"Mən sehrbaz deyiləm, baş məşqçiyəm" - Canni De Byazi

Azərbaycan millisinin baş məşqçisi Canni De Byazinin müsahibəsi

- Azərbaycan millisindəki işinizin birinci mərhələsini başa vurdunuz. Bura qədərki vəziyyəti necə qiymətləndirərdiniz: Nələr alındı, nələr alınmadı?

- İşimizi 360 dərəcəlik bucaqda qiymətləndirsək, fikirləşirəm ki, ilk fazanı pozitiv saymaq olar. Amma bu, o demək deyil ki, hər şey çox yaxşı oldu, hər şeyi mükəmməl etdik. Millətlər Liqasında bəzi oyunlarda xallar itirdik. Bu, həm təcrübəsizlikdən, həm də digər amillərdən oldu. Fikrimcə, ümumilikdə yaxşı oyun göstərdik. Düzdür, bütün matçlar eyni səviyyədə keçmədi. Bu baxımdan sabitlik tapmalı və bütün 90 dəqiqəni yüksək səviyyədə oynamalıyıq. Təbii ki, 3 gündən bir oyun keçirməyə öyrəşmək lazımdır.

- Yığma Millətlər Liqasında yer aldığı qrupda 3-cü oldu. Azərbaycan millisini kənara qoysaq, bu nəticəni özünüz üçün uğurlu saymaq olar?

- Hesab edirəm ki, şəxsi uğurlarım, göstəricilərim barədə danışmağım düzgün olmaz. Bəli, qrupda 3-cü olduq. Bunu qəbul etməliyik. Məncə, daha yaxşısını edə, daha çox xal yığa bilərdik. Futbolçular da bunu bilir. Millətlər Liqasındakı təcrübə bizə çox şeyi başa saldı. Hər mənada bundan nəticə çıxarmalıyıq.

- Real danışsaq, qrup birincisi ola bilərdikmi və bunun üçün nə çatmadı?

- Təbii ki, futbolda hər şey baş verə bilər. Oyunlara maksimum dərəcədə intensiv hazırlaşmalıyıq. Əlbəttə, qrupda birinci ola bilərdik. Keçirdiyimiz matçlardan sonra buna daha çox əmin oldum. Düşünürəm ki, bəzi matçlarda fərdi səhvlər edib, az qol vurduq. Bir daha eyni səhvləri təkrarlamamaq üçün bu çatışmazlıqlar üzərində işləməli, zəif tərəflərimizi inkişaf etdirməliyik.

- Son bir ayda xarici KİV-lərə verdiyiniz müsahibələrdə yığma üzvlərinin beynəlxalq təcrübəsinin olmamasını qeyd edirsiniz. Amma millinin sükanı arxasına keçdikdən sonra Dmitri Nazarov, Eddi İsrafilov, Rufət Dadaşov, Riçard Almeyda kimi təcrübələri olan legionerləri komandaya cəlb etmədiniz...

- Bəli, hazırda əlimdə olan oyunçuların beynəlxalq təcrübəsinin olmadığını demişəm və bunu bir daha təkrar edirəm. Düzdür, sadaladığınız oyunçuların xarici liqalarda oyun təcrübələri var. Amma bu, müntəzəm olaraq beynəlxalq matçlarda oynamaqla eyni deyil. Onların yığmaya çağırılmamasına gəlincə, Millətlər Liqasına yeni futbolçularla başlamaq istədiyim üçün bu qərarı verdim.

- Adlarını çəkdiyim futbolçuların, həmçinin Əmir Ağayevin DÇ-2022-nin seçmə mərhələ oyunlarında yığmaya çağırılma ehtimalı varmı?

- Bütün oyunçuları diqqətlə izləyirəm. Bura ölkə xaricində çıxış edən futbolçular da aiddir. Millinin qapısı heç kimin üzünə bağlı deyil. Mənim üçün ən vacib məsələlərdən biri onların yanaşma tərzidir. Təbii ki, oyun keyfiyyəti önəmlidir. Amma mənim üçün yanaşma da vacibdir. Ümumi layihə barədə danışsaq, daha çox gənclərə və perspektivli oyunçulara şans verməyi düşünürük.

- Müsahibələrinizdə qarşıdakı seçmə mərhələ barədə səsləndirdiyiniz fikirlərdən sonra belə qanaətə gəlmək olar ki, milli komanda nəticə yox, yenə təcrübə qazanmaq üçün iştirak edəcək...

- Bayaq da dediyim ki, oyunlara çox ciddi və intensiv hazırlaşmaq, inamlı oynamaq lazımdır. Meydana böyük əminliklə, udmaq üçün çıxmalıyıq. Təbii ki, elə oyunlar olacaq ki, onlardan təcrübə götürəcəyik. Ümumilikdə isə hər bir qarşılaşmanı nəticə üçün oynamalıyıq. Meydana elə-belə çıxmamalıyıq.

- Albaniya yığmasını 2016-cı ildə tarixində ilk dəfə Avropa çempionatının seçmə mərhələsinə çıxardınız. Sizcə, Azərbaycan millisinə albaniyalıların uğurunu təkrarlamaq üçün nə qədər vaxt lazımdır?

- Əfsuslar olsun ki, futbol riyaziyyat deyil. Burada “copy-paste” etmək olmur. Ona görə hamı istisnasız çoxlu işləməlidir. İlk növbədə, mentalitet dəyişikliyi olmalıdır. Hamımız məqsədimizə nail olmağa, daim qələbə qazanmağa çalışmalıyıq. Bunlar olmasa, heç bir uğur qazana bilməyəcəyik. Futbolda böyük sürprizlər baş verə bilər. Əsas odur, gördüyün işə inanasan. Albaniya millisinin uğurunu buna sübut kimi göstərə bilərəm. Eyni zamanda, komandanı tam tərkibdə seçmə mərhələyə yaxşı hazırlamaq lazımdır. Amma bu mənada pandemiya bizə müəyyən çətinlik yaradır.

- Yeri gəlmişkən, Albaniya yığmasında çalışdığınız vaxt Serbiya ilə oyununuzda dron qalmaqalı və nəticədə meydanda iki komanda üzvləri arasında dava baş vermişdi. Serbiyada sizə qarşı həmin vaxtdan birmənalı münasibətin olmadığını düşünmürsünüz? Yoxsa bu, yalnız Albaniya yığma komandasının üzvlərinə qarşı idi?

- Püşkatmadan dərhal son bu oyunun böyük risk altında olacağını bilirdik. Fikirləşirəm ki, UEFA-nın bu işə tam ciddi yanaşmaması da rol oynamışdı. Serblərlə heç bir problemim yoxdur. Peşəkarlıq və böyük istəklə öz işimi görürdüm.

- Artıq Azərbaycan futbolu barədə ətraflı məlumatınız var. Çempionatı izləyir, futbolçuları tanıyırsınız, onların psixologiyasına bələdsiniz. Hər şeyi nəzərə alsaq, yığma A qrupunda hansı nəticəni əldə edə bilər?

- Bunu meydandakı oyun göstərəcək. Mən sehrbaz deyiləm, baş məşqçiyəm. Çempionatı izləmək, futbolçuları yaxşı tanımaq qrupda neçənci yeri tutacağımızı deməyə imkan vermir. Uğur qazanmaq istəyirik. Maksimum dərəcədə uzağa getmək, nəticə əldə etmək niyyətindəyik. Bilirsiniz ki, çox çətin qrupa düşmüşük. Yığma üzvləri ilə çox işləmək imkanımız yoxdur. Bu da işimizə təsir edir. Rəqiblərimizin gücünü siz də bilirsiniz. Əminəm ki, baxımlı oyun göstərib, yaxşı nəticə qazana biləcəyik.

- Qrupdakı rəqiblərdən Portuqaliya, Serbiya və Lüksemburqla oyun təcrübəniz var. İrlandiya barədə nə deyə bilərsiz?

- İrlandiya millisinin son nəticələrinə baxsanız, yaxşı vaxtlarını yaşamadıqlarını görərsiniz. Hazırkı vəziyyət Covanni Trapattoni və Cek Çarltonun vaxtlarındakından tamamilə fərqlidir. Baş məşqçi dəyişikliyi yaxşı nəticələrə gətirməyib. Amma nəzərə alaq ki, oyunçuları İngiltərə Premyer Liqası və Çempionşipdə, həmçinin Şotlandiya çempionatında çıxış edirlər. Bu da həmin futbolçuların səviyyələrindən xəbər verir.

- A qrupunda Qətər millisi də yer alıb. Bu isə oyun sayının çox olması deməkdir. Bu amili mənfi, yoxsa müsbət cəhət kimi qeyd edərdiniz?

- Fikrimcə, müsbət məqamdır. Çünki daha çox oyun keçirmək bizə ancaq kömək edə bilər. Belədə, komandamın çıxışını daha yaxşı analiz edəcəyəm. Həmçinin bu amil bizə bəzi yenilikləri sınamağa imkan verəcək.

- Ramil Şeydayev yığmanın ən fəal üzvlərindən biri idi. Lakin son vaxtlar onun oyununda eniş var. Səbəbini nədə görürsünüz və bu amil sizi narahat edirmi?

- Bütün futbolçularda eniş və yüksəliş dövrləri olur. Bu baxımdan, Şeydayev də istisna deyil. Mövsümün əvvəlində futbolçular forma yığmaqda çətinlik çəkirlər. Buna görə narahat deyiləm. Əminəm ki, müvəqqəti haldır.

- "The Best" mükafatı üçün bütün nominasiyalar üzrə təxminləriniz düz çıxdı. Niyə məhz Robert Levandovski, Yurgen Klopp və Manuel Noyeri seçdiniz?

- Çünki onlar hər zaman qələbə üçün oynayırlar. Artıq uzun illərdir öz ustalıqlarını yüksək səviyyədə nümayiş etdirirlər. Fikrimcə, qalib olmağa layiq idilər.

- Dünyanın ən yaxşılarını düz tapdınız. Bəs Azərbaycanda bu nominasiyalara kimləri layiq görürsünüz?

- Milliyə çağırdığımı futbolçuları seçərdim. Amma ad çəkmək düzgün olmaz.

- Hazırda İtaliyadasınız. Ölkədə koronavirusla bağlı vəziyyət necədir?

- Bəzi regionlara giriş-çıxışı bağlasalar da, İtaliyada ümumi vəziyyət nəzarət altındadır. Təbii ki, təhlükə hələ də yüksəkdir. Amma insanlar maksimum dərəcədə bütün qadağalara əməl etməyə çalışırlar (Report).