Hüseyn Məhəmmədov: “Legioner futbolçular bizə ancaq ziyan verir»

 “Standard” komandasının qapıçısı Hüseyn Məhəmmədovun Qol.Az saytına müsahibəsi

- Hüseyn, gec də olsa “Standard”ın “Neftçi” ilə oyunu barədə sənin fikirlərini öyrənmək istərdik.
- Biz Prmeyer Liqanın birinci dövrəsində “Neftçi”ni məğlub etmişdik. Bu dəfə də qələbə bizim olacaqdı. Amma son dəqiqələrdə müdafiəmizdəki boşluq üzündən qol buraxdıq. “Neftçi»lə oyun ya bizim qələbəmiz, ya da heç-heçə ilə başa çatmalıydı. Ancaq alınmadı..
- Növbəti rəqibiniz “İnter”dir. Səncə, komandanız çempiona qarşı necə mübarizə aparacaq?
- Hər oyuna olduğu kimi, bu dəfə də qələbəyə oynayacağıq. Bu oyuna çox ciddi yanaşırıq. Çünki rəqib çox güclü komandadır. Premyer-liqanın son çempionudur. Amma çalışacağıq bu oyunda xal ala bilək. Bu, bizə vacib lazımdır.
- “Standard”ın nə çempion olmaq, nə də ölkə kubokunu qazanmaq üçün şansı var...
- Düzdür, bizim mükafatçılar sırasına düşmək imkanımız yoxdur. Amma o demək deyil ki, biz xal paylaya-palaya gedəcəyik. Komandamızın ilk 5 yerdən birini qazanması mümkündür. Bu gün “Standard”ın bu nəticəni qazanması çox yaxşı olar. Çünki komandamız gəncdir. Uğur qazanması, ölkəmizi Avropada təmsil etməsinə təkan verə bilər.
- “Standard”ın birinci dövrədə çempionata yaxşı başlamışdı. Lakin sonradan oyunlarda xal itirdi. Bunun səbəbini nədə görürsən?
- Bu gün də biz yaxşı oyun göstəririk. Amma futbolda hər şey olur. Yəni bu gün bir komandanı məğlub edirsənsə, sabah onunla oyunda uduza bilərsən. Bir sözlə, komandanın hər dəfə qələbə qazanması mümkün deyil. “Neftçi” ilə birinci dövrədə oyunumuz əla oldu. Buna görə onları məğlub etdik. İkinci dövrədə isə bərabər səviyyəli oyun olsa da, onları qələbə qazandı.
- Bəzi komandalar var ki, onlar yerli futbolçulara deyil, əcnəbilərə daha çox şans verir. Buna münasibətiniz necədir?
- Açığı, mən yerli futbolçuların oynamasının tərəfdarıyam. Əcnəbilərin çoxluğu bizim futbola bir xeyir verməyəcək. Buna hamımız inanmalıyıq. Legionerlərin çoxluğu milli komanda üçün də pis haldır. Əgər əcnəbilərə limit tətbiq olunsa, yerli oyunçuların sayı artar. Bir də bizim futbolçular daha əzmkar mübarizə aparırlar. Azərbaycan futbolunun inkişafı naminə əllərindən gələni edirlər. Bir sözlə, əcnəbilərin bizlərə ancaq ziyan verir. Legioner olar, amma uzağı hər oyunda beş nəfərə. Onlarda səviyyəli olmalıdır. Bu gün Azərbaycanda səviyyəli əcnəbi çıxış etmir. Elə götürək  “Neftçi”də oynayanları. Onların hazırlığı nə vəziyyətdədir. Səviyyələri çox aşağıdır. Belələrinin olmağındansa, olmaması məsləhətdir.
- “İnter” komandasında isə yerli futbolçular barmaqla göstərilir. Onlarda ehtiyat skamyada otururlar...
- Onların işlərinə qarışa bilmərəm. Ümumi götürəndə isə bu gün klublarımız Azərbaycan futbolunu fikirləşmirlər. Limit məsələsində AFFA-nı da günahkar saymaq olmaz. Çünki onlar Azərbaycan futbolunun inkişaf etməsini istəyirlər. Hər halda legionerlərə limit qoyulmaması müvəqqəti bir prosesdir.
- Təcrübəli bir futbolçu kimi milli komandanın Dubaydakı təlim-məşq prosesində keçirdiyi oyunları barədə nə deyərdin?
- Küveytlə oyuna ərəb kanalında baxdım. Millimizdə futbolçu çatışmazlığı var. Yerlilər azdır. Onlarında təcrübəsi kifayət qədər deyil. Məşqçi də seçim etməkdə problemlə üzləşir. Bunun üçün klublarımızda legionerlər deyil, yerli oyunçular oynamalıdır.
- Qarşıda milli komandamızı Rusiya oyun gözləyir. Bu barədə nə deyərdin?
- Rusiya ilə müqayisədə bizim səviyyəmiz çox aşağıdır. Onların futbolçuları Avropanın öndə gedən klublarında oynayırlar. Buna görə oyun çox çətin olacaq. Onlara gücümüz çatar və ya çatmaz, bunu dəqiq deyə bilmərəm. Amma lazımi nəticəni qazanmaq üçün sona qədər mübarizədə olmaq vacibdir.