"Rahat qrupa düşdüyümüzü demək olmaz" - Mahir Mədətov

Azərbaycan millisinin hücumçusu Mahir Mədətov Moldova ilə yoldaşlıq görüşü öncəsi jurnalistlərin suallarını cavablandırıb.
 
- Milli komanda yanvarın 27-dən təlim-məşq toplanışındadır. Məşqlər necə keçir? Yığmada atmosfer necədir?
 
- Bu Qurban müəllim ilə birinci təlim-məşq toplanışıdır. Atmosfer olduqca yaxşıdır. Futbolçular həm bir-biri ilə həm də baş məşqçi ilə tez bir zamanda uyğunlaşdılar. İndi məşqlərə vərdiş alsaq da, bura milli komandadır. Futbolçularda hazırlıq prosesinə vərdiş yaranmalıdır. Sabahkı oyunu düşünürük. Qələbə ilə başlamaq istəyirik. Çox uğurlara imza ata bilərik.
 
- Klubun və millinin təlim-məşq toplanışında nəsə fərqlilik hiss edirsinizmi? Yoxsa hamısı sizə eyni gəlir?
 
- Məşqçinin xarakterinə bələdik. Klubla milli komanda tam başqadır. Millidə çalışmaq lazımdır ki, uğur əldə edək. Buranın atmosferi klubdan fərqlənir. Klubda 100 faiz çalışırsansa, burda 200 faiz çalışmalısan. Hər kəsin gözü səndədir və səndən uğur gözləyirlər. Ona görə bura həm baş məşqçi, həm də biz başqa cür yanaşırıq.
 
- Bizimlə oyundan öncə Moldova Cənubi Koreyaya məğlub oldu. Bu oyuna baxmısanmı? Moldovanın hazırkı durumu haqda məlumatınız varmı?
 
- Bu gün məşqdən öncə iclas oldu. Oyunu izlədik. Biraz məlumat aldıq. Sabah da oyundan öncə məlumat veriləcək.
 
- Millətlər Liqasında rəqiblər bəllidir. Bu barədə nə deyə bilərsiniz?
 
- Rəqibləri zəif görməyi sevmirəm. Hər bir komandanın öz gücü var. Rahat qrupdur demək olmaz. Qrupdan çıxmaq şanslarımız da var. Bunu üçün çalışmalıyıq.
 
- Millətlər Liqasından başqa seçmə mərhələ oyunları da var. Gücümüz çatacaqmı?
 
- Biz gücümüzü bölüşdürməyi bacaracağıq. Bayaq da qeyd etdim klubda 100 faiz çalışırıqsa, millidə 200 faiz çalışmalıyıq ki, uğur əldə edə bilək. Bacardığımızdan artığını etmək lazımdır.
 
- Milli komandanın "Qarabağ”ın sistemi ilə oynayacağı gözlənilir. Bu klubun üzvləri üçün bir üstünlükdür?
 
- Sözün düzü, o barədə düşünməmişəm. Eyni sistem ola bilər. Amma orda neçə ildir bir yerdə oynayırıq. Burda isə fərqli klublarda çıxış etdiklərimiz var. Uyğunlaşmalıyıq. Klubda bunu yaxşı bacardıq. Düşünürəm ki, burda da bacaracağıq.
 
- Əvvəlki illərlə müqayisədə hücum xəttində problem var. Ramil Şeydayev və Ruslan Qurbanov oyun praktikasının azlığından əziyyət çəkirlər. Hazırkı durumda yük sizin üzərinizə düşür...
 
- Yığmada hansı mövqedə oynayacağımı mən də bilmirəm. Amma harda çıxış etməyimdən asılı olmayaraq, bütün gücümü meydana qoyacam. Yəqin ki, mövqeyimlə bağlı böyük dəyişiklik olmayacaq. Çünki adətən yarımmüdafiənin sol cinahında və ya hücumda çıxış edirəm.
 
- Bir ara məlumat yayıldı ki, sizinlə Almaniya klubları maraqlanır. Bu informasiya nə dərəcədə doğrudur?
 
- Mən də bunu mətbuatdan oxudum. Real bir şey olanda kluba müraciət edilir.
 
- Reallıq budur ki, ən azı mövsümün sonuna qədər "Qarabağ”dasınız?

- Bəli.

Mənbə: sportnet.az