“Sulya”nın 50 yaşına

Yadıma gəlmir ki, Azərbaycan çempionatında hansısa oyunçu məhz azarkeşlərin tələbi ilə meydanya buraxılsın. Bəlkə də bundan sonra da olmayacaq. Amma illər öncə bir azərbaycanlı öz vətənində yox, başqa bir ölkədə - dünyanın ən böyük ölkələrindən birində bunu bacarıb...

Vaxtilə Sumqayıtın tozlu-torpaqlı küçələrində futbol oynamış, çətinliklər içində böyümüş, öz zəhməti hesabına “Neftçi”yə gəlmiş, orada haqsızlıq görmüş və bu haqsızlığı yeni uğurların başlanğıcı kimi qəbul etmiş, daha sonra Rusiyaya yollanıb tarix yazmış, azərbaycanlı.... Nazim Süleymanov... Rusiyada, Osetiyada azarkeşlərin sevgiylə “Sulya” çağırdığı azərbaycanlı...

50 yaşın mübarək!

“Azərbaycan futbolunun görkəmli siması” deyil o... Bu ad onsuz da onun üçün yetərli deyil. Süleymanov Azərbaycan xalqının görkəmli nümayəndəsidir. Özünün dediyi kimi, “Şimali Osetiyada özümü elə aparırdım ki, desinlər, bütün azərbaycanlılar belədir”. Süleymanov Rusiya millisindən dəvət alanda da əsl vətənpərvər kimi davrandı. Ulduzlar komandasında bəy balası kimi oynamaqdansa, forma tapmayan millisini üstün tutdu... Əsl mənəviyyat, vətən, millət sevgisi budur!

Millinin ilk kapitanı, 50 yaşın mübarək!

Yaxşı xatirimdədir, həmkərım Sənan Abdullayevlə birgə Antalyada Rusiya futbolunun tanınmış nümayəndəsi Dmitri Xoxlovdan müsahibə alırdıq. Azərbaycanlılardan, Azərbaycan futbolundan söhbət düşəndə, duruxdu. Soruşduq ki, Nazim Süleymanovu da tanımırsan?

Reaksiyası indiyə kimi yadımdadır... Süleymanov?
Rusiyada məgər onu tanımayan var?  Süleymanov ulduzdur, görsəniz, hörmətlərimi çatdırın!” Bu söhbətin iştirakçısı olan azərbaycanlı kimi sözün əsl mənasında qürur hissi keçirdim. Antalyanın günəşli günündə tüklərim biz biz olmuşdu...

Əsl təbliğat budur... Azərbaycanın ən uğurlu təmsilçilərindən biri, 50 yaşın mübarək!  

Sözsüz, Süleymanovun səhvləri də var. Bunun bir qismi maliyyəyə, digəri vətənə bağlılığa dayanır. Süleymanov əgər Mənsimovun dəvətini qəbul edib, o vaxt “Xəzər Lənkəran”ı formalaşdırmaq üçün Azərbaycana gəlməsəydi, bəlkə də hazırda Rusiyada sayılıb-seçilən məşqçilərdən idi, eləcə də qədrini daha çox bilərdik... O vaxt müvəqqəti Azərbaycana gələn Süleymanov bir də gördü ki, artıq 11 il keçib... Bu 11 ildə nələr olmadı ki... Klublarda, millidə çalışdı... Mənə elə gəlir ki, lazım olduğu məqamlarda haqsızlığa göz yummadı... Bu da “Sulya”nın bir qələbəsi idi...

Yumor hissi yüksək olan insandır. Bəzən gərgin bir məsələyə yumorla elə ustalıqla çıxır ki... Əmin olursan ki, təkcə meydanda yox, həyatda da yaxşı mənada texnikalıdır.

.... Yaxın günlərdə əsri yarılayacaq Süleymanovla bir əsrdə yaşadığım üçün həqiqətən də sevinirəm. Və çox sevinirəm ki, onun kimi böyüklə böyük, kiçiklə kiçik olan insanı yaxından tanıyıram. Amma istənilən halda, mən onu 50 yaşlı Süleymanov kimi yox, Sulya kimi qəbul edirəm...

Azərbaycanı dünyanın ən böyük ölkələrindən birində azərbaycanlı kimi, səfir kimi, dünyanın ən böyük klublarına qarşı oynamış hücumçu kimi, vladiqafqazlıların bir ağızdan çağırdığı Sulya kimi,  yeganə Rusiya çempionumuz kimi tanıyıram.

50 yaşın mübarək, sənətkar!

Elgiz ABBASOV