Xaqani Məmmədov: «Görünür, hansısa şirinikləndirici amillər Sxadadzeni yerindən tərpədib»

AFFA-nın Hakimlər Komitəsinin sədri Xaqani Məmmədov Bakının «İnter» klubunun baş məşqçisi Kaxaber Sxadadzenin hakimlər haqda dedikləri ilə bağlı Qol.Az saytına müsahibə verib.

- Kaxaber Sxadadze iddia edir ki, o, hakim səhvləri ucbatından komandasının nə qədər xal itirdiyini hesablaya bilmir.
- Mən etiraf edirəm ki, «İnter»in «Bakı» və «Gəncə» ilə oyunlarında hakim səhvləri olub. Buna görə də həmin matçın referiləri cəzalandırılıblar. O ki qaldı onun hakimlər haqda son fikrinə, deyə bilərəm ki, hakim səhvlərinə görə, «İnter»in qazandığı xallar daha çox olub, nəinki itirdikləri. Konkret hansı oyunlarda, bunu da deyə bilərəm. Amma hesab edirəm ki, hələlik buna ehityac yoxdur.
- Sxadadze iddia edir ki, «Neftçi» ilə oyunda onların qapısına aydın olmayan penalti təyin edilib.
- Həmin penalti tam qaydalar çərçivəsində təyin olunub. Amma matçın bitməsinə 20 dəqiqə qalmış hakim «İnter»in qapısına penalti təyin etməli və bu komandanın oyunçusunu meydandan qovmalıydı. Hakimin bu epizodda səhvi oldu. Əgər o, «İnter»in futbolçusuna qırmızı vərəqə göstərsəydi, oyunun hansı hesabla bitəcəyini, kimin qələbə qazanacağını təxmin etmək çətin deyildi.
- Sxadadze Azərbaycan hakimliyinin indiki durumunun onu çox narahat etdiyini bildirir. Bununla bağlı nə dəyə bilərsiniz?
- O, son müsahibəsində özünü Azərbaycanda futbolunun inkişafını istəyən adam kimi qələmə verib. Mən ona sual vermək istəyirəm: əgər həqiqətən də belədirsə, nəyə görə bir-iki nəfərdən başqa, «İnter»in əsas heyətində yerli futbolçu oynamır?
O iddia edir ki, hakimlər «İnter»ə qarşı qərəzli mövqe tuturlar. Gəlin, ən yaxın tarixə nəzər salaq. AFFA rəhbərliyindəki dəyişiklərə qədər «İnter» bir dəfə də olsun mükafatçılar sırasına düşə bilməmişdi. Dəyişiklikdən sonra, son üç ildə isə bu komanda iki dəfə Azərbaycan çempionu olub, bir dəfə gümüş medalı qazanıb. Onda belə çıxır ki, son üç ildə hakimlərin rəğbəti «İnter»ə olub?
- Kaxaber Sxadadze «Xəzər Lənkəran»la son oyunda da hakimliyin çox aşağı səviyyədə olduğunu deyib.
- Əgər həqiqətən də belə idisə, bəs, onda nəyə görə gürcü məşqçi oyundan sonrakı mətbuat konfransında hakimliyn normal olduğunu deyirdi?!
Ümumiyyətlə, Sxadadzenin son müsahibəsi məni təəccübləndirməyə bilməz. O, futbolçusu Rövnəş Əmiraslanovun ayağının sındırıldığını, hakimin isə buna reaksiya vermədiyini deyir. Biz yaxın günlərdə bütün Azərbaycana sübut edəcəyik ki, həmin epizodda qayda pozuntusu olub, ya yox. Ona sarı vərəqə isə qayda pozuntusuna deyil, hakimin qərarına etiraz etdiyini görə verilib.
O ki qaldı «İnter»in penaltisinin verilməməsi ilə bağlı Sxadadzenin fikirlərinə, yaxın günlərdə hamı görəcək ki, Sxadadze kimi aldadır.
Ümumiyyətlə, bu adam son vaxtlar çox canfəşanlıq edir. Mən ona sual vermək istəyirəm: «Birlik kuboku»nu aldıqdan və məvacibləriniz bir qədər gecikəndən sonra həvəssiz oyun nümayiş etdirən sizin komanda deyildimi? Niyə o vaxt hakimlər yada düşmürdü? Son vaxtlar isə «İnter» yaxşı oynayır. Görünür, hansısa şirinikləndirici amillər onları yerindən tərpədib. Bir daha sübut olunur ki, «İnter» komandası yalnız pula oynayır. Pulları gecikən kimi isə, nə rəhbərlik, nə komanda, nə də Azərbaycan futbolunun inkişafı yada düşür.