Mahmud Qurbanov: “Xəzər-Lənkəran”a qol vurmağa məcburam»

Sabah futbol üzrə ölkə kubokunun ¼ final mərhələsinin ilk oyunu çərçivəsində “Bakı” “Xəzər-Lənkəran”ın qonağı olacaq. Oyun ərəfəsində «Bakı»nın yeni transferi Mahmud Qurbanov Qol.Az saytına müsahibə verib

- “Bakı” “Xəzər-Lənkəran”la oyun necə hazırlaşıb?
- Biz hər görüşdə olduğu kimi, bu dəfə də qələbə qazanmaq arzusundayıq. Kubok oyunu iki matçın nəticəsinə görə hesablanır. Yarımfinala çıxmaq üçün ilk oyunda qələbə qazanmaq istəyirik.
- Rəqibin gücü sizi qorxutmur?
- Doğrudur, “Xəzər-Lənkəran” iddialı komandalardan biridir. Amma “Bakı”da bunlardan geri qalmır. Bu səbəbdən görüşün maraqlı keçəcəyini düşünmək olar. Açığı, bizim üçün çətin oyun olacaq. Çünki «Xəzər-Lənkəran»ın güclü azarkeş dəstəyi var.
- Ən güclü azarkeş dəstəyinə malik bir komandaya qarşı oyunda problem yaşamayacaqsınız ki?
- Bizim futbolçuların hamısı çoxlu azarkeş dəstəyi altında oynamağı bacaran oyunçulardır. Bir də yalnız qələbə barədə düşünəcəyik. Bu istəyimizi gerçəkləşdirmək üçün son dəqiqələrə qədər mübarizədə olmalıyıq.
- “Xəzər-Lənkəran”da sənin keçmiş komandan sayılır...
- Düzdür, “Xəzər-Lənkəran”la mənim maraqlı xatirələrim var. Karyeramın yaxşı çağlarının bir hissəsi bu klubun payına düşür. Lənkəranlı fanatlarla isə münasibətim indi də var. Amma nə etmək olar? Mən peşəkar futbolçuyam. Bir gün “Xəzər-Lənkəran”da, başqa gün isə “Bakı”da oynayıram. Hazırda paytaxt təmsilçisinin formasını geydiyim görə layiqli çıxış etməliyəm.
- “Xəzər-Lənkəran”ın qapısından qol keçirsən, keçmiş komandanın azarkeşlərinin üzünə baxmağa utanmarsan?
- Hər halda azarkeşlər məni başa düşərlər. Axı, mən rəqib komandanın şərəfini qoruyuram. “Xəzər-Lənkəran”ın qapısından qol keçirməyə məcburam. Axı, “Bakı”lı azarkeşlərin də məndən istəyi var.
- “Bakı” ölkə kubokunu qazana biləcək?
- Bizim məqsədimiz həm kuboku qazanmaq, həm də çempion olmaqdır. Bunun üçün mübarizəmizi ciddi davam etdiririk. Amma indidən bir şey demək düzgün olmaz.
- Premyer-liqadan söz düşmüşkən, “Bakı”nın ikinci dövrədə keçirdiyi oyunlar haqda fikirlərin maraqlı olar?
- İkinci dövrədə cəmi iki tur geridə qalıb. Qarşıda bizi güclü komandalarla oyun gözləyir. Əsas məsələ onlarla matçda qələbə qazanmaqdır.
- “Bakı”ya hansı komandaları əsas rəqib sayırsan?
- “Karvan”, “Xəzər-Lənkəran”, “Simurq” kimi klublarla maraqlı və gərgin oyunlarımız olacaq.
- Ölkə çempionatının 16-cı turunda “İnter”ə qarşı oynayacaqsınız. Keçmiş komandanla oyuna necə hazırlaşırsan?
- Hər görüşə necə, bu oyuna da elə hazırlaşıram. “İnter” mənim keçmiş komandam olmasına baxmayaraq, ona rəqib gözlə baxıram. “Bakı”nın həmin oyunda qələbə qazanması üçün layiqli mübarizə aparacağam.
- “İnter”dən ayrılanda bəzi problemlə yaşadın. Baş məşqçi Valentin Xodukinə nəsə sübut etmək istəyirsən?
- Nəyi sübut edəcəyəm? Məni tanıyanlar necə futbol oynadığımı, hazırlığımın hansı səviyyədə olduğunu yaxşı bilirlər. Buna görə kiminləsə artıq danışmaq istəmirəm. Mənim oyunumu bəyənməyənlərə sözüm yoxdur.
- Artıq “Bakı”nın heyətində iki tur əsas heyətdə oynamısan. Öz oyunundan razısan?
- Qoy, bu suala cavabı azarkeşlər versin, mənim oyunuma baxan mütəxəssislər münasibət bildirsin.
- Milli komandamız barədə də soruşmaq yerinə düşərdi. Baş məşqçi Berti Foqts “İnter”də ehtiyatda oturduğun üçün səni komanda çağırmırdı. İndi isə “Bakı”da əsas oyunçulardan birisən...
- Vallah nə deyim? Berti Foqts kimi istəyirsə, onu da əsas komandaya çağırır. Hər halda, görünür, məni hələ hazır saymadığı üçün milli komandaya dəvət etmir.