"Bakı-2015" mükafata layiq görüldü

XƏBƏR 22 Aprel 2015 / 21:29 1839

- A +

"Bakı-2015" Avropa Oyunları və dizayn üzrə tərəfdaşı "SomeOne” şirkəti, ötən gecə London-Breveridə keçirilən mötəbər 2015 Transform Avropa Mükafatının vizual elementlərdən ən yaxşı istifadə nominasiyası üzrə birincilik qazanıb.

Qol.Az-ın məlumatına görə, Transform Avropa Mükafatı sabah "Bakı-2015" Avropa Oyunları Əməliyyat Komitəsinin (BAOƏK) ofisinin foyesində Azərbaycan Respublikasının gənclər və idman naziri, BAOƏK-nin baş icraçı direktoru Azad Rəhimova təqdim ediləcək.

Transform mükafatları müəyyən nominasiyalar üzrə yaradıcı, strateji və kommunikasiya prosesi zamanı irəli sürülən ən uğurlu ideyaları qiymətləndirərək, bütün Avropada brendləşdirmə sahəsində əldə olunmuş ən yaxşı nəticələrin təntənəli şəkildə qeyd olunmasıdır.

Azərbaycanın təbii gözəlliyindən ilhamlanan rəngarəng və valehedici "Bakı-2015" brendi Birinci Avropa Oyunlarının arenaları, biletləri, uniformaları və bütün rəsmi əmtəə avadanlıqlarının üzərində əks olunur.

Brendin mərkəzində Azərbaycan folklorunda birliyin təcəssümü olan nar ağacı yer alır. Ağacın müxtəlif idman növlərinin göz oxşayan piktoqramlarla işlənən hissələri ölkənin irsinin və mədəniyyətinin tarixi simvollarıdır.

"Bakı-201"-in əməliyyatlar üzrə baş direktoru Saymon Kleq bildirib ki,bu mükafat Birinci Avropa Oyunları üçün görülən hazırlıqlara verilən dəyərdir: "Mükafat Birinci Avropa Oyunları üçün gördüyümüz hazırlıqlara bələdçilik edən yaradıcılıq və innovasiya ruhuna verilən dəyərdi. "Bakı-2015" brendi ev sahibi Azərbaycanın təbii gözəlliyinin və bütün qitənin zövq ala biləcəyi yenilikçi idman tədbiri həyata keçirmək arzumuzla duyduğumuz qürur hissini əks etdirir”.

"Bakı-2015"in brend üzrə direktoru Dan Tomlinson da öz fikirlərini bölüşüb: "Bakı-2015-in brend üzrə komandası, medallardan uniformalara qədər bütün əşyalarda istifadə olunmaq, bütün formalarda və ölçülərdə brendləşdirmə məqsədilə əlverişli görünüş yarada bilmək üçün səylərini səfərbər etdi”.

Brendin görünüşü, daha öncə London 2012 Yay Olimpiya və Paralimpiya Oyunları üçün idman brendlərinin hazırlanmasını həyata keçirən məşhur "SomeOne” agentliyi ilə birgə əməkdaşlıq nəticəsində yaradılıb.

"SomeOne” agentliyinin yaradıcısı və icraçı direktoru Qari Holt vurğulayıb ki, mükafata layiq görüldükləri üçün qürur duyur: "Biz ötən 18 ay ərzində Avropa Oyunları Əməliyyat Komitəsi ilə həyata keçirdiyimiz əməkdaşlığın nəticəsi olan brendin layiq görüldüyü mükafata görə qürur duyuruq".

Oyunlara geri sayımın son mərhələdə olduğu müddətdə "Bakı-2015" brendi ev sahibi şəhərin müxtəlif küçələrində elan və reklam lövhələrində əks etdirilir, eləcə də, Birinci Avropa Oyunlarının möhtəşəm məşəl və çırağının önəmli hissəsini formalaşdırır.

Daha çox