Bəhram Bağırzadə: «Rəşad Sadıqovu ona görə sevirəm ki, heç zaman “xaltura” eləmir» (FOTO)

- Bəhram bəy, bilirik ki, futbolla möhkəm maraqlanırsınız. Azarkeşlik etdiyiniz klublar hansılardır?

- Milli çempionatdakı klublarımızdan “Neftçi”yə, dünya klublarından isə “Barselona”ya azarkeşlik edirəm.Millimizin fanatı olmaqla, yanaşı 1982-ci ildən İspaniya millisinin də azarkeşiyəm.

- Oyunlara necə gedirsinizmi?

- 1985-ci ildən keçmiş Lelin, indiki Tofiq Bəhramov adına respublika stadionundakı oyunların əksəriyyətini buraxmamışam. Beynəlxalq miqyaslı yarışlarda isə sonuncu dəfə Almaniyadakı dünya çempionatında İspaniya-Ukrayna matçını canlı izləmişəm.

- Millimizin martın 28-də Rusiya ilə matçını izləmək üçün Moskvaya gedəcəksiniz?

- Əgər sponsor tapsam, hə (gülür). Rusiyadakı səfirliyimizə AFFA tərəfindən 5 min pulsuz bilet ayrılıb. Hələ ki, o biletlərdən biri də mənə gəlib çatmayıb.

- Ümumiyyətlə, AFFA sizi oyunlara dəvət edir?

- Mən demək olar ki, hər oyuna bilet alıram. Amma bəzən AFFA-dan dəvətnamə gəlir. Məktəb illərində fan klubun üzvüydüm. Ona görə çox zaman tablonun altında otururduq. Hətta bəzən stadionda matçı izləmək üçün hasardan da aşırdıq. İndi isə çox zaman tablonun altında, jurnalistlər üçün ayrılan yerdə otururam. Sovet vaxtında belə idi ki, möhtəşəm olimpiadalara, çempionatlara Vidson İosef , Kabzon, Müslüm Maqomayev kimi məhşur simaları çağırırdılar. Onlar orda “Olimpia” adlanan kənddə qalırdılar. İndi də AFFA oyunlara məhşur simaları dəvət etsə, məncə daha yaxşı olar.

- Bilirik ki, bir çox futbolçuyla dostluq edirsiniz...

- Maşallah Əhmədov, İqor Ponomoryov və İsgəndər Cavadovla yaxın münasibətlərim var. Elə bir saat əvvəl İqorla telefonla danışmışam. Hazırkı nəsildən isə Rəşad Sadıqova azarkeşlik edirəm. Otağımda divarda məhşur insanların rəsmləri var. Rəşad Sadıqovun da rəsmi divardan asılıb. Mən Rəşadı ona görə sevirəm ki, o, oyun zamanı heç zaman “xaltura” eləmir. Ya pis oynayır, ya da yaxşı. İndi görürsüz, “Kocaelispor”da oynayır və çox sevinirəm ki, o bizi layiqli təmsil edir.

- Son zamanlar futbolumuza dövlət qayğısı artıb. Güclü sərmayələr yatırılır.

- Bəli, mən bunu yüksək qiymətləndirirəm. Amma çox təəssüf ki, biz bu işə 10 il əvvəl başlaya bilmədik. Onda bəlkə bizim klublar artıq dünyada öz sözünü demişdi. İşləmək lazımdır. Ən əsası uşaq futboluna diqqət yetirməliyik. Şəmkir, Tovuz xüsusən də Gəncə kimi şəhərlərimizdə futbol akademiyaları açmalıyıq. Gəncəni ona görə xüsusi vurğuladım ki, ən azından Gəncə futbolu bizə Dmitri Kramarenko, Vəli Qasımov kimi futbolçular bəxş edib.

- Berti Foqtsa münasibətiniz necədir?

- Çox gözəl. Məncə, bir çox tanınmış alman mütəxəssisi Azərbaycana gətirmək lazımdır ki, 20 il sonra Azərbaycan beynəlxalq arenada öz sözünü deyə bilsin. Bizim futbolçularda güclü nizam-intizam yoxdur. Alman nizam-intizamından yararlanmaq lazımdır. Yəqin ki, “Qalatasaray”ın “Hamburq”la son matçını izlədiniz. Türklər 2:0 öndə olsalar da, matçın sonunda üç top buraxdılar. Yenə də alman futbolu. Birdə AFFA-nın yeni açdığı Futbol Akademiyası ilə bağlı narazılığım var. Mən bilən bu akademiyada 27 nəfər təhsil alacaq. Məncə, bu çox azdır. 8 milyonluq Azərbaycan üçün 27 nəfər nədir ki?

- Sizcə, bu il Azərbaycan Premyer-Liqasında çempion kim olacaq?

- Vallah deyə bilmərəm. Kim olursa olsun, əsas odur millimiz uğurlu çıxış etsin.

Gülqız DADAŞOVA