Gerye “Qarabağ”dan gedə bilər - İngiltərə iddiası

Gerye “Qarabağ”dan gedə bilər - İngiltərə iddiası
ÖLKƏ FUTBOLU 4 Yanvar 2019 / 14:52 4890
-  A +

"Qarabağ"ın futbolçusu Donald Geryenin karyerasını İngiltərə davam etdirə biləcəyinə dair xəbərlər yayılıb.

Qol.az-ın məlumatına görə, bu iddia ilə futbolçunun vətəni Haitinin mətbuatı çıxış edib.

Bildirilir ki, 29 yaşlı futbolçu ilə "Lester" və “Brayton” maraqlanır. Onun gələn həftə danışıqlar üçün İngiltərə gedəcəyi qeyd olunub. Tərəflər arasında razılıq əldə edildiyi, hətta Premyer Liqa təmsilçisinin Gerye üçün "Qarabağ"a 5 milyon avro ödəməyə hazır olduğu bildirilib.

Maraqlıdır ki, yayılan xəbərdən sonra Gerye "Lester" klubunun rəsmi "İnstaqram" səhifəsini izləməyə başlayıb.

Qeyd edək ki, bu məlumatların nə dərəcədə həqiqəti əks etdirdiyi bilinmir. Amma Haiti mətbuatının davamlı olaraq bu xəbərləri tirajlaması, eləcə də futbolçunun adından Londona getməyə hazırlaşması haqda açıqlama yayılması Geryenin “Qarabağ”dan gedəcəyini istisna etmir.

Qol.az-ın əldə etdiyi xəbərə görə isə, Geryenin Ağdam klubu ilə 2020-ci ilin yayına kimi müqavilə olduğundan o, sərbəst qaydada heç bir komandaya keçə bilməz. Bu transferə görə “Qarabağ”a təzminat ödənməlidir. Kluba yaxın mənbələrdən Qol.az-a bəlli olub ki, rəsmi təklif olsa, “Qarabağ” Gerye ilə elə qış transferi pəncərəsində yolları ayıracaq. Amma indi bununla bağlı Ağdam klubuna rəsmi müraciətin olmadığı bildirilib.

Digər məlumata görə, Haiti mətbuatının 5 milyon avroluq təklif iddiası da real deyil. Çünki Geryenin real bazar qiyməti göstərilən məbləğdən bir neçə dəfə azdır.

Qeyd edək ki, Haiti millisinin üzvü 2017-ci ilin yayından "Qarabağ"da çıxış edir.

Daha çox


Son xəbərlər
topaz banner