DÇ-2014: Hansı milli “Quran” istədi?

İyunun 12-də başlanacaq dünya çempionatında iştirak edəcək 32 milli komandanın turnirə ev sahibliyi edəcək Braziliyadan xüsusi istəkləri var.

Qol.Az xarici KİV-lərdə çıxan yazılara istinadən verdiyi məlumata görə, komandalar turnirə daha yaxşı hazırlaşmaq və rahatlıq üçün təşkilatçılar istəklərini yerinə yetirməyi xahiş ediblər.

Portuqaliya: Futbolçuların qalacağı otelin hər bir otağında  "Playstation" oyun aparatı olmalıdı. Bundan başqa, futbolçuların qaldığı otelin mərtəbəsində təhlükəsizliyi  24 saat qorumaq üçün altı mühafizəçi tələb edilib. Bu mühafizəçilərdən ikisi komandanın lideri Kriştiano Ronaldonu qoruyacaq.

Fransa: Otaqlarda iki fərqli duru sabunun olması istənilib. Sabunlarından birindən oyunçular əllərini yuyacaq, digərindən isə duşda istifadə edəcək. Fransa Futbol Federasiyası həmçinin, futbolçuların qalacağı bütün otaqların eyni rəngdə olmasını istəyib.

Uruqvay: Yeganə istəkləri otel otaqlarında səssiz işləyən havalandırma sisteminin olmasıdır.

Əlcəzair: Futbolçuların qaldığı hər otaqda "Qurani Kərim" olmalıdır.

Ekvador: Ölkənin futbol federasiyası futbolçuların dincəlməsi üçün xüsusi otaq tələb etməklə yanaşı, oyunçuların otaqlarında hər gün Ekvadordan gətirilən bananlardan ibarət səbətin yer almasını istəyib.

İngiltərə: Yalnız onlara xidmət edəcək üç fərqli restoran istəyib. Başqa tələb icində üç televizor olmaqla xüsusi videooyun otağının hazırlanmasıdır. Hovuz, idman salonu və otaqların balkonunun olması da istəklər sırasında yer alıb.

Honduras: Otaqların iki Honduras və  6 İspaniya kanalını göstərən televizorlarla təmin olunması istənilib.

Yaponiya: Yeganə istək hər otaqda cakkuzinin olmasıdır.

Avstraliya:  Oyunçuların otaqlarında iki ədəd böyük qəhvə hazırlayan aparatın olmalıdır.  Dünyanın ən məşhur qəzetləri hər gün otaqlara gətirilməlidi. Bundan başqa onlar üçün Braziliyada kəsilən təzə ət, balıq və toyuqdan yeməyin hazırlanması istənilib. Yeməklər buxarda bişirilməlidir.

Bosniya və Hersoqovina: Oyunçular və məşqçilərin  danışıqlarının bir-birinə qarışmaması üçün restoranın akustikası yaxşı olmalıdır.

İsveçrə:  Hər otaqda yüksək sürətli internet olmalı və İsveçrə kanalları göstərilməlidir.

Çili: Oyunçuların qalacağı otaqlarda yaxşı yataqların və LCD televizorların olmasını tələb edib.

Kosta-Rika: Kresloların da olduğu geniş istirahət otağı istənilib. Bundan başqa, televizor, video oyunların olduğu otaq da olmalıdır.

Kolumbiya: Bu ölkənin futbol federasiyasının istəyi isə daha fərqlidir. Onlar komandanın məşqlərində iştirak etmək üçün 15 gənc futbolçu tələb edib. Onlara şanslı futbolçu da demək olar.