“Heç bir rəqibdən qorxmuruq” - Qurban Qurbanov

“Heç bir rəqibdən qorxmuruq” - Qurban Qurbanov
AVROKUBOKLAR 13 Mart 2024 / 21:14 6480
-  A +

"Vacib oyundur. Son vaxtların ən yaxşı komandalarından birinə qarşı oynayacağıq. Cavab oyununda diqqətli olmalıyıq. Bu stadionda çıxış etmək xoşdur. Bütün fikrimizi oyuna yönəltmişik".

QOL.az xəbər verir ki, bu sözləri "Qarabağ"ın baş məşqçisi Qurban Qurbanov Avropa Liqasının 1/8 finalında "Bayer"lə sabahkı cavab oyunu öncəsi keçirilən mətbuat konfransında deyib.

O, Xabi Alonsonun  "Qarabağ"dan qorxmadığını bildirməsi  fikrini belə şərh edib: "Biz hamımız bu ifadəni işlədirik. Heç bir rəqibdən qorxmuruq. Rəqibə qarşı biz də eyni cür yanaşırıq". 

Mütəxəssis Juninyonun son durumu və Musa Qurbanlının Ağdam təmsilçisinə qayıdıb-qayıtmayacağı ilə bağlı sualı belə cavablandırıb:  "Juninyonun sabah əsas heyətdə olub-olmaması hələ bilinmir.  Məşqdən sonra qərar veriləcək. Hazırda yeni hücumçu haqda düşünmürük. Komandada yetərincə futbolçu var. Həmin mövqedə istənilən oyunçudan istifadə edə bilərik.  Musanın komandaya qayıtması hələlik gündəmdə deyil. Bu mövzu yay transfer pəncərəsində açıla bilər".

Q.Qurbanov sıx qrafikdə olduqlarını vurğulayıb: "Amma "Bayer" də son 20 gündə çox vacib qrafikdə olub. Son vaxtlar onların hazırlığı daha yaxşıdır. Mən heç vaxt futbolçularıma sırf əlavə vaxt və ya penaltilər seriyasına hazırlaşmağı tapşırmamışam. Amma məşq proseslərimizdə ayda bir dəfə bunun üzərində çalışırıq. İndi onları buna hazırlamaq psixoloji basqı ola bilər. Belə halları oyunun gedişində düşünmək daha doğrudur. Biz 90 dəqiqəyə motivasiya olub meydana çıxırıq. 120 dəqiqə oynamaq təcrübəmiz də var. Dəfələrlə bu situasiya ilə rastlaşmışıq. Çox istərdim ki, hər şey 90 dəqiqədə həll olunsun. Kim qalib gəlsə,fərq etməz. Futbolçuları nəzərə almaq lazımdır. Son illərdə futbol elə hala gəlib çıxıb ki, oyun sayı həddindən artıq çoxdur. İstirahət etməyə vaxt olmur. Sabah Bakıdakı oyunu daha da yaxşılaşdırmağa çalışacağıq". 

Mütəxəssis  bu mərhələyə kimi gəlməyin onlar üçün böyük təcrübə olduğunu söyləyib: "Zədəlilərimiz oldu, bəzi transferlərimiz gecikdi. Çox güc sərf etdik və komandanı formalaşdıra bildik. Bəzi risklərə getdik. Tək mənə yox, Azərbaycan futboluna böyük təcrübə oldu. Azarkeşlərə, funksionerlərə və s. Son vaxtlar futbol ölkədə daha çox sevildi. Belə komandalara qarşı oynadıqda, "Braqa" kimi rəqiblərə qalib gəldikdə komandanın böyüməsinə daha çox təkan olur. Elə detallar var ki, yaxşılaşdırmalıyıq. Deməyə çəkinmirəm, bu il mənə böyük təcrübə və inam verdi. Bəzən futbolçuların sənin tapşırıqlarını həvəslə yerinə yetirirsə, bu, səni sevindirir".

P.S: Jurnalistlərin Leverkuzenə səfəri və mətbuat konfransında iştirakı ETOPAZ-ın dəstəyi ilə həyata keçirilib

Daha çox


Son xəbərlər