"Millidə oynamaq istəyirəm" - "Bakı"nın futbolçusu

“Bakı”nın müdafiəçisi Vüqar Bəybalayev klubun rəsmi saytına müsahibə verib. Qol.az həmin müsahibəni təqdim edir:

- “Bakı”ya gəlişini necə xatırlayırsan?

- İlk dəfə Məqsəd Yaqubəliyev əvəzedici heyətın baş məşqçisi işlədiyi vaxt baxışa gəldim. İlk məşqdən sonra Məqsəd müəllim bundan sonra bizimlə olacaqsan dedi. Bundan bir ay sonra Gürcüstana Batumidəki təlim-məşq toplanışına sənədləri hazırlamağı tapşırdı. Beləliklə klubun üzvünə çevrildim.

- Premyer Liqada debütun Bakıda yox, Tovuz “Turan”ında olub. Bu necə alındı?

- Əvəzedici heyətdə “Turan”a qarşı oyunda “Turan” rəhbəliyi oyunumu bəyənərək klub rəhbərliyi ilə razılığa gəlib məni istəmişdi. Rəhbərlik və məşqçilər heyəti mənə ora getməklə böyük futbola, Premyer Liqaya qalxmaq üçün yaxşı fürsət yarandığını bildirdilər. Mən də düşünmədən dərhal bu təklifi qəbul etdim. Ertəsi gün icarə əsasında Tovuza yollandım. Premyer Liqada debütüm də bu klubun heyətində baş tutdu.

- “Turan”dan qayıdandan sonra bir müddət ehtiyatda qalırdın. İbrahim Uzuncanın baş məşqçi təyinatından sonra daim əsas heyətdə çıxış edirsən. “Bakı” carı çempionatda əsasən klubun akademiyasında yetişmiş, oyun praktikası az olan gənclərə güvənməklə milli çempionata yeni bir etalon gətirdi. Bu komanda ilə çempionata uyğunlaşmaq sənin üçün necə keçdi?

- Düzün desəm, ilk matçlarda hər birimizə bir qədər çətin idi. Premyer liqada oynamaq üçün az da olsa, vaxt lazım idi. Göründüyü kimi bir neçə oyun keçirdikdən sonra komandamız xallar qazanmağa başladı. Komandadakı gənclər əvəzedicilərin çempionatında bir yerdə oynayıb. Çoxumuz İbrahim Uzuncanın rəhbərliyi altında çempion olmuş komandadanıq. Bu amillə yanaşı təcrübəli azərbaycanlı və legionerlərimizin də yaxşı oyunçu olmasının uğurlarımızda böyük rolu olduğunu düşünürəm. Gənclərlə çıxış etmək nə qədər çətin olsa da, bu, özünü doğrultmaqdadı.

- İlk dövrə arxada qalıb. Ən çətin oyun hansı oldu?

- Qırmızı vərəqəyə görə buraxdığım matçdan başqa, Premyer Liqanın bütün oyunlarda iştirak etmişəm. Çempionatda asan oyun və komanda yoxdur. Bütün oyunlar çətin keçir.

- Bildiyin kimi 2020-ci ildə keçiriləcək futbol üzrə Avropa çempionatının 4 oyunu Azərbaycanda oynanılacaq. Bu vaxta qədər milli komandamızda nəsil dəyişəcək. Millidə oynamaq, Bir gənc kimi Avropa çempionatına qatılmaq şanslarını necə görürsən?

- 4 qarşılaşmanın ölkəmizdə keçirilməsi çox gözəl haldır. Millimizi də həmin Avropa çempionatında görmək istərdim. O vaxta kimi millidə oynamaq şərəfinə nail olmağı arzulayıram. Bunun üçün çox çalışacağam.

- “Qarabağ” UEFA kubokunda səfərdə “Dnepr”i məğlub etməklə bütün Avropanı təəccübləndirdi. Komandamızın növbəti mərhələ şanslarını necə görürsən?

- “Qarabağ” ölkəmizi indiyə kimi layiqincə təmsil edib. Bundan sonra da elə olacağına şübhəm yoxdur. Növbəti mərhələyə cıxmaq şansı var və bunu bacaracaqlarına inanıram.

- Akademiyadakı yeniyetmələrə tövsiyyələrin…

- Akademiyadakı yeniyetmələrə ilk öncə nizam-intizama fikir vermələrini, böyük-kiçik bilmələrini, həmişə böyüklərə hörmət etmələrini tövsiyə edirem. Birdə ki, çoxlu əlavə məşq etməyi unutmasınlar.

- “Bakı”nı çətin vəziyyətdə tək qoymayan azarkeşlərə nə deyə bilərsən?

- Meydanlara gələn və ya gəlməyib bizi dəstəkləyən hər bir kəsə öz təşəkkürümü bildirirəm. Hər oyun meydanda komandamızı tək qoymayan “The Capital” azarkeş qrupunun hər bir üzvünə xüsusi minnətdarlığımı bildirirəm.