İsgəndər Cavadov: «Lomaya bilərəkdən kobudluq etmədi»

Azərbaycanın veteran futbolçusu İsgəndər Cavadov Premyer Liqanının üçüncü turunda yaşanan qalmaqalla bağlı Qol.Az saytının suallarını cavablandırıb.

- Çempionatın geridə qalan üç turu daha çox qalmaqallarla yadda qaldı. Baş verənlərə sizin münasibətinizi bilmək istərdik.

- Baxmayaraq ki, Azərbaycan çempionatı bir neçə turdu başlayıb, çox aşağı səviyyədə davam edir. Çempionatda yaxşı oyunlarla yanaşı, gərək, nizam-intizam qaydalara da yüksək səviyyədə olsun. Onsuz da bir çox futbolçumuz özlərini meydanda necə aparmaq qaydasını bilmir. Çox güman ki, bu da onların peşakarlığının çatışmamasından irəli gəlir.

- Sizcə, “İnter”-“Bakı”görüşündə meydan sahiblərinin qapçısı Georgi Lomayanın çıxışda rəqib futbolçuya qarşı etdiyi hərəkət qırmızı vərəqə və penaltiyə layiq idi?

- Mən deyərdim ki, Lomaya həmin epizodda bilərəkdən rəqib futbolçuya kobudluq etmədi. Bu kimi topa sıçrayışlar qapıçıların xüsisiyyətidir. Onlar topa çıxan zaman ayaqları ilə özlərini sığortalayırlar. Top yerdən üç metr məsafədə olan zaman “Bakı”nın futbolçusu ona zərbə endirə biləcək imkana məxsus deyildi. Avropa çempionatlarını diqqətlə izləsəniz, yaxşı görəcəksiniz ki, qapıçılar topa açıq ayaqla çıxdıqda heç də rəqibi vurmaq fikriylə bunu etmir. Sadəcə, özünü sığortalayırlar.

- Sözlərinizdən belə çıxır ki, həmin epizodda hakimin səhvi olub?

- Mən peşakar futbolçu olmuşam və belə məsələləri heç də pis bilmirəm. Fikrimcə, hakim kobud səhvə yol verdmişdi. Ancaq bu o demək deyil ki, belə hadisələr törədəsən. Əgər hakimin səhvi varsa, görüşdən sonra AFFA-ın Hakimlər Komitəsinə şikayət edilir. Onlar da səhvi olsa, hakimi cəzalandırır.

- “İnter”in klubunun prezident futbolçulara oyunu yarımçıq dayandıraraq meydanı tərk etmək tapşırığı verdi. Siz bu hərəkətə necə baxırsınız?

- Ümumiyyətlə, mən bu cür hərəkətlərin əleyhinəyəm. Düşünürəm ki, belə etməli deyildilər. Bir daha deyirəm, hakimin hansısa komandaya simpatiyasını hiss edirsinizsə, oyundan sonra şikayət edin. Ancaq bu cür hərəkətlər Azərbaycan futboluna imicinə zərərdən başqa bir şey deyil.

- “İnter”in qapıçısı Lomayanın əxlaqsız hərəkətinə nə deyərdiniz?

- Bu hərəkət etməsi mənə də çox təsir etdi. Belə olan halda həmin oyunçunu iki yox, dörd oyunluq cəzalandırsaydılar, daha yaxşı olardı. Bu cür hərəkətlər Azərbaycan futboluna və azarkeşlərinə hörmətsizlikdir. Çalışmaq lazımdır ki, belə əxlaqsız hərəkətlər başqa oyunlarda təkrarlanmasın.

- “Qəbələ”nin futbolçusu Mahir Şükürov barəsində dörd oyunluq diskvalifikasiya qərarına münasibətiniz necədir?

- Hamı yaxşı bilir ki, Mahir Azərbaycan yığmasının aparıcı oyunçularından sayılır və ona daim meydanda olmaq lazımdır. Kimə lazım idi onun AZAL-ın futbolçusuna qarşı bu hərəkəti? Özü də bilir ki, qarşıda Belçika və Qazaxıstan yığmalarıyla çətin oyunlar var. Çox güman ki, İntizam Komitəsi milli üzvü olduğunu nəzərə alıb, dörd oyunluq cəzanı ikiyə endirəcək.