Pavel Doroşevs: “Mən hələ belə hakim görməmişdim”

“Qəbələ” klubunun qapıçısı Pavel Doroşevsin Qol.Az saytına müsahibəsi

- Uğursuz çıxışlardan sonra “Qəbələ” dünən doğma meydanda ”Neftçi” üzərində qələbə qazandı. İlk əvvəl bu oyunla bağlı fikirlərini öyrənmək istəyirik.

- Son çempionla oyunun gərgin keçəcəyini əvvəlcədən yaxşı bilirdik. Deyim ki, qələbə bizə çox çətin başa gəldi. Belə rəqiblə qarşılaşmada  qabaqcadan arxayınlaşmaq bizə problem yarada bilərdi.  Özünüz də şahid oldunuz elə epizodlar oldu ki, həm biz, həm də rəqib bir neçə dəfə fərqlənə bilərdi. Ümumiyyətlə, Azərbaycan çempionatının oyunları haqda qabaqcadan dəqiq proqnoz vermək olmur. Məsələn, çoxları “Xəzər Lənkəran”ın evdə “Rəvan”a qalib gələcəyini gözləsə də, oyun 1:1 hesabı ilə yekunlaşdı. Və ya başqa bir misal. Özünün yaxşı günlərini yaşamayan, AZAL gözlənilmədən “Qəbələ”yə 3:0 hesabı ilə qalib gəldi. Bir sözlə, bu mövsüm çempionatda zəif komanda yoxdur.

- Toni Adams vəzifəsini tərk etdikdən sonra onun yerinə Fatih Kavlak gətirildi. Kavlakın fəaliyyəti haqda nə söyləyə bilərsən?

- Mən deyərdim ki, Fatih Kavlak insan və məşqçi kimi çox gözəl keyfiyyətlərə malikdir. Öz adımdan deyə bilərəm ki, onun bu vəzifədə qalmasını çox istəyirəm. Onunla mən düz 1,5 ildi ki, bir yerdə çalışıram. Bu müddət ərzində  Kavlak özünü peşəkar kimi göstərməyi bacarıb.

- Sən dünənki oyunun qəhrəmanlarındansan. Axı, oyunun son dəqiqəsində penaltini dəf edə bildin.

- Son zamanlar komandamızın qeyri- sabit çıxış etməsi heç kimə sirr deyildi. Çox əcaib oyun nümayiş etdirirdik. Komandanı uğursuzluq zolağından çıxarmaq üçün nəsə etmək lazım idi. “Qəbələ”də gərginlik pik nöqtəsinə çatmışdı. Keçən mövsümün ən yaxşı qapıçılarından olsam da, son zamanlar özümə inamı itirmişdim. Dünənki matçöncəsi baş məşqçi Fatih Kavlakla söhbətimizdən sonra özünəinamı daha çox hiss etməyə başladım. Düşünürəm ki, elə bu üzdən “Neftçi” ilə son qarşılaşmada özümü yaxşı tərəfdən göstərməyi bacardım.

- Yeri gəlmişkən, hakimin penalti qərarının yanlış olduğu deyilir. Sən bu haqda nə söyləyə bilərsən?

- Bəli, həqiqətən də, bu qərar tamamilə yanlış idi. Oyunun videoyazısını izləyərkən, hakimin verdiyi qərara dayanmadan gülmüşəm.  Açıq-aşkar görünür ki, rəqib futbolçu özünə təmas olmadan yerə atdı. Hakim isə bunu gözləyirmiş kimi dərhal penalti nöqtəsini göstərdi. Hər kəs gördü ki, baş hakim Ramin Diniyev yanlış qərar verdi. Ona görə də oyun başa çatan kimi azarkeşlər hisslərinə hakim ola bilməyib meydançaya axışdılar.

Hesab edirəm ki, penalti vermək istəyən hakim daha inandırıcı varianta əl atmalıdır. “Qarabağ”la oyunun son dəqiqəsində də qapımıza penalti təyin edildi. Amma bu qərara bizdən heç kəz etiraz etmədi. Doğrudan da, həmin epizodda qayda pozuntusu var idi. Hakimi “Neftçi” ilə oyunda qayda pozuntusu kimi qeydə aldığı yerdən hardasa 4-5 metr məsafə ayırırdı. Mən futbolçu karyeramda hələ belə rüsvayçı qərar çıxaran hakim görməmişdim. Bu sözlərlə rəqib komandanın gözəl oyununa kölgə salmaq fikrindən uzağam. Doğrudan da, “Neftçi” həmin gün özünün ən gözəl oyunlarından birini keçirdi. Onların yaxşı komanda olduqları “Xəzər Lənkəran”ı 5:0 hesabı ilə udduqları oyunda bir daha sübut olundu. Sadəcə, hakimlərin oyun belə idarə etməsi futbolunuza zərbədən başqa bir şey deyil. Mən Hakimlər Komitəsindən çox xahiş edərdim ki, belə halların təkrarlanmasının qarşısını alsın. Məncə, dünən hakim futbolçuları və azarkeşləri təxribata  çəkirdi.

Əli HƏYATİ