Millimizin üzvü: "Onlara görə çox həyəcan keçirirəm"

19 yaşadək futbolçulardan ibarət milli komandamızın üzvü Şamil Qurbanov şərəfini qoruduğu Rusiyanın “Volqa” klubunun rəsmi saytına müsahibə verib. Qol.Az-ın məlumatına görə, gənc futbolçu Latviyada təşkil olunan təlim-məşq toplanışını dəyərləndirib.

- Gündə iki dəfə olmaqla, məşq edirik. İlk iki gündə tullanmaq və qaçış hərəkətləri ilə məşğul olduq. Məşqçilər komandanın fiziki hazırlığını dəyərləndirirdilər. Sonra yüklənmə bir qədər azaldı. İndi məşqlərdə daha çox oyun hərəkətlərinə üstünlük verilir. Taktiki hərəkətlər üzrə məşqlərə daha çox diqqət yetiririk.

- Yoxlama oyunu keçdiyiniz təlim-məşq toplanışına hansı qiyməti verdi?

- Oyun gərgin, demək olar ki, sərt alındı. Heç kim məğlub olmaq istəmirdi. Rəqib sanballı idi. Ancaq onları Rusiyanın gənclərdən ibarət komandaları ilə müqayisə etsək, Latviya çempionatının səviyyəsi bizdən aşağıdır. Azərbaycan yığmasının oyununa gəlincə, hələ də bir-birimizi tam başa düşmürük. Ancaq düşünürəm ki, bu, tezliklə bizdə alınacaq. Çünki komandamızda potensial var.

- Yoxlama oyununda hansı mövqedə çıxış etdiniz?

- Baş məşqçi məni yarımmüdafiənin sol cinahında oynatmaq istədi. Oyuna iki heyətlə çıxdıq. Mən ilk hissədə oynadım. Bacardığım qədər çalışdım və məhsuldar ötürmə verməyə nail oldum. Məşqçi məndən razı qaldı. Növbəti oyunlarda meydana hansı mövqedə çıxacağımı dəqiq deyə bilmərəm. Ola bilər ki, yenidən yarımmüdafiənin sol cinahında çıxış edim.

- Yığmada ilk yay təəssüratları ilə müqayisədə özünüzə münasibətdə hansısa dəyişiklik hiss etdinizmi?

- Yəqin ki, hə. Burada zəif futbolçuya yer yoxdur. Nəyi bacardığını göstərmək lazımdır. Bir də ki, yığmada təkcə özümü yox, məni bura düşməyə hazırlayanları təmsil edirəm. O cümlədən məşqçimiz Maqomed Adiyevə görə oynayıram. Mən onun sayəsində ilk dövrə ilə müqayisədə meydanda daha yaxşı görünürəm. Necə oynamağımdan asılı olaraq, “Volqa” və bizim çempionat haqda təsəvvür yaranacaq. Mən heç kimi pis vəziyyətdə qoymayıb, yaxşı futbol göstərməyə çalışacağam. Dəyişiklər haqda bir də onu deyə bilərəm ki, Azərbaycan komandasından futbolçuları daha yaxşı tanıdım, artıq onların adlarını demək olar səhv salmıram.

- Hazırlıq prosesində vəziyyət necədir?

- Riqada yaşayırıq. Boş vaxtlarımızda hərdən şəhəri gəzməyə çıxırıq. Şərait çox yaxşıdır. Açığı, çoxdandır belə keyfiyyətli meydançalar görməmişdim. İndi özümü yaxşı hiss edirəm, komandamız əladır. Yığma tam heyətlə qarşıdakı oyunlara ciddi hazırlaşır. Avropa çempionatının seçmə mərhələsinin startını səbirsizliklə gözləyirik.

- “Volqa”nın gənclər komandasının çıxışını izləyirsiniz?

- Əlbəttə. Mən onlara görə çox həyəcan keçirirəm. “Amkar” üzərində qazandığımız qələbəyə görə çox şad oldum. Həm futbolçuları, həm də baş məşqçimi təbrik etdim. Biz onlarla tez-tez yazışırıq. Açığı, komanda üçün çox darıxmışam.

- Yığmada qarşıdakı planınız necədir?

- İndi isveçlilərin oyununu təhlil edəcəyik. Bu, seçmə mərhələdə ilk rəqibimizdir və bu oyuna hazırlaşacağıq. Oktyabrın 5-də Stokholma yollanırıq, ertəsi meydan sahibləri ilə oyunumuz var. Seçmə mərhələdə digər rəqiblərimiz İtaliya və Rumıniya yığmalarıdır. Fikrimcə, Avropa çempionatının növbəti seçmə mərhələsinə çıxmaq uğrunda mübarizə apara bilərik.