Jaba: "Evlənirəm!"

«Bakı»nın braziliyalı hucumçusu Jabanın Qol.Az saytına müsahibəsi

- Komandanız ölkə kubokunun yarımfinalında “İnter”i məğlub etməklə finala çıxdı. Bu oyunda sən də qol vurdun və komandanın uğurunda əsas sahiblərindən oldun.
- Bu oyunda “Bakı” həqiqətən də yaxşı təsir bağışladı. Çoxları finalda “İnter”i görsə də, biz bunun əksini sübut etdik. Çox ağıllı oynamaqla finala çıxdıq. Qələbədə təkcə mənim yox, bütün komanda üzvlərinin böyük rolu var.
- «Bakı»nın növbəti oyunu da “İnter”lə öz meydanında olacaq. Bu dəfə çempionatın oyununda üz-üzə gələcəksiniz.
- Bizi çox çətin oyun gözləyir. Lakin “İnter” klubunda bu aralar bir qədər inamsızlıq hökm sürür. Mənə elə gəlir ki, biz “İnter”dən üç xal alacağıq. Biz hazırda «İnter»lə matçdan daha çox “Xəzər Lənkəran”la oyunu haqda fikirləşirik. Lənkəranda bizi çətin oyun gözləyir.
- “Bakı”nin çempion olmaq, yoxsa kuboku qazanmaq şansı daha böyükdür?
- Göründüyü kimi,”Bakı” hər iki mükafata iddiasını davam etdirir. Lakin biz daha çox ölkə çempionu olmaq istəyirik. Mən əminliklə deyirəm ki, «Bakı» çempion olacaq!
-“Bakı”nın əsas hədəfi də elə budur.
- Başda prezidentimiz Hafiz Məmmədov olmaqla çox yaxşı kollektivimiz var. Klubda əhval-ruhiyyə çox yüksəkdir. Təbii ki, bu, əsas şərtlərdən biridir. Belə olduqda isə biz çalışacağıq ki, bu il mümkün olan bütün titulları qazanaq.
- Bülənt Qorxmaz “Bakı”dan getdikdən sonra belə bir fikir səslənirdi ki, Jaba da komandanı tərk edəcək.
- Bülənt Qorxmazla mənim çox yaxşı münasibətim olub. Elə indinin özündə də bu münasibət davam edir .O söz- söhbətlər məni artıq maraqlandırmır. Hazırda məni birinci növbədə “Bakı”  klubunun uğurları düşündürür. Mən komandamın uğurları üçün çalışıram.
- Təxminən 6 ilə yaxın Türkiyə superliqasında çıxış etmisiniz. Bilmək istərdik ki, Türkiyə superliqası ilə Azərbaycan premyer liqası arasında oxşar və fərqli cəhətlər nədir?
- Oxşar cəhət budur ki, hər iki ölkədə oyunlar gərgin keçir. Çempionluq mübarizəsi sona qədər davam edir. Fərqli cəhətlər Türkiyədə stadionların daha ideal vəziyyətdə olmasıdır. Həm  azarkeşlərinin sayı çox olur, həm də onlar daha çılğındırlar. İnanıram ki, yaxın vaxtlarda Azərbaycan futbolunun inkişafı özünü yüksək səviyyədə göstərəcək.
-“Bakı” bu il Avropada hansı səviyyədə cıxış edəcək?
- Əgər “Bakı” bu ildə çempion olsa, biz Çempionlar liqasının qrup mərhələsinə vəsiqə əldə edəcəyik. Buna klubda hamı inanır.
- Hakimlərdən şikayətiniz varmı?
-Yox, elə bir şikayətim yoxdur. Lakin Vüsal Əliyevin idarəçiliyi daha çox xoşuma gedir.
- Çempionatın reqlamenti sizi qane edirmi?
- Bu, yaxşı sistemdir. Lakin gələcəkdə on dörd komanda ilə çıxış etsək, daha yaxşı olar. Əvvəlki sistemin bərpa olunmasını istərdim.
- Yeni baş məşqçi ilə münasibətiniz necədir?
- Mənim, ümumiyyətlə, baş məşqçilərlə problemim olmur. Mən öz oyunumu göstərməklə məşqçinin etimadını qazanıram.
- Klubda ən yaxın dostlarınız kimlərdir?
- Bütün oyunçularla xoş münasibətim var. Əsasən braziliyalılar Adriano, Fabio Ramimlə.
- Yerli futbolçularlardan kimin oyununu daha çox bəyənirsən?
- Azərbaycanda xeyli istedadlı futbolçu var. Ən çox  Vaqif Cavadov, Elvin Əliyev, Rəşad Sadıqov və başqalarının oyunlarını xoşlayıram.
- Karyeranızı hansı ölkədə davam etdirmək istərdiniz?
- Əlbətdə ki, Braziliyada, «Flaminqo» klubunda oynamağı arzulayıram.
- Azərbaycan mətbəxi haqqında nə deyə bilərsiniz?
- Sizin mətbəxiniz türk mətbəxinə çox bənzəyir. Bununla belə, mən daha çox Braziliya mətbəxinə
üstünlük verirəm.
- Ailəniz haqqında nə deyə bilərsiniz?
- Hazırda nişanlıyam. İnşallah, iki aydan sonra evlənəcəyəm.
- Azərbaycanda ən çox nəyi bəyənirsiniz?
- Ölkənizin çox gözəl təbiəti var.Ən çox dəniz məni valeh edir.
-“Bakı” klubunun azarkeşlərinə deyəcək  sözünüz var?
-Sözüm odur ki, bizi dəstəkləməkdə davam etsinlər. İnanıram ki, bu il onlara sevinc bəxş edəcəyik.