Rəşad Sadiqov: “Qol buraxsaydıq, ən azı iki ay özümüzə gələ bilməzdik”

“Qarabağ”ın kapitanı Rəşad Sadiqov Avropa Liqasında Farer adalarının “Streymur” klubuna qarşı keçirilən oyunla bağlı Qol.Az saytına müsahibə verib

- Komandanız dünən nə qədər hücum etsə də, qol vura bilmədi. Səncə, niyə?

- Dünən komanda yoldaşlarımın hamısı yaxşı oyun nümayiş etdirdi. Bütün 90 dəqiqəni hücumda keçirsək də, istəyimizə nail ola bilmədik. Bilirsiniz müdafiəni tam boş qoyub bütöv komandayla hücuma keçmək, bir qədər qorxuludur. Bir də səfərdə qələbə qazana bilməməyimiz uşaqlarda hardasa stressə səbəb olmuşdu. Düzdü, mərhələni adlayaraq, ən əsas vəzifəmizin öhdəsindən gəlməyi bacardıq. Lakin doğma azarkeşlər önündə qələbə qazanmaq lap möhtəşəm olardı.

- İlk hissə başa çatana kimi, “Qarabağ” sürətli hücumlar təşkil etsə də, ikinci yarı bir qədər zəif təsir bağışladı.

- Bu, məşqiçimizin taktikası idi. Çünki birinci hissədə biz daim hücumlar təşkil edirik, rəqib isə 11 nəfərlə müdafiə olunurdu. Biz də bir qədər arxaya çəkildik ki, “Streymur”lu futbolçular irəli atılsınlar ki, onları əks-hücumda yaxalayaq. Ancaq onlar sırf müdafiə taktikası seçmişdilər. Oyunun sonlarına yaxın qapımızı toxunulmaz saxlayaraq nəticə qazanmağı düşünürdük. Ancaq çox təəssüf ki, azarkeşləri qələbəylə sevindirə bilmədik.

- Rəqibin yaratdığı ən təhlükəli vəziyyət autlar zamanı olurdu. Səfərdə belə vəziyyətdən qol buraxmışdınız. Evdə də az qala bu aqibəti yaşayacaqdınız.

- Bəli, doğrudur. Rəqib öz meydanında 92- ci dəqiqədə bizi məyus etmişdi. Bakıda da az qala bu səhvi buraxacaqdıq. Amma qapıçımız Pavloviç yaxşı oynadı. Həmin anda nə hisslər keçirdik, onu sözlə demək çətindir. Mərhələ adlamağı həddindən artıq çox istəyirdik. Mən deyərdim ki, bunun üçün alışıb yanırdıq. Əgər son dəqiqələrdə qol buraxsaydıq, bəlkə də komanda ən azı iki ay özünə gələ bilməzdi.

- Bilirsiniz ki, növbəti rəqibiniz Avropa turnirlərinin daimi iştirakçısı olan Belçikanın “Brügge” klubudur. Bu klub haqqında hansı bilginiz var?

- Açığı, hələ dərindən məlumat toplamamışıq. Ancaq bilirik ki, yoldaşlıq görüşündə Almaniyanın “Bayer” klubunu 2:1 hesabı ilə məğlub ediblər. Bir də axırıncı dörd ildə Avropa turnirlərinin qrup mərhələsində çıxış ediblər. Ona görə də bu komandadan ehtiyat edirik. Avropa Liqasında mübarizədən kənarda qoyduğumuz “Rusenborq” və “Visla” kimi komandalardan daha üstün futbol nümayiş etdirir. Güclü olmalarına baxmayaraq, çalışacağıq ki, qələbə qazanaraq mərhələ adlayaq. Bunun üçün əlimizdən gələni edəcəyik.

- Səfərdəki ilk oyunda hansı nəticə sizin üçün məqbul sayıla bilər?

- Acığı, səfərdə məğlub olsaq, mərhələ adlamaq çox çətin olacaq. Biz ilk oyundan sərfəli nəticəylə və ya qollu heç-heçə ilə qayıtsaq, burada qapalı oynayıb onları əks hücumlarda cəzalandıra bilərdik. Çünki komandamızın əsas silahı əks hücumlar sayıldığını desəm yanılmaram. Ancaq hər şeyin bizim üçün yaxşı olacağını düşünürük və növbəti oyunlarda da “Qarabağ” azarkeşlərini sevindirməyə çalışacağıq.