Qurban Qurbanov: “Komandada hələ də psixoloji gərginlik var”

“Oyun haqda çox da danışmaq istəmirəm. İlk oyundan böyükhesablı yenilgiylə dönmüşük. Şübhəsiz belə nəticədən sonra turu adlamağımız çətin olacaq. Ancaq əlimizdən gələni etmişik ki, qarşıdakı oyunda daha baxımlı futbol sərgiləyə bilək, uğurlu nəticə qazanaq”. Qol.Az-ın məlumatına görə, bu sözləri “Qarabağ”ın baş məşqçisi Qurban Qurbanov deyib.
Avropa Liqasının pley-off mərhələsinin cavab oyunları çərçivəsində sabah Almaniya “Borussiya”sı ilə qarşılaşacaq Ağdam təmsilçisinin çalışdırıcısı bu gün keçirilən mətbuat konfransında ilk oyundakı yenilgi ucbatından futbolçularında psixoloji gərginliyin olduğunu etiraf edib: “Komandada hələ də psixoloji gərginlik var. İlk növbədə bunu aradan qaldırmağa çalışırıq. İnanıram ki, sabah azarkeşlər meydanda sona kimi mübarizə aparan komanda görəcək”.
İlk oyunla müqayisədə heyətdə ciddi dəyişikliklərin olmayacağını vurğulayan mütəxəssis Dortmund klubu ilə oyundan öncə zədələnərək, sıradan çıxan yarımmüdafiəçi Əfran İsmayılovun yoxluğunun ciddi şəkildə hiss olunduğunu da etiraf edib: “Şübhəsiz Əfranın yoxluğu çox hiss olunur. Hər nə qədər çalışsaq da, sırf onun yoxluğunu hiss etdirməmək bir qədər çətindir. Çünki İsmayılovun tam başqa oyun tərzi var. Sırf hücuma meylli və rəqib müdafiəsini daim gərginlikdə saxlayan bir futbolçudur. Yenə əlimizdən gələni edəcəyik ki, Əfranın yoxluğu hiss olunmasın. Buna nə dərəcədə nail olacağımızı isə zaman göstərəcək”.
Ağdam klubunun çalışdırıcısı futbolçulardakı gərginliyin yaranmasında səbəb kimi mətbuatın təzyiqinin bir qədər artıq olmasını da önə çəkib: “Futbolçularda yaranan gərginliyə gözləmədiyimiz nəticə səbəb oldu. Amma bəzi oyunçular haqda mətbuatda elə yazılar yazıldı ki, bunun özü də gərginliyi artıran məqamlardandır. Həmin tənqidlər nəinki onlara, digər oyunçularımıza da təsir etdi. Ancaq düşünürəm ki, hər biri peşəkar futbolçulardır və belə çətin oyun ərəfəsində özlərini toparlamağı bacaracaqlar”.
“Borussiya”nın Bundesliqanın ilk turu çərçivəsində “Bayer”lə oyununa baxdığını deyən Qurbanov rəqib komandada hansısa ciddi boşluqların olmadığını qeyd edib: “Bayer”lə oyuna canlı baxdım. Sonradan bir daha izlədim. Rəqibi analiz etmişik. Ancaq onlarda hansısa boşluq görməmişik. 20-25 yaş arası futbolçulardan təşkil olunan bir komandadır. Ötən ilin ən çox hərəkətdə olan komandası olduğunu nəzərə alsaq, belə kollektivlərdə hansısa boşluqlar çox az olur. Amma oyunun gedişində müəyyən səhvlər, boşluqlar yarana bilər ki, biz də ondan istifadə etməyə çalışacağıq”.
Millimizin baş məşqçisi Berti Foqtsun “Mən “Qarabağ”ın “Borussiya”ya qalib gələcəyinə və qrup mərhələsinə yüksələcəyinə inanıram” sözlərinə münasibətini bildirən Qurbanov sadəcə bunu vurğulayıb: “Güvəndiyinə görə, sağ olsun”.