Bu sual "Tottenhem"in baş məşqçisini əsəbiləşdirdi

Bu sual "Tottenhem"in baş məşqçisini əsəbiləşdirdi
XƏBƏR 9 May 2025 / 11:57 1851
-  A +

“Tottenhem”in baş məşqçisi Angelos Postekoqlu Avropa Liqasının yarımfinalının "Budo-Qlimt"lə cavab matçından sonra mətbuat konfransındakı açıqlaması ilə gündəmə gəlib.

QOL.az xəbər verir ki, onun komandası rəqibini ilk görüşdə 3:1, cavab oyununda isə 2:0 hesabı ilə məğlub edib. London klubu turnirin finalında İngiltərənin digər təmsilçisi "Mançester Yunayted"lə qarşılaşacaq.

"Budo-Qlimt"lə cavab matçından sonra jurnalistlərdən biri Postekoqluya belə bir sual ünvanlayıb: “Mançester Yunayted”in baş məşqçisi deyir ki, Avropa Liqasında qalib gəlmək onlar üçün mövsümü xilas etməyəcək... Bəs bu, “Tottenhem”in mövsümünü xilas edəcəkmi?"

Həmin sual Postekoqlunu əsəbiləşdirib. O, belə cavab verib: "Mənə əhəmiyyətli deyil. “Mançester Yunayted”in nə düşündüyü məni niyə maraqlandırmalıdır? Bunun mənə nə dəxli var? “Mançester Yunayted” baş məşqçisindən niyə belə dediyini soruşun. Əvvəldən dedim ki, Avropa Liqası bizim üçün vacibdir. Bunu siz məndən yaxşı bilirsiniz. Klubu çoxdan izləyirsiniz. Sizcə, kubok bu klub üçün nə deməkdir? Hal-hazırda bəzi insanlar "Tottenhem"in kubok qazanacağından həqiqətən qorxurlar. Onlar bu inamı azaltmağa, yoxa çıxarmağa çalışırlar və bizi “Mançester Yunayted”lə müqayisə etməyə başlayırlar”.

Qeyd edək ki, Avroliqanın final oyunu mayın 21-də Bilbaodakı "San Mames Stadium"da keçiriləcək.


Son xəbərlər