Rauf Əliyev: "Bəzilərini susdurmaq üçün bunu mütləq etməliyəm"

Premyer Liqanın oyunlarına hazırlaşan "Qarabağ" Türkiyənin Antalya şəhərində təlim-məşq toplanışını davam etdirir. Bugünkü hazırlıq prosesindən sonra "Qarabağ"ın və millinin hücumçusu Rauf Əliyev Qol.Az-ın suallarını cavablandırıb

- Antalyadakı hazırlıq prosesiniz necə gedir?

- Artıq dörd gündür ki, məşqlərə başlamışıq. İlk günlər hazırlıq yüngül idi, indi isə get-gedə çətinləşir. Hər şey yüksək səviyyədədir. Dünən test verdik. Bundan sonra məşqlərimiz daha ağır olacaq. Amma bütün bunlara baxmayaraq, qış fasiləsində çempionata yaxşı hazırlaşmaq lazımdır ki, uğurlu nəticələr əldə edə bilək.

- Dünənki testin səninlə bağlı nəticələri necə oldu?

- Düzdür, bu haqda məşqçilər bizə nəsə demir Amma mən özüm normal qiymətləndirirəm.

- Qarşıdakı rəsmi yarışlara yüksək səviyyədə hazırlaşdığınızı dedin. Bütün bunlardan sonra komandanız çempionatda nəyə ümid edə bilər? Həm də nəzərə alaq ki, zədəli futbolçularınız sıraya dönüb, komandanıza bir neçə yeni oyunçunun cəlb olunması gözlənilir…

- Hələlik bizim başlıca məqsədimiz qarşıdakı üç oyunda qalib gəlib ilk altılığa düşməkdir. Bundan sonra isə yüksək yerlər, avrokuboklarda oynamağa imkan verən vəsiqə uğrunda yarışacağıq. Amma bilməz olmaz, oyunların gedişatından asılı olaraq, çempion adını da qazana bilərik. Yadınızdadırsa, ötən mövsüm bizim adımız çempionluğa namizədlər sırasında yox idi. Amma biz yalnız turda, «Neftçi»ylə qarşılaşmada iki mühüm xal itirərək bu şansı əldən verdik. Demək istəyirəm ki, hələ «Qarabağ»ı siyahıdan silmək tezdir.

- Amma yəqin ki, sən özün də "Neftçi" və "Xəzər Lənkəran"ı çempionluğa əsas namizəd sayırsan.

- Turnir cədvəlinə baxanda çempionluq uğrunda yarışın bu iki komanda arasında getdiyi görürük. Hərçənd, bir daha təkrar edirəm, adımız siyahıda olmasa da, ötən il biz yalnız son turda çempionluq şansını buraxdıq. 

Biz çempionata yaxşı hazırlaşmılıyıq. Futbolda şans da yaxşı şeydir.

- Bəs ilk altılıqdan hansı komandanın kənarda qalacağını düşünürsən?

- Mənim üçün kimin orada qalacağı və ya gedəcəyinin önəmli deyil. Əsas fikrim öz komandamıza yönəlib. Düzdür, çoxları bizim artıq ilk altılıqda yerimizi təmin etdiyinə desə də, hələ tələsmək lazım deyil. «Qarabağ», «Qəbələ» və «Bakı»… Bu üç komandadan hər birinin final mərhələsinə ilk altıqda başlamaq şansı var. Qarşıdakı turda bizi «Qəbələ» ilə çətin oyun gözləyir.

Bu mənada, hələlik mənim ilk altılığı kimin tərk edəcəyilə bağlı konkret namizədim yoxdur.

- Uzun müddət zədədən əziyyət çəkən Əfran İsmayılovun məşqlərə başlamasına yəqin ki, ən çox sevinənlərdən də biri sənsən. Axı, oyunda onunla yaxşı anlaşırsan.

- Demək olar ki, Əfranın sıralarımıza dönməsi bizim üçün yeni transferdir. Onun birinci dövrədə bizimlə olmaması üzücü  idi. Əfranın qayıtması həm məni, həm də komandamızı sevindirir. Mənə yaxşı ötürmələr verir. İnanıram ki, qarşıdakı oyunlarda da bir-birimizi gözəl başa düşəcəyik.

- Artıq bu çempionatda yeddi dəfə fərqlənə bilmisən. Bu çempionatda konkret hədəfin nədir, neçə qol vurmaq istəyirsən?

- Hücumçunun vəzifəsi hər oyunda rəqib qapısına yol tapmaqdır. Mənim də maksimum vəzifəm elə budur. Bu, həm özüm, həm də komandam üçün yaxşı olar. Düşünürəm ki, yeddi qol hələ azdır. Nə qədər çox qol vursam, bir o qədər yaxşı olar.

- Amma razılaş ki, bombardirlər siyahısında birinciliyi ələ keçirmək şansın çox azdır.

- Əlbəttə. Birdə ki, mənim indiki məqsədim ən yaxşı bombardir olmaq yox, daha çox qol vurmaqdır. Bacardığım qədər də bunu etməyə çalışıram.

- Yeri gəlmişkən, bir hücumçu kimi çempionatın bombardiri olan Bahadır Nəsimov haqda fikirlərin maraqlı olardı.

- Dediyim kimi, hücumçunun işi qol vurmaqdır. Əgər o bombirdirdirsə, deməli, işinin öhdəsindən gəlməyi bacarır.

- Bir neçə gün sonra "Qarabağ"ın düşərgəsindən ayrılaraq millinin təlim-məşq toplanışına gedəcəksən. Qısa bir müddətdə fərqli məşqçilərlə işləmək sənə çətin olmayacaq ki?

- Biz artıq çətinliyə öyrəşmişik. Futbolçuyuq, məşqçi tapşırığını verirsə, yerinə yetirməliyik. Düzdür, birdən-birə fərqli mühitə düşmək sıxıcı olur. Həm də millinin toplanışından sonra çempionatın oyununa qısa vaxt qalacaq. Amma nə etmək olar...

- Hazırda yüksək formada olsan da, millidə hələ də qol vura bilməmisən.

- Bu, mənə çox təsir edir. Mənim əsas məqsədlərimdən biri də milli komandamızda qol hesabımı açmaqdır. Həm də bəzilərini susdurmaq üçün bunu mütləq etməli, qol vurmalıyam.

- Bunun üçün Belçika ilə "Avro-2012"nin qarşıdakı rəsmi oyunu yaxşı bir şansdır…

- Fərq etməz, rəsmi və ya yoldaşlıq oyunu. Amma təbii ki, güclü komandalarla oyunda fərqlənmək istərdim. Əsas odur ki, ilk növbədə məşqçinin etimadını doğruldub milliyə dəvət alım, sonra isə qol vurum.