Rəşad Sadıqov: «Karyeramı «Neftçi»də başa vurmaq istəyirəm»

Azərbaycan milli komandasının və Türkiyənin «Eskişehirspor» klubunun futbolçusu Rəşad Sadıqovun Qol.Az saytına müsahibəsi

- «Fənərbaxça» ilə oyunda aldığın zədə səbəbindən qarşıdakı oyunlarda iştirak etməyəcəksən. Yaşıl meydanlara nə vaxt qayıdacağın artıq dəqiqləşib?
- Hər şey müalicənin gedişatından asılıdır. Ən tez gələn həftənin ikinci günü qaçmağa başlayacağam. Maksimum iki-üç həftədən sonra oynaya biləcəyəm. Bu isə çoxdur. Mən ən qısa zamanda futbola qayıtmaq istəyirəm.
- Noyabrın 17-də Çernoqoriya ilə oyunda iştirak etməyəcəyin qətiləşib. Bəs, bu qarşılaşmaya baxmağa gedəcəksən?
- Xeyr. Oynamayacağamsa, ora getməyin də mənası yoxdur. Bu müddətdə müalicə olunmağım daha faydalı olardı.
- «Eskişheşirspor»a keçdikdən sonra millinin baş məşqçisi Berti Foqts səninlə maraqlanıbmı?
- Yalnız Türkiyə ilə Bakıdakı oyundan əvvəl mənimlə söhbəti oldu. Soruşdu ki, nəyə görə əsas heyətdə oynamırsan. Mən də cavab verdim ki, şansımı gözləyirəm. Belədə onun Türkiyəyə zəng edib məndən xəbər tutmasına ehtiyac yoxdur.
- Eskişehirdə azarkeşlər tərəfdən sənə münasibət necədir?
- Hər şey qaydasındadır. Düzü, mən belə şeylərə çox da fikir vermirəm. Başımı aşağı salıb oyunumu oynayıram.
- «Fənərbaxça»yla oyunda Türkiyə millisinin üzvü olan futbolçular da çıxış edirdi. Onlarla oyundan əvvəl və ya sonra hər hansı söhbətiniz oldu?
- Xeyr.
- Azərbaycan çempionatının oyunlarını izləyirsən?
- Vaxt olanda, bəli. Daha çox «Qarabağ»ın oyunlarına baxıram.
- Çempionatın səviyyəsi barədə fikirlərin necədir?
- Oyunları çox da yaxından izləyə bilmirəm. Yalnız nəticələrdən xəbər tuturam. «Neftçi»nin sabit çıxışını qeyd edə bilərəm. Başqa bir neçə potensialı olan komanda var.
«Bakı» klubunun uğursuz çıxışları isə məni məyus edir. Mən həmişə bu klubu nümunə kimi göstərmişəm. Amma hər şeyin öz vaxtı var. Yadınızdadırsa, bir ara «Neftçi»də imkanlarından aşağı səviyyədə çıxış edirdi. Bəzən, komanda uğursuzluq zolağına düşür və bundan çıxa bilirsən. Düşünürəm ki, «Bakı» öz adına layiq oyunu nümayiş etdirə biləcək. Çünki onların yaxşı heyəti, yaxşı rəhbərliyi var. Ən başlıcası klub tərəfindən futbolçulara təzyiq yoxdur. Bu da futbolda uğur qazanmaq üçün önəmli amildir.
- Keçmiş klubun «Qarabağ» turnir cədvəlində beşinci pillədədir. Səncə, bunu normal saymaq olar?
- «Qarabağ»da itkilər çoxdur. Əfran İsmayılovun zədələnməsinin «Qarabağ»a böyük ziyanı oldu. İndi Samir Abbasovla Andrey Rubins də zədələnib. «Qarabağ» bu mövsüm tam heyətlə oynaya bilmir. Bir oyun yaxşı, bir oyun pis çıxış edir. Sabit oyun yoxdur. Qarşıdakı dörd tur onlar üçün çox ağır olacaq. Bu mənada, onlar çempionatın sonunda istədiklərini əldə etmək üçün bu dörd oyunda xal toplamalıdırlar.
- «Qarabağ»ın qeyri-sabit çıxışında sənin bu klubu tərk etməyin də əsas səbəblərdən biri kimi göstərilir.
- Təkcə mən yox, əsas heyətin istənilən oyunçusu komandadan gedəndə bunun mənfi təsiri olur. Mənim gedişatımın isə «Qarabağ»a ciddi təsiri olmayıb. Çünki komandada təcrübəli futbolçular çoxdur.
- «Neftçi» klubunun rəhbərliyi qış fasiləsində səs-küylü transferlər həyata keçirəcəyini bəyan edib. Bu komandadan sənə dəvət gəlsə, münasibətin necə olacaq?
- Bilirəm ki, onlardan dəvət gəlməyəcək. Çünki Azərbaycanın bütün futbol ictimaiyyəti və «Neftçi» klubunun rəhbərliyi mənim ölkə xaricində çıxış etməyimi istəyir. Mənim indiki klubumla hələ iki illik müqaviləm var. Karyeramın sonlarını Türkiyədə keçirmək fikrindəyəm. Amma hər şey bizdən asılı deyil. Ümumilikdə isə mən futbolçu karyeramı «Neftçi»də başa vurmaq istəyirəm.
- Millidə oynayan komanda yoldaşların Vüqar Nadirov və Vaqif Cavadovdan məşqçilər və klub rəhbərləri narazılıq edir. Sənin bu futbolçulara məsləhətin nə olardı?
- Yaxınlarda bu məsələylə bağlı hər iki futbolçuyla telefon söhbətim olub. Düzü, onlara dedim ki, oyunları məni də qane etmir. Onlar oturub ciddi şəkildə düşünməlidirlər. Vaqif və Vüqar xaricdə oynamağa layiq futbolçulardır. Amma indi onlar imkanlarından aşağı səviyyədə çıxış edirlər. Halbuki hər ikisi sıradan bir futbolçu deyil. Onların məsuliyyəti böyükdür və Vaqiflə Vüqardan təlabat da çoxdur. Vüqar Türkiyə ilə matçda yüksək səviyyədə çıxış edir, amma klubda həmin oyunu nümayiş etdirə bilmir. Gökhan Gönül kimi bir futbolçu Vüqara uduzurdu. Türkiyədə mənə dedilər ki, sizin 7 nömrəli futbolçunuz, yəni Vaqif Cavadov çox yaxşı oyunçudur. Mən isə bildirdim ki, Vaqif hələ potensialının 50 faizini ortaya qoydu. Deməyim odur ki, Vüqar və Vaqif istedadlı, potensialı olan futbolçulardır. Onlar oyunlarına ciddi yanaşmalıdırlar. İndi bu futbolçular klublarında potensiallarından aşağı səviyyədə çıxış edirlər. Onların öz oyunlarını görməyi çox istəyirəm.
- Səncə, Vüqarla Vaqifin imkanlarından aşağı səviyyədə çıxış etməsi nə ilə bağlı ola bilər?
- Mən bunu psixoloji amillərlə əlaqələndirərdim. Vaqif «Tvente»yə getdiyi ilk gündə zədələndi və karyerası uğursuz alındı. Düzü, heç bilmirəm, bütün bunlara nə ad verim. Mənimlə danışanda deyirlər ki, hər şey qaydasındadır, amma bunları onların oyununda görmürəm. Fikrimcə, Vüqar və Vaqif təkcə məşqlərdə, oyunlarda deyil, şəxsi həyatlarında da futbolla yaşamalı, futbolu fikirləşməlidirlər. Yalnız bundan sonra onlar böyük uğurlara doğru addımlaya bilərlər.