Ramin Musayev: «Berti Foqtsla, sadəcə, zarafat etmişik»

Peşəkar Futbol Liqasının prezidenti Ramin Musayevin Qol.Az saytına müsahibəsi

- Əvvəlcə ondan başlayaq ki, iki gün əvvəl jurnalistləri qeyri-diktofon söhbətinə yığmışdınız. Bu görüşün məqsədi nə idi?
- Biz həmişə jurnalistlərin fikrinə hörmətlə yanaşmışıq. Onların rəyləri həmişə bizə maraqlı olub. Bu səbəbdən, çempionatın gedişatı ilə bağlı onların düşüncələrini bilmək üçün bir araya gəldik.
- Həmin görüşdə belə bir açıqlama verdiniz ki, növbəti mövsümdə çempionatın formatı dəyişə bilər. Premyer Liqanın bu cür gedişatı sizi qane etmir ki?
- Şəxsən məni qane edir, çempionat maraqlı keçir. Mən həmişə demişəm ki, gəlin, tələsməyək, çempionatın sonunu gözləyək. Əgər böyük çoxluq bu formatdan narazı qalsa, onda dəyişərik, əksinə olsa, bu halda yarışları indiki qaydada da keçirmək olar.
- Bir müddət əvvəl kubok oyunlarına sponsorun tapılması ilə bağlı danışıqlar aparıldığını söyləmişdiniz. Həmin danışıqlar nə yerdə qalıb?
- Alınmadı. Ötən dəfə söylədiyim kimi, bir şirkətlə anlaşmışdıq, lakin həmin qurum Premyer Liqanın sponsoru olan banka qarşı haqsız tənqidləri görüb fikrindən daşındı.
- Yəni artıq tam demək olarmı ki, kubok oyunlarının sponsoru olmayacaq?
- Bəli.
- Bu günlərdə Berti Foqts Azərbaycan çempionatının oyunlarına baxarkən ürəyi ağrıdını demişdi. Sizcə, millinin başa məşqçisi çempionatdan niyə bu qədər narazıdır?
- Məndə olan məlumata görə və mən o insanı yaxından tanıdığım üçün deyə bilərəm ki, o, bu fikri zarafatyana səsləndirib. Berti Foqts peşəkar futbolçu olub, peşəkar məşqçidir. O, heç vaxt haqsız danışmaz. Bu, onun ürəkdən dediyi sözlər deyil.
- Siz də «Berti Foqtsa Maştağa xəstəxanasında yaxşı həkim tapmışam» deməklə zarafat etmisiniz?
- Hə, bu zarafatdır. Berti Foqts çox zarafatcıl adamdır.
- Bəlkə dediyiniz bu zarafatları ciddiyə alan da olub? Bunu fikirləşmədiniz?
- Jurnalistlər də bilir ki, biz zarafat etmişik. İstədilər ki, yazıları maraqlı olsun.
- Ümumiyyətlə, Foqtsla şəxsi münasibətləriniz hansı səviyyədədir?
- Vallah, çox normaldır. Həmişə görüşüb səmimi söhbət edirik. Şəxsən mən o adamdan razıyam. Ən vacibi odur ki, milli komandada intizam yaradıb, futbolçular ona hörmət edir. Bir insan kimi də qayğıkeşdir. Futbolçunun zədəsi və ya hansısa şəxsi problemi olanda dərhal maraqlanır. Mən gördüyümü deyirəm. Berti Foqtsla aramızda heç vaxt intriqa olmayıb və ola da bilməz. Mən ona yaltaqlanmıram ki… Olanı deyirəm. Milliyyətindən asılı olmayaraq, hər bir yaşlı insana hörmətlə yanaşmışam. Berti Foqtsa isə həm yaşına, həm də işinə görə hörmət edirəm. Çünki milli komandada ürəklə işləyir. Ən vacibi odur ki, nəsə etmək istəyir.
- Amma bir çox klub Foqtsdan narazıdır. Bildirirlər ki, millinin təlim-məşq toplanışlarının vaxtı uzun sürür, bu səbəbdən çempionatda lüzumsuz yerə fasilə yaranır.
- Foqts futbolçuları təkrar-təkrar yoxlamaq istəyir. Bizim futbolçular hələ tam yetişməyiblər ki, 3-4 günə də nəsə edə bilsinlər. Hələ ki, bir-birilərini çox çətin başa düşürlər. O Avropadadır ki, futbolçuların 90 faizi bərabər səviyyəli komandalarda oynayır. Millimizin üzvləri bir yerdə çox olanda çatışmazlıqlar da aradan qalxır. Foqts milliyə layiq olan hər bir futbolçunu komandaya çağırır. Bir sözlə, belə təlim-məşq toplanışlarının milliyə ziyanı yoxdursa, niyə də olmasın? Yerli klubları da başa düşürəm. Amma unutmayaq ki, çempionat həm də millinin inkişafı, güclənməsi üçün keçirilir.
- Deməli, siz Berti Foqtsun bu addımını dəstəkləyirsiniz?
- Bəli.
- Foqtsla yanaşı ölkəmizdə çalışan daha bir ünlü futbol adamı - Bülənt Qorxmaz da Premyer Liqanın səviyyəsindən razılıq etmir, oyunlara marağın az olmasından şikayətlənir.
- Bülənt Qorxmaz futbolçu olanda 30-40 min adamın qarşısında oynayıb. Onun dediyində həqiqət də var. Məşqçilər, futbolçular istəyir ki, oyunlara çox adam gəlsin. Stadionda nə qədər çox azarkeş olsa, futbolçular daha yaxşı oynayarlar. Amma axı, PFL-in, AFFA-nın azarkeşi yoxdur ki, oyunlara göndərsin. Biz ki, azarkeş yetişdirmirik. Hər futbolçunun, hər məşqçinin özünün ən azı 100-200 azarkeşi olmalıdır. Təkcə bir futbolçuya görə stadiona bu qədər adam gəlsə, görün tribunalara nə qədər adam toplaşar. Götürün, Ağasəlim Mircavadovu. Təkcə onun və komandasının oyununda nə qədər ajiotaj olur.