Valentin Xodukin: “Mən “Bakı” və “Qarabağ” haqda düşünmürəm”

“İnter”in baş məşqçisi Valentin Xodukinin Qol.Az-a müsahibəsi

- “Bakı”ya məğlubiyyətdən sonra komandada əhval-ruhiyyə necədir?
- Komandada ab-hava normaldır. Düzdür, son turdakı oyunun nəticəsi bizi qane etmədi. Amma nə etmək olar? Futboldu, burada hər bir nəticəylə qarşılaşmaq mümkündür. Düşünürəm ki, məğlubiyyət istənilən komandaya pis təsir edir. Buna baxmayaraq, qarşıdakı oyunlara baxırıq. Çalışacağıq ki, “Bakı”yla matçda buraxdığımız səhvləri təkrarlamayaq. 
- Həmin oyunun nəticəsini ədalətli hesab edirsiniz?
- Düşünürəm ki, “Bakı”yla oyunda məğlubiyyətə layiq deyildik. Çünki biz onlardan daha çox qol şansı yaxalamışdıq. Lakin imkanlarımızı dəyərləndirə bilmədik. Bunun da nəticəsində meydanı xalsız tərk etdik.
- “Qəbələ”ylə oyunun hazırlığı necə gedir?
- Elə bir dəyişiklik yoxdur. Plan üzrə hazırlıqlarımızı davam etdiririk. Məşqlərimiz normal keçir. Daha əvvəlki kimi gündə 2 dəfə məşq edə bilmirik. Çünki hazırda təqvimdə bir qədər sıxlıq yaranıb. Kubok oyunları da olduğundan, bəzən 3-4 gündən sonra yenidən meydana çıxmalı oluruq. Buna görə də gündə yalnız 1 məşqlə kifayətlənirik.
- Heyətlə bağlı probleminiz yoxdur ki?
- Yox, nə problemimiz ola bilər ki? Heyətimizdə kifayət qədər futbolçu var. Buna görə də oyunçu sarıdan korluq çəkmirik. Heyətimiz geniş olduğundan, meydana daha hazırlıqlı olanları buraxırıq. Heç kim əvəzedilməz deyil. Zədəlilərə gəldikdə, yalnız Vladimir Leviuin bu baxımdan problemi var. Onun durumu yavaş-yavaş düzəlir. Başqa heç bir itkimiz yoxdur.  
- Rəqib haqda nə deyə bilrsiniz?
- “Qəbələ” zəif komanda deyil. Son turda səfərdə “Neftçi”ylə bərabərə qaldılar. Komandanın heyətində maraqlı futbolçular var. Digər tərəfdən də bu komandaya qarşı matçlarımız həmişə çətin keçir. Budəfəki oyunun da istisna təşkil etməyəcəyinə əminəm. Bununla belə, biz səfərə qələbə üçün yollanacağıq.
- “Qəbələ”nin oyununu izləmisiniz?
- Onların son turda “Neftçi”yə qarşı matçına baxdım. Həmin oyunda heç də pis təsir bağışlamadılar. Nəticəyə oynamağı bacarırlar. Rəqib haqda məlumatsız deyiləm, müəyyən təsəvvürlərim var.     
- Belə bir fikir səslənir ki, “Bakı”ya məğlubiyyətdən sonra “Qəbələ”ylə matçda “İnter”in xal itirməyə haqqı yoxdur. Əks halda komanda çempionluq şansını azalda bilər. Bu fikirlə razısınız?
- Yox. Mən bu cür fikirləri qəbul edə bilmirəm. Hansı komandanın xal itirməyə haqqı var ki? Və ya hansı komanda xal itirmək istəyir ki? İstər lider olsun, istərsə də autsayder - hər bir komanda meydana yalnız qələbə, 3 xal üçün çıxır. İnanmıram ki, hansısa komanda meydana uduzmaq üçün çıxsın. Ona görə də bu cür fikirləri qəbul etmirəm. Düzdür, “Qəbələ”ylə oyunda meydana yalnız qələbə üçün çıxacağıq. Amma mən deyə bilmərəm ki, biz onları yüp faiz məğlub edəcəyik. Futbol gözlənilməz nəticələrlə zəngindir. Oyunda istənilən nəticə qeydə alına bilər. Kim güclüdürsə, o da qalib gələcək. Amma təbii ki, biz “Qəbələ”ni məğlub etməyə çalışacağıq. Nəticəni isə yalnız qarşılaşma başa çatdıqdan sonra tam dəqiq demək mümkündür.
- Çempionatın lideri və qızıl medallar uğrunda əsas rəqibiniz olan “Bakı” “Qarabağ”la qarşılaşacaq. Bu matç haqda nə düşünürsünüz?
- Heç nə düşünmürəm. Çünki bu mənim işim deyil.