Arif Əsədov: “Təlim-məşq toplanışına kimi bütün transferleri həll etmək istəyirik”

“Neftçi”nin baş məşqçisi Arif Əsədovun Qol.Az saytına müsahibəsi

- Arif müəllim, Slavko Georgiyevskinin ardınca daha bir transferi gerçəkləşdirdiyiniz haqda məlumatlar yayılıb. Fərid Quliyevin keçidini tam həll etdiyiniz haqda xəbərlər nə dərəcədə doğrudu?
- Fərid Quliyevi komandamızda görməkdə maraqlıyıq. Bu yöndə işlər aparırıq. Amma onun keçidini həll etməyimiz barədə yayılan xəbərlər hələlik dəqiq deyil. Çünki müqavilə bağlamamışıq. Nə vaxt müqavilə bağlasaq, keçidini tam həll etsək, ondan sonra konkret nədənsə danışmaq olar. Hələlik isə, ortalıqda heç nə yoxdur. Özünüz də gördünüz ki, Slavko Georgiyevskinin keçidini həll edən kimi ictimaiyyətə məlumat verildi. Yeni transferlərimiz olan kimi, onlar haqda da eyni şəkildə məlumat veriləcək.
- “Standard” rəhbərliyinin futbolçusuna 200 min dollar qiymət qoyduğu bildirilir. Siz Fəridə görə bu məbləği ödəməyə hazırsınızmı?
- Bilirsiz, futbolçu keçidləri ilə klub rəhbərliyi məşğul olur. Təbii ki, hər bir futbolçu və onun klubu transferlər zamanı müxtəlif qiymətlər səsləndirirlər. Lakin danışıqlar zamanı hər iki tərəfin qarşılıqlı razılığı əsasında keçid həllini tapır. Yəqin ki, Fəridin komandamıza keçidi mümkün olsa, müəyyən məbləğ ödəniləcək. Ancaq yenə deyirəm ki, bu, sırf klub rəhbərliyinin apardığı danışıqlar nəticəsində məlum olacaq və mən bu barədə nəsə deyə bilmərəm.
- Millinin hücumçusundan başqa hansısa yerli futbolçu almağı planlaşdırırsınızmı?
- Bəli, başqa namizədlərimiz də var. Klub rəsmiləri həmin oyunçuların da keçidini həll etmək üçün müəyyən işlər görür, danışıqlar aparır. Yəqin ki, ən qısa zamanda bu yöndə işlər tamamlanacaq və sizlərə də ətraflı məlumat veriləcək.
- Siz Avstriya səfəriniz zamanı iki futbolçu bəyəndiyinizi bildirmişdiniz. Bəs Makedoniya millisinin digər üzvünün keçidini nə vaxt həll edəcəksiniz?
- Onun keçidi baş tutmadı. Məsələ burasındadır ki, biz onunla ilkin razılıq əldə etsək də, sonradan müəyyən problemlər yarandı. Məlum oldu ki, həmin futbolçunun hazırda çıxış etdiyi klubla müqaviləsi var. Təbii ki, müqaviləsi başa çatmayan oyunçunun transfer vərəqi verilmədiyindən, onun keçidini həll edə bilməzdik. Onun gəlişinə razılıq verilmədiyindən, artıq əlimizi üzmüşük və başqa transferlərin həllinə çalışırıq.
- Bəs digər legioner oyunçuların keçidini nə vaxta həll etmək fikrindəsiniz?
- Komandamız hazırlıqlara iyunun 20-də başlayacaq. Çalışırıq ki, transferlərin çoxunu həmin vaxta kimi həll edək və təlim-məşq toplanışına komplektləşmiş heyətlə başlayaq.
- Onda belə çıxır ki, digər gözaltı etdiyiniz legionerləri də sınaqdan keçirməyə ehtiyac duymursunuz və birbaşa müqavilə bağlamağa dəvət edirsiniz?
- Biz heyətimizə qatmaq istədiyimiz hər bir oyunçunu uzun müddətdi ki, izləyirik. Həm disklərinə baxmışıq, həm yoxlama oyunlarında iş başında görmüşük. Bildiyiniz kimi, bizim nümayəndəlirimiz Braziliyada da oldu və bir neçə oyunçunu bəyənib. İndi onların yolunu gözləyirik. Yəqin ki, ən yaxın günlərdə onlar da Bakıya gəlib, tibbi müayinədən keçəcək. Hər şey qaydasında olsa, onda həmin futbolçularla da müqavilə bağlayacağıq. Uzağı 2-3 oyunçunun keçidi təlim-məşq toplanışı dövrünə qala bilər ki, onları da tez bir zamanda həll etməyə çalışacağıq.
- Braziliyadan almaq istədiyiniz futbolçular arasında “Xəzər Lənkəran”ın keçmiş oyunçusu Denis Silvanın adı hallandırılır. Həqiqətənmi bu futbolçunu almaqda maraqlısınız?
- Açığı nümayəndəlirimiz orda bir çox braziliaylı oyunçularla görüşüb, danışıqlar aparıblar. Onların arasında Denis Silva da ola bilər. Amma onun komandamıza keçidi barədə heç nə deyə bilmərəm. Ortalıqda konkret heç nə olmadığı halda, nəsə deməyi xoşlamıram.