“Space” TV "Neftçi"nin oyunundakı problemə aydınlıq gətirdi

“Space” TV "Neftçi"nin oyunundakı problemə aydınlıq gətirdi
ÖLKƏ FUTBOLU 14 İyul 2011 / 15:33 4201
-  A +

“Space” telekanalı Çempionlar Liqasının ikinci təsnifat mərhələsinin dünən keçirilən “Dinamo” - “Neftçi” oyununun yayımı zamanı ortaya problemlərin çıxmasının səbəblərini açıqlayıb.

Qeyd edək ki, bu görüşün adıçəkilən telekanal vasitəsilə canlı yayımlanması nəzərdə tutulurdu. Lakin telekanal yalnız oyunun 75-ci dəqiqəsində oyunu birbaşa göstərə bilib.

Telekanalın şöbə müdiri İman Məcidovun Qol.Az-a verdiyi məlumata görə, matçın canlı yayımlanmaması sırf texniki problemlə bağlı olub.

“Bildiyiniz kimi, biz oyunu yayımlamağa çox ciddi hazırlaşmışdıq. Hətta “Qol” verilişini də xüsusi olaraq efirə verdik ki, budəfəki buraxılışı sırf bu oyuna həsr edək. Amma, bir məsəl var, deyirlər, texnikaya çox etibar eləmək olmaz. Bizdən asılı olmayan texniki qüsurların ucbatından oyunu tam verə bilmədik. Buna görə də yaranmış vəziyyəti qismən də olsa aradan qaldırmaq, matçın gedişatı barədə tamaşaçılara məlumat vermək üçün tez-tez tanınmış teleşərhçi Elnur Əşrəfoğlu ilə canlı telefon bağlantısı qururduq.

Siz də jurnalistsiniz. Özünüz də yaxşı bilirsiniz ki, işlədiyiniz kompüterdə də problem yarana bilər. Televiziyada da belədir. Özünəməxsus, spesifik xüsusiyyətləri var. İnanın ki, 75-ci dəqiqəyə qədər “Space” telekanalının rəhbərliyindən tutmuş sıravi işçilərinə qədər bu qüsuru aradan qaldırmağa çalışırdıq. Biz də arzu edirik ki, nə “Neftçi” belə məğlubiyyətə uğrasın, nə də bizim efirdə belə qüsurlar olsun” - deyə İ.Məcidov bildirib.


 

Daha çox


Son xəbərlər