də məndə bunu gördüyünə görə əsas heyətə daxil etdi. Həmin oyunda bütün gücümü ortaya qoydum. Məncə, hər şey uğurlu alındı ki, komandamız da qələbə qazandı.

- “İnter”lə son oyunda qələbə qazanmalı olduğunuz halda, bir xalla kifayətlənməli oldunuz. Komandanızın qeyri-sabit çıxışını nə ilə əlaqələndirirsən?

- Bunu uğursuzluq kimi qiymətləndirmək düzgün olmazdı.Yadınıza salın, “Qarabağ” keçən mövsüm də belə problem yaşamışdı. Lakin sonradan çətinliyi aradan qaldıraraq, tədricən özünə gəlməyə başladı. Çoxları deyir ki, komanda əzəmətini itirib. Əsla belə deyil. Eyni komanda və eyni futbolçulardı. Sadəcə, bir qədər uğursuzluq zolağına düşmüşük. Digər tərəfdən, heyətimizin bir çox üzvü milli komandanın düşərgəsindən çox yorğun halda geri dönür. Hazırlaşmaq üçün demək olar ki, vaxt qalmır.  Bunun da oyunumuza mənfi təsiri qaçılmazdı.

- Qarşıdan gələn “Neftçi”ilə oyuna komandanızın revanş almaq üçün çıxacağını söyləmək olar?

- Komandamız Quzanlıda, döğma meydanda sadiq azarkeşləri qarşısında oynayacaq. Həmin oyunda revanş alacağımızı düşünürəm. Məncə, bunu azarkeşlərimiz də səbirsizliklə gözləyir. Unutmaq lazım deyil ki, çempionatda məğlubedilməz komanda yoxdur. Bir şeyi də, qeyd etmək istərdim ki, komanda “Neftçi” ilə oyuna qələbə əzmiylə çıxacaq. Rəqibə qarşı heç bir kindən söhbət belə gedə bilməz. İnanıram ki, Quzanlıda qaələbə qazanaraq, azarkeşlərə sevitc bəxş edəcəyik.

Əli HƏYATİ