"Dedilər, Tərlan Əhmədov səninlə işləmək istəmir" - Elşad Əhmədov

“Neftçi”nin əvəzedici komandasından ayrıldıqdan sonra birinci divizion təmsilçisi “Xəzər”in baş məşqisi təyin olunan Elşad Əhmədov Qol.az saytına müsahibə verib. Təcrübəli mütəxəssis həm sabiq klubundan ayrılmasından, həm də yeni təyinatından danışıb.

- İlk sualım “Neftçi” ilə bağlı olacaq. Bu komandadan niyə ayrıldınız?

- Bu cür dəyişikliklər məşqçi həyatında tez-tez baş verən hallardır. Dünən məni bazaya çağırıb, söhbət etdilər. Dedilər ki, Tərlan Əhmədov səninlə işləmək istəmir. Mən də dedim ki, çox yaxşı. Onsuz mən də onunla işləmək istəmirdim. Rəhbərlik məni akademiyanın rəhbəri təyin etmək istəyirdi, razılaşmadım. “Neftçi”dən bu cür ayrıldım. 7 ildir “Neftçi”nin əvəzedici komandasında işləyirdim. Artıq mənim yerim əsas komanda idi. Ora isə təyin olunmaq şansım az idi.

- Bəs “Xəzər” variantı necə yarandı?

- “Neftçi”dən ayrıldıqdan sonra “Xəzər”in baş meneceri Gündüz Abbaszadə və icraçı-direktoru Emin Abbasovla görüşdüm. Bu işi onlar mənə təklif etdilər. Müəyyən müzakirələrdən sonra razılıq verdim.

- İddialı klublarda çalışan bir çox mütəxəssislər birinci divizionda işləməyi karyeralarında geri addım kimi dəyərləndirirlər. Siz necə düşünürsünüz?

- Mənə birinci diviziondan çox təklif olub. Mən də fikirləşirdim ki, aşağı dəstə mənim üçün geri addım olar. Çünki orada perspektiv az olur. Amma “Xəzər” rəhbərliyi ilə danışdıq. Gördüm ki, gələcəklə bağlı yaxşı planları var. İddialı komanda yaratmaq istəyirlər. Müəyyən söhbətlərdən sonra fikirləşdim ki, niyə də olmasın.

- Dediniz ki, rəhbərliklə artıq söhbətiniz olub. Maraqlıdır, qarşınıza bu mövsüm üçün hansısa hədəf qoyulubmu?

- Rəhbərliklə bu barədə konkret söhbətimiz olmayıb. Sadəcə, Emin müəllimlə danışmışıq. O, mənə dedi ki, iddialı komanda yaratmaq, “Xəzər”i yaxşı yerlərə yüksəltmək istəyirik. Əsas məqsəd gələcəyin komandasını yaratmaqdır. Birdən-birə çempion olmaq mümkün deyil. Hər şeyə yavaş-yavaş nail olmaq lazımdır.

- “Xəzər” hazırda 16 xalla 8-ci pillədədir. Necə düşünürsünüz, işiniz çətin olmayacaq?

- İlk pilləni kənara qoyuram. İkinci yerdəki komandadan cəmi 5 xal geridəyik. Birinci növbədə komandanı formalaşdırmalıyıq. Bundan sonra əlimizdəki materiala uyğun plan cızacağıq. Əvvəlcə yaxşı kollektiv yaratmalıyıq ki, istədiyimiz nəticə uğrunda vuruşa bilək. Bilirsiniz ki, “Xəzər” çempionatın startına 2-3 gün qalmış yığılmış komandadır. Bəzi çətinliklər olacaq. Mən həmin çətinlikləri bilib gəlmişəm. Əvvəlcə bunu aradan qaldırmaq lazımdır. Yükün altına girmişiksə, işləməliyik.

- Komanda ilə tanış olmusunuz?

- Tanışlıq olmayıb. Sadəcə, siyahını görmüşəm ki, heyətdə kimlər var.

- Heyətlə bağlı böyük dəyişiklər olacaq, yoxsa...?

- Əlbəttə, olacaq. Normal komanda yaratmaq istəyiriksə, dəyişikliklər olmalıdır.

- Köməkçilərinizi müəyyənləşdirmisiniz?

- Bununla bağlı söhbət gedir. Amma hələ dəqiq bilinmir.

Elnur SALAHOV