"Bayer" - "Qarabağ": nələri bilməliyik?

Bu gün Avropa Liqasının qrup mərhələsinin 3-cü turunda "Bayer" (Almaniya) və "Qarabağ" (Azərbaycan) üz-üzə gələcəklər. 

H qrupunda yarışan bu komandalar əvvəlki 2 görüşdə qələbə qazanıblar və 6 xalla şərikli liderdirlər. Oyunu Xaratsiu Fesnikin başçılıq edəcəyi rumıniyalı hakimlər briqadası idarə edəcək. Oyun Bakı vaxtı ilə saat 23:00-da "Bay Arena" stadionunda başlanacaq.

"Qarabağ"ın almanlarla 7-ci qarşılaşması

Bu, "Qarabağ"la "Bayer" arasında tarixdəki ilk qarşılaşma olacaq. "Bayer" indiyədək Azərbaycanın heç bir klubu ilə qarşılaşmayıb. "Qarabağ" isə əksinə 2010-cu ildən bəri 6 dəfə alman klubları ilə üz-üzə gəlib. Bütün oyunlar Avropa Liqası yarışında baş tutub. Qurban Qurbanovun komandası 6 oyundan 5-də məğlub olub, sonuncu oyunda isə uğursuz seriyanı qıraraq heç-heçə edib.

Avropa Liqası, pley-off

2010-cu il. "Borussiya" (Dortmund) - "Qarabağ" (ilk oyun 4:0, cavab matçı 1:0)

Avropa Liqası, pley-off

2013-cü il. "Qarabağ" - "Ayntraxt" (0:2, 1:2)

Avropa Liqası, qrup mərhələsi

2022-ci il. "Frayburq" - "Qarabağ" (2:1, 1:1)

"Bayer" fırtınası

İspaniya futbolunun əfsanəsi Xabi Alonsonun rəhbərlik etdiyi "Bayer" bu mövsüm möhtəşəm çıxışı ilə bütün Avropanın diqqətini özünə çəkib. Leverkuzenlilər bu gün qitənin ən yaxşı formada olan komandalarındandır. Onlar bundesliqada keçirdiyi 8 oyundan 7-də qələbə qazanıb, yalnız 1-də heç-heçə edib və 22 xalla turnir cədvəlində liderdirlər. Avroliqadakı 2 oyunda da komanda yüzfaizli nəticə göstərib. Beləliklə, "Bayer" 10 oyunda 9 qələbəyə sevinib, 1 dəfə isə heç-heçə qeydə alınıb. 

Alonsonun futbolçularının məhsuldarlığı da xüsusi qeyd edilməlidir: onlar 10 oyunda rəqib qapılarından düz 31 qol keçiriblər (25-i bundesliqada, 6-sı Avroliqada). Bu, orta hesabla hər matça 3 qol deməkdir. Müdafiə xətti də etibarlı oyunu ilə seçilir. 10 oyuna buraxılan qol sayı 8-dir.

"Qarabağ"a gəlincə...

Qurban Qurbanovun komandası da son oyunları uğurla keçirir. Komanda Azərbaycan çempionatında son 5 matçdan 4-də qalib gəlib, 1-də heç-heç edib. Avroliqanın qrupundakı hər 2 oyunda isə komanda yüzfaizli nəticəyə malikdir. Beləliklə, "Qarabağ" 7 oyundur məğlub olmur (6 qələbə, 1 heç heçə). Ağdam təmsilçisi həm daxili, həm də Avropa Liqasında şərikli liderdir.

"Qarabağ" bu mövsüm keçirdiyi 12 oyunda 22 qol vurub (20 qol Premyer Liqa, 2 qol Avroliqa) və 8 qol buraxıb (hamısını Premyer Liqada).

Ümumilikdə isə "Qarabağ" bu mövsüm Avropa kuboklarında dalbadal 7 oyundur uduzmur. Ağdam təmsilçisi son dəfə Çempionlar Liqasının 2-ci təsnifat mərhələsində "Rakov"la Polşakı görüşdə (26 iyul) məğlub olub. Həmin matçdan sonrakı 7 oyunda "Qarabağ" 2 dəfə heç-heçə edib, 5 dəfə isə qələbə qazanıb. 

Yarışa təsnifat mərhələsindən başlayan Ağdam təmsilçisi bu mövsüm səfərdəki 5 matçdan 4-də qələbə qazanıb (1 məğlubiyyət).

Sonda onu da qeyd edək ki, böyük ehtimalla, bu gün "Qarabağ"ın qapısını Andrey Lunyov qoruyacaq. Rusiyalı qolkiperin "Qarabağ"a qədər son klubu isə məhz "Bayer" olub....

Elnur,
Qol.az